Iarraidh ar réamhrialú ón Helsingin hallinto-oikeus (an Fhionlainn) a taisceadh an 6 Iúil 2023 – Metsä Fibre Oy
(Cás C-414/23, Metsä Fibre)
Teanga an cháis: an Fhionlainnis
An chúirt a rinne an tarchur
Helsingin hallinto-oikeus
Páirtithe sna príomhimeachtaí
Iarratasóir: Metsä Fibre Oy
Na ceisteanna a tharchuirtear
An bhfuil forálacha Airteagail 70 agus 40 de Rialachán Uimh. 389/2013 1 ón gCoimisiún maidir le Clárlann, forálacha a bhaineann leis na teorainneacha ama chun idirbhearta a aisiompú agus cineál críochnaitheach agus do-chúlghairthe idirbheart, neamhbhailí i bhfianaise an chirt chun maoine faoi Airteagal 17 den Chairt um Chearta Bunúsacha an Aontais Eorpaigh agus cearta eile a chosnaítear faoin gCairt, a mhéid a chuirtear cosc leis na forálacha sin ar lamháltas a athaistriú chuig Metsä Fibre Oy i gcás ina raibh tabhairt suas lamháltas iomarcach chuig Clárlann an Aontais bunaithe ar chur i bhfeidhm forálacha a cinneadh go raibh siad neamhbhailí sa bhreithiúnas in Schaefer Kalk 2 , agus nach féidir leis an ngnóthas sin úsáid a bhaint as figiúr deimhneach an dea-stádais comhlíonta, mar gheall ar an leibhéal íseal astaíochtaí ó shuiteáil Äänekoski?
Más freagra diúltach a thabharfar ar Cheist 1, an bhfuil feidhm ag forálacha Airteagail 70 agus 40 den Rialachán ón gCoimisiún maidir le Clárlann i gcás inar bunaíodh tabhairt suas lamháltas iomarcach do Chlárlann an Aontais ar chur i bhfeidhm na bhforálacha a cinneadh sa bhreithiúnas in Schaefer Kalk go raibh siad neamhbhailí, agus ní ar idirbheart a thionscain sealbhóir cuntais nó riarthóir náisiúnta ag gníomhú ar son an tsealbhóra cuntais nó an riarthóra náisiúnta go neamhbheartaithe nó trí earráid?
Más freagra diúltach a thabharfar ar Cheist 1 agus freagra dearfach a thabharfar ar Cheist 2, an bhfuil aon bhealach eile faoi dhlí an Aontais chun Metsä Fibre Oy a chur sa riocht sin, maidir le húsáid na lamháltas, ina mbeadh sé murarbh ann do na forálacha a cinneadh sa bhreithiúnas in Schaefer Kalk a bheith neamhbhailí agus mura mbeadh na lamháltais iomarcacha tugtha suas ag an ngnóthas mar sin?
____________
1 Rialachán (AE) no 389/2013 ón gCoimisiún an 2 Bealtaine 2013 lena mbunaítear Clárlann an Aontais i gcomhréir le Treoir 2003/87/CE ó Pharlaimint na hEorpa agus ón gComhairle agus Cinntí Uimh. 280/2004/CE agus Uimh. 406/2009/CE ó Pharlaimint na hEorpa agus ón gComhairle lena n-aisghairtear Rialachán (AE) Uimh. 920/2010 agus Rialachán (AE) Uimh. 1193/2011 ón gCoimisiún (IO 2013 L 122).
1 Breithiúnas an 19 Eanáir 2017,
Schaefer Kalk (C-460/15, EU:C:2017:29).