Iarraidh ar réamhrialú ó Tribunal Superior de Justicia de Galicia (an Spáinn) a taisceadh an 20 Márta 2024 – Asociación Petón do Lobo v Dirección Xeral de Planificación Enerxética Recursos Naturais
(Cás C-216/24, Asociación Petón do Lobo)
Teanga an cháis: an Spáinnis
An chúirt a rinne an tarchur
Tribunal Superior de Justicia de Galicia
Páirtithe sna príomhimeachtaí
Iarratasóir: Asociación Petón do Lobo
Cosantóir: Dirección Xeral de Planificación Enerxética e Recursos Naturais [de la Vicepresidencia Primeira e Consellería de Economía, Empresa e Innovación de la Comunidad Autónoma de Galicia]
Tríú páirtithe: Eurus Desarrollo Renovables, S.L.U., EGA- Asociación Eólica de Galicia
Na ceisteanna a tharchuirtear
Go soiléireofaí brí an natha ‘príomhthuarascálacha agus an chomhairle’ dá dtagraítear le hAirteagal 6(3) de Threoir 2011/92/AE. 1
Go dtabharfaí le fios an iad na tuarascálacha dá dtagraítear in Airteagal 37(2) den Ley 21/2013 [Dlí 21/2013], atá le hiarraidh ag an gcomhlacht inniúil, na tuarascálacha a leagtar amach in Airteagal 6(3) de Threoir 2011/95/AE.
Go soiléireofaí an bhfuil Airteagail 36, 37 agus 38 den Ley estatal 21/2013 [Dlí Stáit 21/2013] agus Airteagail 33 agus 34 den Ley autonómica gallega 8/2009 [Dlí Phobal Féinrialaitheach na Gailíse 8/2009] ar neamhréir leis an gceanglas a fhorchuirtear le hAirteagal 6(3) de Threoir 2011/92/AE go n-áiritheofaí go gcuirfí ar fáil don phobal lena mbaineann na príomhthuarascálacha earnála arna n-eisiúint ar mhaithe le hinfheidhmeacht an chirt a thugtar le haithris 4 den fhoráil sin, ionas go bhféadfadh an chuid sin den phobal a gcuid argóintí a dhéanamh agus páirt a ghlacadh, laistigh de thréimhse nach lú ná 30 lá, sa phróiseas maidir le cinneadh a dhéanamh ar an iarratas ar údarú tionscadail, sula nglactar an cinneadh sin.
____________
1 Treoir 2011/92/AE ó Pharlaimint na hEorpa agus ón gComhairle an 13 Nollaig 2011 maidir le measúnú a dhéanamh ar na héifeachtaí atá ag tionscadail phoiblí agus phríobhaideacha áirithe i ndáil leis an gcomhshaol (IO L 26, lch. 1).