Achomharc arna thabhairt ag Vincenzo D’Agostino agus Dafin Srl an 11 Meán Fómhair 2023 i gcoinne ordú na Cúirte Ginearálta (an Ceathrú Dlísheomra) an 25 Iúil 2023 i gCás T-424/22, D’Agostino agus Dafin v an Banc Ceannais Eorpach (BCE)

(Cás C-566/23 P)

Teanga an cháis: an Iodáilis

Páirtithe

Achomharcóirí: Vincenzo D’Agostino, Dafin Srl (ionadaithe: M. De Siena, avvocato)

Páirtí eile sna himeachtaí: An Banc Ceannais Eorpach

An t-ordú atá á lorg

Iarrann na h-achomharcóirí go ndéanfaí an t-ordú a thug an Chúirt Ghinearálta an 25 Iúil 2023 lena ndiúltaítear don chaingean i gCás T 424/22 arna thabhairt ag Vincenzo D’ Agostino, é féin agus ina cháil mar stiúrthóir aonair Dafin s.r.l. i gcoinne an Bhainc Cheannais Eorpaigh a chur ar neamhní, agus, dá bhrí sin, seasamh leis an gcineál ordaithe a iarrtar san iarratas ag an gcéad chéim agus, dá bhrí sin, iarrann siad ar an gCúirt Bhreithiúnais an méid seo a leanas:

dliteanas neamhchonarthach an Bhainc Cheannais Eorpaigh (BCE) a ndéanann an tUachtarán Christine Lagarde ionadaíocht thar a cheann, a fháil amach agus a dhearbhú:

I.(a) trí laghdú luacha a chur ar na hurrúis atá faoi úinéireacht Vincenzo D’Agostino arna dtáirgeadh mar Iarscríbhinn 3 a ghabhann leis an iarratas ag an gcéad chéim ar a dtugtar SI FTSE.COPERP, caillteanas arb ionann é agus luach iomlán an chaipitil infheistithe, arb ionann é agus EUR 450 596,28, ós rud é, an 12.3.2020, gheall Christine Lagarde, ina cáil mar Uachtarán BCE, leis an frása cáiliúil “Nílimid anseo chun na raonta difríochta a laghdú, ní feidhm de chuid an BCE é seo”, as ar tháinig laghdú suntasach ar luach na n-urrús ar gach stocmhalartán ar fud an domhain agus laghdú 16.92 % ar Stocmhalartán Milano, mar chéatadán nár fíoraíodh riamh i stair na hinstitiúide sin, agus stocmhalartáin dhomhanda eile, trína chur in iúl leis an abairt sin ag preasagallamh, ar fud an domhain, nach mbeadh ar BCE luach na mbannaí arna n-eisiúint ag tíortha i gcruachás a thuilleadh agus, dá bhrí sin, tríd an athrú iomlán ar sheasamh an bheartais airgeadaíochta a ghlac BCE nuair a bhí sé faoi chathaoirleacht Mario Draghi a chur in iúl, a raibh a théarma oifige curtha i gcrích aige i mí na Samhna 2019;

I.(b) mar gheall ar an iompair sin, agus gheall ar an titim ghéar réamhluaite ar innéacs Stocmhalartán Milano, a bhí mar chúis leis an laghdú ar luach shócmhainní na n-achomharcóirí;

I.(c) mar thoradh ar an laghdú substaintiúil suntasach ar luach shócmhainní na n-achomharcóirí, a bhfuil sé d’oibleagáid orthu an laghdú sin ar shócmhainní a chúiteamh, agus mar ráthóir ar Dafin s.r.l. don líne chreidmheasa a dheonaigh Banca Fideuram s.p.a. don chuideachta sin, an chuid tarraingthe den líne chreidmheasa sin a chur ar ceal trí urrúis eile a bhí faoi úinéireacht Dafin s.r.l. a dhíol ag am laghdaithe, agus caillteanas caipitil EUR 2 534 422,16 in 2020 agus EUR 336 517,30 sa tréimhse 01.01.2021-15.04.2021, agus, dá bhrí sin, caillteanas caipitil iomlán de EUR 2 870 939,30 a thabhú.

I.d) toisc go raibh sé ina chúis le caillteanas sócmhainní airgeadais as caillteanas brabúis EUR 1.013.074,00.

I.e) dá thoradh sin, ba chúis le damáiste airgeadais EUR 4.334.609,28 san iomlán.

    Dá bhrí sin:

a ordú don Bhanc Ceannais Eorpach, ag gníomhú dó trína Uachtarán, pro tempore, cúiteamh a íoc as an damáiste ábhartha, arb é atá ann an damáiste atá ag teacht chun cinn agus caillteanas brabúis, an damáiste neamhábhartha agus an damáiste as deis a chailleadh i bhfabhar Vincenzo D’Agostino, arna mheas i gcomhréir leis na critéir a leagtar amach i gcaibidlí ábhartha agus i míreanna ábhartha na gníomhaíochta reatha, trí na suimeanna seo a leanas a íoc:

II.1) Euro 4 334 609,28 trí bhíthin damáiste airgeadais,

II.2) EUR 1 000 000,00 mar dhamáiste neamhábhartha;

II.3) agus dá bhrí sin íocaíocht na suime iomláine EUR 5 321 535,68

gach móide ús mainneachtana atá le ríomh ó 12.3.2020, dáta an teagmhais dhíobhálaigh, go dtí an cúiteamh iarbhír.

mar mhalairt air sin, trí shuimeanna de mhéideanna éagsúla a íoc a suíodh i gcúrsa na n-imeachtaí, a mhéid a measadh a bheith amhlaidh, trí thuarascáil saineolaí a bheidh le cur isteach ag an gCúirt.

a ordú go n-íocfar an tsuim bhreise a chinnfidh an Chúirt agus a íocfaidh sí, ar bhonn cothromasach, mar chúiteamh i gcailliúint deiseanna.

V)    mar mhalairt air sin, an cás a tharchur ar ais chuig an gCúirt Ghinearálta.

(VI)     a ordú don pháirtí eile sna himeachtaí na costais dlí a íoc.

Pléadálacha agus príomhargóintí

Mar thaca lena n-achomharc, áitíonn na hachomharcóirí, ar an gcéad dul síos, gur dhiúltaigh an Chúirt Ghinearálta dóibh, de shárú ar na cearta cosanta a chumhdaítear in Airteagal 6 den Choinbhinsiún Eorpach um Chearta an Duine, an ceart chun freagra a thabhairt ar an gcosaint a thaisc BCE, ceart ar mhian leis na hachomharcóirí a fheidhmiú trí thuarascáil theicniúil faoi mhionn a chur isteach chun a fháil amach an raibh an titim shuntasach in innéacsanna stocmhalartáin agus stocmhalartáin in Milano inchurtha i leith éifeacht phaindéimeach COVID, mar a áitíonn BCE, nó, de réir mar a éilíonn siad, an ráiteas a rinne Uachtarán BCE.

Ar an dara dul síos, tugann na hiarratasóirí le fios, ina n-iarratas, gur léirigh siad cheana féin go raibh nasc cúisíoch ann idir an ráiteas atá i gceist, an titim in innéacs stocmhalartáin Milano agus caillteanas luacha urrúis an iarratasóra dá bharr, agus cuireann siad in iúl gur léirigh an t-athbhreithniú preasa ar an bpreasagallamh a d’eisigh Uachtarán BCE an 12.3.2020, barúlacha nuachtán Iodálach agus idirnáisiúnta agus ráitis Uachtarán Phoblacht na hIodáile go raibh sé cinnte go ginearálta gurbh é ráiteas Uachtarán BCE amháin ba chúis leis an laghdú ar stocmhalartáin. Thairis sin, le tionscnamh Uachtarán BCE leithscéal a ghabháil leis an ráiteas a rinneadh agus é a cheartú, léiríodh a aitheantas féin go raibh iarmhairtí thar a bheith díobhálach ar na margaí mar thoradh air.

Ar an tríú dul síos, cuireann na hachomharcóirí i gcoinne chinneadh na Cúirte Ginearálta i míreanna 16 go 33 den ordú atá faoi achomharc, ar dá réir nár thabhaigh BCE dliteanas neamhchonarthach toisc, sa chás seo, nach ndearna BCE sárú ar riail dlí a bhí beartaithe chun cearta a thabhairt do dhaoine aonair. Cuireann na hiarratasóirí in iúl gur rialacha institiúideacha iad na forálacha dá dtagraítear lena leagtar síos cumhachtaí chomhlachtaí aonair BCE agus lena dtugtar cumhachtaí sonracha dóibh. Tugann siad cearta do dhaoine aonair agus go sonrach an ceart atá ag daoine aonair go ngníomhóidh na comhlachtaí éagsúla i gcomhréir leis na cumhachtaí institiúideacha a thugtar dóibh le dlí, i gcomhréir leis an bprionsabal maidir le hionchais dhlisteanacha a chosaint.

Ar an gceathrú dul síos, mar mhalairt air sin, áitíonn na hachomharcóirí, i gcás nach raibh sé i gceist leis na rialacha a sháraigh Uachtarán BCE cearta a thabhairt do dhaoine aonair, mar a chinn an Chúirt Ghinearálta, ní féidir glacadh le réasúnú an dara ceann sin mar thoradh ar léiriú sriantach ar Airteagal 340 CFAE. Ní dhéantar aon idirdhealú san fhoráil sin, amhail Airteagal 2043 de Chód Sibhialta na hIodáile, idir na rialacha atá beartaithe chun cearta a thabhairt do dhaoine aonair thar na rialacha eile, as a n-eascraíonn go heisiach sárú ar na rialacha a bhaineann leis an gcéad chatagóir go bhfuil ceart chun cúitimh ag an bpáirtí díobhálaithe. Thairis sin, tá an réasúnaíocht contrártha do na prionsabail a leagtar amach sa bhreithiúnas ón gCúirt Ghinearálta i gCás T-868/16, inar cinneadh gur féidir a rá gurb ann do dhliteanas neamhchonarthach an Aontais Eorpaigh i gcás aon iompair neamhdhleathaigh as a n-eascraíonn damáiste a d’fhéadfadh a bheith ina chúis le dliteanas den sórt sin.

Ar an gcúigiú dul síos, cuireann na hachomharcóirí i gcoinne chinneadh na Cúirte Ginearálta i mír 32 den ordú nach ndearna na hachomharcóirí, agus iad ag éileamh go ndearna Uachtarán BCE mí-úsáid cumhachta, an argóint sin a fhorbairt go sonrach san iarratas nár chuir siad an argóint sin i láthair ach amháin mar thoradh ar sháruithe ar na forálacha dá dtagraítear san iarratas nach raibh ceaptha cearta a thabhairt do dhaoine aonair. Áitíonn na hachomharcóirí gurb ionann mí-úsáid cumhachta agus “úsáid cumhachta ar bhealach nach bhfuil i gcomhréir leis an ndualgas reachtúil” agus gurb ann di i gcás ina n-imíonn institiúid de chuid an Aontais ó phrionsabail ghinearálta, amhail cothroime, meon macánta agus dícheall; ní raibh aon amhras ann, leis an ráiteas atá i gceist, gur sháraigh Uachtarán BCE prionsabal na cothroime agus na dícheallachta.

Ar an séú dul síos, déanann na hachomharcóirí gearán, i mír 35 den ordú, maidir leis an damáiste airgeadais a líomhnaíonn siad, go ndearna an Chúirt Chéadchéime léiriú éagsúil ar na fíorais ón méid dá dtagraítear san iarratas, inar luaigh Vincenzo D’ Agostino, mar ráthóir ar Dafin s.r.l. don líne chreidmheasa arna deonú ag Banca Fideuram, mar thoradh ar an laghdú ar luach a shócmhainní mar gheall ar chaillteanas iomlán luach na n-urrús SI FISTE COPERP, mar thoradh ar thitim stocmhalartán Milano, tar éis an ráiteas atá i gceist, ar eagla go mbeadh freagairt ón mBanc, tar éis an maoiniú a fháil chun an líne creidmheasa sin a chur ar ceal, cuireadh iallach air urrúis eile a bhí ina sheilbh aige a dhíol ar phraghsanna nach raibh inacmhainne agus dá bhrí sin cailleadh tuilleadh caipitil.

____________