Rikors ippreżentat fl-24 ta’ Novembru 2023 – Moshkovich vs Il-Kunsill
(Kawża T-1109/23)
Lingwa tal-kawża: l-Ingliż
Partijiet
Rikorrent: Vadim Nikolaevich Moshkovich (Tambov, ir-Russja) (rappreżentanti: D. Rovetta, M. Campa, T. Bontinck, A. Guillerme, L. Burguin, M. Moretto u V. Villante, avukati)
Konvenut: Il-Kunsill tal-Unjoni Ewropea
Talbiet
Ir-rikorrenti jitlob li l-Qorti Ġenerali jogħġobha:
tannulla:
id-Deċiżjoni tal-Kunsill (PESK) 2023/1767 tat-13 ta’ Settembru 2023 li temenda d-Deċiżjoni 2014/145/PESK dwar miżuri restrittivi fir-rigward ta' azzjonijiet li jipperikolaw jew jheddu l-integrità territorjali, is-sovranità u l-indipendenza tal-Ukrajna 1 ; u
ir-Regolament ta’ Implimentazzjoni tal-Kunsill (UE) 2023/1765 tat-13 ta’ Settembru 2023 li jimplimenta r-Regolament (UE) Nru 269/2014 dwar miżuri restrittivi fir-rigward ta’ azzjonijiet li jdgħajfu jew jheddu l-integrità territorjali, is-sovranità u l-indipendenza tal-Ukrajna 1 ; u
id-deċiżjoni li isem Vadim Nikolaevich Moshkovich jinżamm fil-lista ta’ persuni u entitajiet suġġetti għal miżuri restrittivi taħt id-Deċiżjoni tal-Kunsill 2014/145/PESK, kif emendata bid-Deċiżjoni tal-Kunsill 2023/1767, u r-Regolament tal-Kunsill (UE) Nru 269/2014, kif implimentata bir-Regolament ta’ Implimentazzjoni tal-Kunsill (UE) 2023/1765, adottata mill-Kunsill tal-Unjoni Ewropea permezz ta’ ittra tal-15 ta’ Settembru 2023 (iktar ’il quddiem flimkien l-“atti kkontestati”), sa fejn dawn jinkludu lir-rikorrent fil-lista ta’ persuni u entitajiet li huma suġġetti għal miżuri restrittivi;
tikkundanna lill-Kunsill għall-ispejjeż.
Motivi u argumenti prinċipali
Insostenn tar-rikors tiegħu, ir-rikorrent jinvoka ħames motivi.
L-ewwel motiv ibbażat fuq allegat ksur tal-obbligu ta’ motivazzjoni stabbilit fl-Artikolu 296 TFUE u tal-Artikolu 41 (2)(ċ) tal-Karta tad-Drittijiet Fundamentali tal-Unjoni Ewropea: ksur tad-dritt għal protezzjoni ġudizzjarja effettiva, u tal-Artikolu 47 tal-Karta tad-Drittijiet Fundamentali.
It-tieni motiv ibbażat fuq l-allegazzjoni li l-Kunsill wettaq żball manifest ta’ evalwazzjoni bl-applikazzjoni tal-kriterju għall-elenkar emendat għar-rikorrent, u, sussidjarjament, li l-kriterju għall-elenkar inkwistjoni huwa illegali.
It-tielet motiv ibbażat fuq allegat ksur tal-prinċipju ta’ proporzjonalità u tad-drittijiet fundamentali tar-rikorrent għal proprjetà u għal libertà ta’ intrapriża.
Ir-raba’ motiv ibbażat fuq allegat ksur tal-prinċipji ta’ protezzjoni tal-aspettattivi leġittimi u ta’ ċertezza legali.
Il-ħames motiv ibbażat fuq l-allegazzjoni ta’ ksur tal-prinċipju fundamentali ta’ nondiskriminazzjoni.
____________
1 ĠU 2023, L 226, p. 104.
1 ĠU 2023, L 226, p. 3.