Rikors ippreżentat fil-21 ta' Ottubru 2010 - IDT Biologika vs Il-Kummissjoni

(Kawża T-503/10)

Lingwa tal-kawża: il-Ġermaniż

Partijiet

Rikorrenti: IDT Biologika GmbH (Dessau-Roßlau, il-Ġermanja) (rappreżentanti: R. Gross u T. Kroupa, avukati)

Konvenuta: Il-Kummissjoni Ewropea

Talbiet tar-rikorrenti

tannulla d-deċiżjoni tal-10 ta' Awwissu 2010 tad-Delegazzjoni tal-Unjoni Ewropea fir-Repubblika tas-Serbja, li permezz tagħha hija, minn naħa, ċaħdet l-offerta li IDT Biologika GmbH ippreżentat għal-lott Nru 1 fil-kuntest tas-sejħa għal offerti bir-referenza EuropAid/129809/C/SUP/RS u li kellha bħala għan il-provvista ta' vaċċin anti-rabies għall-ministeru tal-agrikoltura, tal-foresta u tar-riżorsi tal-ilma tar-Repubblika tas-Serbja, benfiċjarja tal-għajnuna, u, min-naħa l-oħra, tat il-kuntratt inkwistjoni lil konsorzju ta' impriżi mmexxija minn "Biovet a.s.";

tikkundanna lill-konvenuta għall-ispejjeż.

Motivi u argumenti prinċipali

Ir-rikorrenti tikkontesta d-deċiżjoni li l-Kummissjoni Ewropea adottat fl-10 ta' Awwissu 2010 fil-kuntest ta' sejħa għal offerti li kellha bħala għan il-provvista ta' vaċċini anti-rabies (referenza tal-pubblikazzjoni: EuropAid/129809/C/SUP/RS) u li permezz tagħha hija għażlet offerent ieħor minflok ir-rikorrenti.

Insostenn tar-rikors tagħha, ir-rikorrenti tinvoka l-ksur tal-Artikolu 252(3) tar-Regolament (KE, Euratom) Nru°2342/2002 ¹, peress li l-offerta li rebħet il-kuntratt ma tissodisfax ir-rekwiżiti tekniċi tad-dokument tas-sejħa għal offerti, kemm fir-rigward tal-kundizzjoni ta' nonvirulenza tal-vaċċin għall-bniedem kif ukoll fir-rigward tal-awtorizzazzjonijiet meħtieġa, b'tali mod li din kellha neċessarjament tiġi rrifjutata.

Barra minn hekk, ir-rikorrenti tqis li nkisru tal-prinċipji ta' trattament ugwali u ta' trasparenza fis-sens tal-Artikolu 89(1) tar-Regolament (KE, Euratom) Nru 1605/2002 ², peress li, minkejja li l-offerta tagħha kienet l-unika waħda li kienet tissodisfa r-rekwiżiti stipulati fir-rigward tad-dettalji tekniċi, hija xorta waħda ġiet irrifjutata.

____________

¹ - - Regolament tal-Kummissjoni (KE, Euratom) Nru 2342/2002, tat-23 ta' Diċembru 2002, li jipprovdi regoli dettaljati għall-implementazzjoni tar-Regolament tal-Kunsill (KE, Euratom) Nru 1605/2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (ĠU L 357, p. 1).

² - - Regolament tal-Kunsill (KE, Euratom) Nru 1605/2002, tal-25 ta' Ġunju 2002, rigward ir-Regolament Finanzjarju applikabbli ghall-bagit generali tal-Komunitajiet Ewropej (ĠU Edizzjoni Speċjali bil-Malti, Kapitolu 1, Vol. 4, p. 74).