Digriet tal-Qorti tal-Ġustizzja (It‑Tmien Awla) tat‑13 ta’ Diċembru 2023 – [Avdzhilov]
(Kawża C‑319/23)
“Rinviju għal deċiżjoni preliminari – Artikolu 99 tar-Regoli tal-Proċedura tal-Qorti tal-Ġustizzja – Risposta li tkun tista’ kjarament tiġi dedotta mill-ġurisprudenza – Kooperazzjoni ġudizzjarja f’materji ċivili – Ġurisdizzjoni u eżekuzzjoni tas-sentenzi f’materji ċivili u kummerċjali – Regolament (UE) Nru 1215/2012 – It-tieni inċiż tal-punt 1(b) tal-Artikolu 7 – Ġurisdizzjoni kemm internazzjonali kif ukoll territorjali fil-qasam kuntrattwali – Regolament (KE) Nru 261/2004 – Talba għal kumpens tal-passiġġieri tal-ajru għall-kanċellazzjoni ta’ titjira – Artikolu 5(1)(ċ) – Artikolu 7(1)(a) – Leġiżlazzjoni nazzjonali li tipprevedi fora oħra li għandhom ġurisdizzjoni favur konsumaturi”
Kooperazzjoni ġudizzjarja f’materji ċivili – Ġurisdizzjoni u eżekuzzjoni tas-sentenzi f’materji ċivili u kummerċjali – Regolament Nru 1215/2012 – Ġurisdizzjoni speċjali – Ġurisdizzjoni fil-qasam kuntrattwali – Qorti adita b’azzjoni bbażata fuq ir-Regolament Nru 261/2004 – Portata – Attribuzzjoni kemm tal-ġurisdizzjoni internazzjonali kif ukoll tal-ġurisdizzjoni territorjali –Leġiżlazzjoni nazzjonali li tipprevedi fora oħra li għandhom ġurisdizzjoni favur konsumaturi – Inapplikabbiltà
(Karta tad-Drittijiet Fundamentali tal-Unjoni Ewropea, Artikolu 47; Regolamenti tal-Parlament Ewropew u tal-Kunsill Nru 261/2004 u Nru 1215/2012, premessa 16 u t-tieni inċiż tal-punt 1(b) tal-Artikolu 7)
(ara l-punti 25 sa 30, u d-dispożittiv)
Dispożittiv
It-tieni inċiż tal-punt 1(b) tal-Artikolu 7 tar-Regolament (UE) Nru 1215/2012 tal-Parlament Ewropew u tal-Kunsill tat‑12 ta’ Diċembru 2012 dwar il-ġurisdizzjoni u r-rikonoxximent u l-eżekuzzjoni ta’ sentenzi fi kwistjonijiet ċivili u kummerċjali,
għandu jiġi interpretat fis-sens li:
meta din id-dispożizzjoni hija applikabbli, qorti ta’ Stat Membru adita b’azzjoni intiża sabiex jinkiseb kumpens abbażi tar-Regolament (KE) Nru 261/2004 tal‑11 ta’ Frar 2004 li jistabbilixxi regoli komuni dwar il-kumpens u l-assistenza għal passiġġieri fil-każ li ma jitħallewx jitilgħu u ta’ kanċellazzjoni jew dewmien twil ta’ titjiriet, u li li jħassar ir-Regolament (KEE) Nru 295/91, għandha tevalwa l-ġurisdizzjoni tagħha kemm internazzjonali kif ukoll territorjali fir-rigward ta’ din id-dispożizzjoni, minkejja l-eventwali eżistenza, fil-leġiżlazzjoni nazzjonali, ta’ fora oħra li għandhom ġurisdizzjoni favur konsumaturi.