Rikors ippreżentat fl-24 ta' Jannar 2011 - Canon Europa vs Il-Kummissjoni
(Kawża T-34/11)
Lingwa tal-kawża: l-Ingliż
Partijiet
Rikorrenti: Canon Europa NV (Amstelveen, il-Pajjiżi l-Baxxi) (rappreżentanti: P. De Baere u P. Muñiz, avukati)
Konvenuta: Il-Kummissjoni Ewropea
Talbiet tar-rikorrenti
tiddikjara r-rikors ammissibbli
tannulla r-Regolament tal-Kummissjoni (UE) Nru 861/2010, tal-5 ta' Ottubru 2010, li jemenda l-Anness I tar-Regolament tal-Kunsill (KEE) Nru 2658/87 dwar in-nomenklatura tat-tariffa u l-istatistika u dwar it-Tariffa Doganali Komuni tad-Dwana (ĠU L 284, p. 1) u b'mod partikolari s-subdiviżjonijiet introdotti taħt is-Sistema Armonizzata (iktar 'il quddiem is-"SA") subintestatura 8443 31 u r-rati ta' dazju korrispondenti; u
tikkundanna lill-Kummissjoni għall-ispejjeż.
Motivi u argumenti prinċipali
Permezz tar-rikors tagħha r-rikorrenti titlob, skont l-Artikolu 263 TFUE, l-annullament tar-Regolament tal-Kummissjoni (UE) Nru 861/2010, tal-5 ta' Ottubru 2010, li jemenda l-Anness I tar-Regolament tal-Kunsill (KEE) Nru 2658/87 dwar in-nomenklatura tat-tariffa u l-istatistika u dwar it-Tariffa Doganali Komuni tad-Dwana (ĠU L 284, p. 1) u b'mod partikolari tas-subdiviżjonijiet introdotti taħt is-SA subintestatura 8443 31 u tar-rati ta' dazju korrispondenti.
Insostenn tar-rikors tagħha r-rikorrenti tinvoka s-segwenti motivi:
L-ewwel nett, ir-rikorrenti ssostni li r-rikors għal annullament huwa ammissibbli taħt l-Artikolu 263 TFUE peress li l-miżura kkontestata hija att regolatorju li jikkonċernha direttament u peress li din il-miżura ma tinvolvi ebda miżura ulterjuri ta' implementazzjoni.
It-tieni nett, ir-rikorrenti ssostni li l-att ikkontestat ma huwiex validu minħabba li jillimita l-kamp ta' applikazzjoni tas-SA 2007 subintestatura 8443.31 billi jeskludi mill-kamp ta' applikazzjoni tagħha l-makkinarju multifunzjonali (iktar il-quddiem il-"MMF") li kien preċedentement klassifikabbli taħt is-SA 2002 subintestatura 8471.60, filwaqt li l-konvenuta ma tistax tbiddel il-kamp ta' applikazzjoni tas-subintestaturi tas-SA skont l-Artikolu 3 tal-Konvenzjoni SA
1, u l-Artikolu 1.2(a) tar-Regolament tal-Kunsill (KEE) Nru 2658/87
2.
It-tielet nett, ir-rikorrenti ssostni li l-att ikkontestat huwa invalidu peress li jbiddel r-rati tad-dazju applikabbli għal ċertu MMF li kien preċedentement klassifikabbli taħt is-SA 2002 subintestatura 8471.60 u 8517.21, u għalhekk jikser l-Artikolu 9.2 tar-Regolament tal-Kunsill (KEE) Nru 2658/87.
Fl-aħħar nett, l-att ikkontestat jikser l-Artikolu II tal-GATT 1994
3 u l-obbligi sottoskritti mill-UE fl-iskeda tal-konċessjonijiet minħabba li jimponi dazju fuq certu MMF li fir-rigward tiegħu l-UE impenjat ruħha li tneħħi d-dazji doganali kollha.