Appell ippreżentat fit-28 ta' Frar 2012 minn Willem Stols kontra s-sentenza mogħtija fit-13 ta' Diċembru 2011 mit-Tribunal għas-Servizz Pubbliku fil-Kawża F-51/08 RENV, Stols vs Il-Kunsill
(Kawża T-95/12 P)
Lingwa tal-kawża: il-Franċiż
Partijiet
Appellant: Willem Stols (Halsteren, il-Pajjiżi l-Baxxi) (rappreżentanti: S. Rodrigues, A. Blot u C. Bernard-Glanz, avukati)
Parti oħra fil-proċedura: Il-Kunsill tal-Unjoni Ewropea
Talbiet
L-appellant jitlob li l-Qorti Ġenerali jogħġobha:
tiddikjara dan l-appell inammissibbli;
tannulla s-sentenza mogħtija fit-13 ta' Diċembru 2011 mill-Ewwel Awla tat-Tribunal għas-Servizz Pubbliku tal-Unjoni Ewropea, fil-Kawża F-51/08 RENV;
tilqa' t-talbiet imressqa minnu fl-ewwel istanza;
tikkundanna lill-Kunsill għall-ispejjeż taż-żewġ istanzi.
Aggravji u argumenti prinċipali
Insostenn tal-appell tiegħu, l-appellant jinvoka l-aggravji li ġejjin.
L-ewwel aggravju huwa bbażat fuq il-fatt li waqt l-eżami tal-ewwel motiv imqajjem fl-ewwel istanza ibbażat fuq il-ksur tal-Artikolu 45(1) tar-Regolamenti tal-Persunal tal-Unjoni Ewropea u fuq l-iżball manifest ta' evalwazzjoni, it-TSP kiser id-dritt tal-Unjoni:
billi uża kriterju mhux previst mill-Artikolu 45(1) tar-Regolamenti tal-Persunal (ara l-punti 46 u 47 tas-sentenza appellata);
billi mmotiva s-sentenza tiegħu b'mod insuffiċjenti u billi qiegħed inkwistjoni mill-ġdid il-klassifikazzjoni f'żewġ gruppi ta' funzjonijiet skont l-Artikolu 5 tar-Regolamenti tal-Persunal (ara l-punti 52 sa 54 tas-sentenza appellata) u
billi vvizzja l-motivazzjoni tiegħu b'ineżattezza materjali u billi wettaq interpretazzjoni żbaljata tal-kriterju tal-lingwi msemmi fl-Artikolu 45(1) tar-Regolamenti tal-Persunal (ara l-punti 50 u 51 tas-sentenza appellata).
It-tieni aggravju huwa bbażat fuq il-fatt li waqt l-eżami tat-tieni motiv imqajjem fl-ewwel istanza ibbażat fuq il-ksur tal-Artikolu 59(1) tar-Regolamenti tal-Persunal u fuq il-ksur tal-prinċipju ta' nondiskriminazzjoni, it-TSP adotta konklużjoni neċessarjament ivvizzjata fid-dritt, inkwantu huwa ċaħad it-tieni motiv bħala ineffettiv billi l-ewwel motiv ma kienx ġie stabbilit, filwaqt li wettaq numru ta' żbalji ta' liġi meta kkonkluda li l-ewwel motiv ma kienx ġie stabbilit (ara l-punti 59 u 60 tas-sentenza appellata).
____________