Sentenza tal-Qorti Ġenerali (Is-Seba’ Awla) tas-7 ta’ Marzu 2013 – Acino vs Il‑Kummissjoni

(Kawża T‑539/10)

“Prodotti mediċinali għall-użu mill-bniedem – Sospensjoni tat-tqegħid fis-suq u rtirar ta’ ċerti lottijiet ta’ prodotti mediċinali li fihom l-ingredjent attiv Clopidogrel – Modifika tal-awtorizzazzjoni ta’ tqegħid fis-suq – Projbizzjoni ta’ tqegħid fis-suq ta’ prodotti mediċinali – Regolament (KE) Nru 726/2004 u Direttiva 2001/83/KE – Proporzjonalità – Obbligu ta’ motivazzjoni”

1.                     Rikors għal annullament – Persuni fiżiċi jew ġuridiċi – Entità assorbita minn persuna ġuridika oħra – Tmiem ta’ din l-entità – Sostituzzjoni tal-aventi kawża b’titolu universali fl-azzjonijiet legali tal-predeċessur tagħha (ir-raba’ paragrafu tal-Artikolu 263 TFUE) (ara l-punt 21)

2.                     Rikors għal annullament – Interess ġuridiku – Neċessità ta’ interess reali u attwali – Evalwazzjoni fil-mument tal-preżentata tar-rikors – Bażi ta’ eventwali rikors għad-danni (Artikolu 263 TFUE) (ara l-punti 29‑31, 40, 41)

3.                     Approssimazzjoni tal-leġiżlazzjonijiet – Prodotti mediċinali għall-użu mill-bniedem – Awtorizzazzjoni ta’ tqegħid fis-suq – Modifika tal- awtorizzazzjoni – Irtirar u projbizzjoni ta’ tqegħid fis-suq – Kundizzjonijiet – Rekwiżiti ta’ prova – Neċessità ta’ data xjentifika jew ta’ informazzjoni ġdida (Regolament tal-Parlament Ewropew u tal-Kunsill Nru 726/2004; Direttiva tal-Parlament Ewropew u tal-Kunsill 2001/83, Artikoli 116 u 117) (ara l-punti 51, 52, 56, 57, 60, 61, 63, 69, 70, 73‑75, 79, 87)

4.                     Approssimazzjoni tal-leġiżlazzjonijiet – Prodotti mediċinali għall-użu mill-bniedem – Awtorizzazzjoni ta’ tqegħid fis-suq – Modifika tal- awtorizzazzjoni – Irtirar u projbizzjoni ta’ tqegħid fis-suq – Setgħa diskrezzjonali tal-istituzzjonijiet – Stħarriġ ġudizzjarju – Limiti – Ksur tal-prinċipju ta’ proporzjonalità – Assenza (Regolament tal-Parlament Ewropew u tal-Kunsill Nru 726/2004; Direttiva tal-Parlament Ewropew u tal-Kunsill 2001/83, Artikoli 116 u 117) (ara l-punti 66, 82, 85, 88, 89, 92, 93, 113, 114)

5.                     Atti tal-istituzzjonijiet – Motivazzjoni – Obbligu – Portata – Deċiżjoni li tagħti, li tirrifjuta, li timmodifika, li tissospendi jew li tirtira awtorizzazzjoni ta’ tqegħid fis-suq – Rekwiżiti minimi (Artikolu 296 TFUE; Regolament tal-Parlament Ewropew u tal-Kunsill Nru 726/2004, Artikolu 81(1)) (ara l-punti 124, 125, 130)

Suġġett

Talba għall-annullament tad-deċiżjonijiet tal-Kummissjoni, tad-29 ta’ Marzu u tas-16 ta’ Settembru 2010, dwar is-sospensjoni tat-tqegħid fis-suq tal-prodotti mediċinali għall-użu mill-bniedem li fihom l-ingredjent attiv Clopidogrel immanifatturat f’ċertu post, dwar l-irtirar tal-lottijiet ta’ dawn il-prodotti mediċinali mis-suq, dwar il-modifika tal-awtorizzazzjonijiet ta’ tqegħid fis-suq kif ukoll dwar il-projbizzjoni ta’ tqegħid fis-suq tal-imsemmija prodotti mediċinali.

Dispożittiv

1) Ma hemmx iktar lok li tingħata deċiżjoni dwar ir-rikors sa fejn dan huwa ppreżentat kontra d-Deċiżjonijiet tal-Kummissjoni C (2010) 2204 u C (2010) 2208, tad-29 ta’ Marzu 2010, u kontra d-Deċiżjonijiet tal-Kummissjoni C (2010) 6429 u C (2010) 6436, tas-16 ta’ Settembru 2010.

2) Il-kumplament tar-rikors huwa miċħud.

3) Acino AG hija kkundannata għall-ispejjeż.