SENTENZA TAL-QORTI ĠENERALI (L-Għaxar Awla Estiża)
6 ta’ Lulju 2022 (*)
“Trade mark tal-Unjoni Ewropea – Proċedimenti għal dikjarazzjoni ta’ invalidità – Trade mark figurattiva tal-Unjoni Ewropea NEHERA – Raġuni assoluta ta’ invalidità – Assenza ta’ mala fide – Artikolu 52(1)(b) tar-Regolament (KE) Nru 207/2009 (li sar l-Artikolu 59(1)(b) tar-Regolament (UE) 2017/1001)”
Fil-Kawża T‑250/21,
Ladislav Zdút, residenti fi Bratislava (ls-Slovakkja), irrappreżentat minn Y. Echevarría García, avukata,
rikorrent,
vs
L-Uffiċċju tal-Proprjetà Intellettwali tal-Unjoni Ewropea (EUIPO), irrappreżentat minn D. Gája, bħala aġent,
konvenut,
il-partijiet l-oħra fil-proċedimenti quddiem il-Bord tal-Appell tal-EUIPO, intervenjenti quddiem il-Qorti Ġenerali, li huma
Isabel Nehera, residenti f’Sutton, Ontario (il-Kanada),
Jean-Henri Nehera, residenti f’Burnaby, British Columbia (il-Kanada),
Natacha Sehnal, residenti f’Montferrier-sur-Lez (Franza),
irrappreżentati minn W. Woll, avukat,
IL-QORTI ĠENERALI (L-Għaxar Awla Estiża),
komposta minn A. Kornezov, President, E. Buttigieg, K. Kowalik-Bańczyk (Relatur), G. Hesse u D. Petrlík, Imħallfin,
Reġistratur: E. Coulon,
wara li rat il-fażi bil-miktub tal-proċedura,
wara li rat li ma kienx hemm talba għall-iffissar ta’ seduta mressqa mill-partijiet fit-terminu ta’ tliet ġimgħat mid-data tan-notifika tal-għeluq tal-fażi bil-miktub tal-proċedura u wara li ddeċidiet, skont l-Artikolu 106(3) tar-Regoli tal-Proċedura tal-Qorti Ġenerali, li tagħti deċiżjoni mingħajr il-fażi orali tal-proċedura,
tagħti l-preżenti
Sentenza
1 Permezz tar-rikors tiegħu bbażat fuq l-Artikolu 263 TFUE, ir-rikorrent, Ladislav Zdút, jitlob l-annullament tad-deċiżjoni tat-Tieni Bord tal-Appell tal-Uffiċċju tal-Proprjetà Intellettwali tal-Unjoni Ewropea (EUIPO) tal‑10 ta’ Marzu 2021 (Każ R 1216/2020‑2) (iktar ’il quddiem id-“deċiżjoni kkontestata”).
Il‑fatti li wasslu għall‑kawża
2 Fis‑6 ta’ Mejju 2013, ir-rikorrent ippreżenta applikazzjoni għal reġistrazzjoni ta’ trade mark tal-Unjoni Ewropea quddiem l-EUIPO, skont ir-Regolament tal-Kunsill (KE) Nru 207/2009 tas‑26 ta’ Frar 2009 dwar it-trademark tal-Unjoni Ewropea (ĠU 2009, L 78, p. 1), kif emendat (issostitwit bir-Regolament (UE) 2017/1001 tal-Parlament Ewropew u tal-Kunsill tal‑14 ta’ Ġunju 2017 dwar it-trademark tal-Unjoni Ewropea (ĠU 2017, L 154, p. 1)).
3 It-trade mark li għaliha saret l-applikazzjoni għal reġistrazzjoni hija s-sinjal figurattiv li ġej:
![Image not found](data:image/png;base64,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)
4 Il-prodotti li għalihom saret l-applikazzjoni għal reġistrazzjoni jaqgħu, b’mod partikolari, taħt il-klassijiet 18, 24 u 25 fis-sens tal-Ftehim ta’ Nice dwar il-klassifikazzjoni internazzjonali ta’ prodotti u servizzi għall-finijiet tar-reġistrazzjoni ta’ trade marks, tal‑15 ta’ Ġunju 1957, kif rivedut u emendat, u jikkorrispondu b’mod partikolari, għal kull waħda minn dawn il-klassijiet, għad-deskrizzjoni li ġejja:
– klassi 18: “Ġilda u imitazzjoni tal-ġilda, oġġetti magħmula minn dawn il-materjali u mhux inklużi fi klassijiet oħra; ġlud tal-annimali; bagolli u valiġġi; umbrelel u umbrelel tax-xemx, bsaten”;
– klassi 24: “Throws għas-sodda; tvalja”;
– klassi 25: “Ħwejjeġ, xedd tas-saqajn u xedd ir-ras”.
5 L-applikazzjoni għal trade mark ġiet ippubblikata fil-Bulettin tat-trade marks Komunitarji Nru 2013/107, tal‑10 ta’ Ġunju 2013.
6 It-trade mark ikkontestata ġiet irreġistrata fit‑13 ta’ Ottubru 2014 bin-numru 11794112 għall-prodotti msemmija fil-punt 4 iktar ’il fuq.
7 Fis‑17 ta’ Ġunju 2019, l-intervenjenti, Isabel Nehera, Jean-Henri Nehera u Natacha Sehnal, ressqu talba għal dikjarazzjoni ta’ invalidità kontra l-imsemmija trade mark, konformement mad-dispożizzjonijiet tal-Artikolu 59(1)(b) tar-Regolament 2017/1001, għall-prodotti kollha koperti minn din it-trade mark. Huma sostnew li r-rikorrent kien in mala fide meta ppreżenta l-applikazzjoni għar-reġistrazzjoni tat-trade mark ikkontestata. Huma esponew b’mod partikolari li n-nannu tagħhom, Jan Nehera, kien ħoloq fiċ-Ċekoslovakkja fis-snin 30, impriża li tikkummerċjalizza ħwejjeġ u aċċessorji u kien ippreżenta u uża trade mark nazzjonali identika għat-trade mark ikkontestata (iktar ’il quddiem it-“trade mark preċedenti Ċekoslovakka”).
8 Permezz ta’ deċiżjoni tat‑22 ta’ April 2020, id-Diviżjoni tal-Kanċellazzjoni tal-EUIPO ċaħdet it-talba għal dikjarazzjoni ta’ invalidità, għar-raġuni li l-mala fide tar-rikorrent waqt il-preżentata tat-trade mark ikkontestata ma kinitx ġiet stabbilita.
9 Fil‑15 ta’ Ġunju 2020, l-intervenjenti ppreżentaw appell quddiem l-EUIPO, skont l-Artikoli 66 sa 71 tar-Regolament 2017/1001, kontra d-deċiżjoni tad-Diviżjoni tal-Kanċellazzjoni.
10 Permezz tad-deċiżjoni kkontestata, it-Tieni Bord tal-Appell tal-EUIPO laqa’ l-appell tal-intervenjenti, annulla d-deċiżjoni tad-Diviżjoni tal-Kanċellazzjoni u ddikjara l-invalidità tat-trade mark ikkontestata.
11 Essenzjalment, il-Bord tal-Appell osserva li t-trade mark preċedenti Ċekoslovakka kienet trade mark magħrufa sew u kienet is-suġġett ta’ użu ġenwin fiċ-Ċekoslovakkja fis-snin 30. Huwa kkonstata li r-rikorrent kien jaf bl-eżistenza u bil-fama kemm ta’ Jan Nehera kif ukoll tat-trade mark preċedenti Ċekoslovakka, li kellha ċerta reputazzjoni residwa. Il-Bord tal-Appell indika wkoll li r-rikorrent kien ipprova jistabbilixxi rabta bejnu u din it-trade mark. F’dawn iċ-ċirkustanzi, huwa qies li l-intenzjoni tar-rikorrent kienet li jieħu vantaġġ inġust mir-reputazzjoni ta’ Jan Nehera u mit-trade mark preċedenti Ċekoslovakka. Minn dan huwa kkonkluda li r-rikorrent aġixxa b’mala fide meta ppreżenta l-applikazzjoni għar-reġistrazzjoni tat-trade mark ikkontestata.
It‑talbiet tal‑partijiet
12 Ir-rikorrent jitlob li l-Qorti Ġenerali jogħġobha:
– tannulla d-deċiżjoni kkontestata;
– tikkundanna lill-EUIPO għall-ispejjeż, inklużi dawk relatati mal-proċedimenti quddiem il-Bord tal-Appell tal-EUIPO.
13 L-EUIPO u l-intervenjenti jitolbu li l-Qorti Ġenerali jogħġobha:
– tiċħad ir-rikors;
– tikkundanna lir-rikorrent għall-ispejjeż.
Id‑dritt
Fuq l‑ammissibbiltà tad‑dokumenti prodotti għall‑ewwel darba quddiem il‑Qorti Ġenerali
14 Bħala anness mar-rikors, ir-rikorrent ipproduċa, l-ewwel, estratt mir-reġistru kummerċjali Slovakk dwar il-kumpannija Jandl u, it-tieni, fuljett ippreparat minn din il-kumpannija u li jippromwovi t-trade mark ikkontestata.
15 Kif josserva ġustament l-EUIPO, dawn id-dokumenti, prodotti għall-ewwel darba quddiem il-Qorti Ġenerali, ma jistgħux jittieħdu inkunsiderazzjoni. Fil-fatt, ir-rikors quddiem il-Qorti Ġenerali huwa intiż sabiex tiġi eżaminata l-legalità tad-deċiżjonijiet tal-Bordijiet tal-Appell tal-EUIPO fis-sens tal-Artikolu 72 tar-Regolament 2017/1001, b’tali mod li l-funzjoni tal-Qorti Ġenerali ma hijiex li teżamina mill-ġdid iċ-ċirkustanzi ta’ fatt fid-dawl tad-dokumenti ppreżentati għall-ewwel darba quddiemha. Għaldaqstant, id-dokumenti fuq imsemmija għandhom jiġu mwarrba mingħajr il-ħtieġa li jiġi eżaminat il-valur probatorju tagħhom (ara, f’dan is-sens, is-sentenza tal‑24 ta’ Novembru 2005, Sadas vs UASI – LTJ Diffusion (ARTHUR ET FELICIE), T‑346/04, EU:T:2005:420, punt 19 u l-ġurisprudenza ċċitata).
Fuq il‑mertu
16 Qabelxejn, għandu jiġi ppreċiżat li, fid-dawl tad-data tal-preżentata tal-applikazzjoni għal reġistrazzjoni inkwistjoni, jiġifieri s‑6 ta’ Mejju 2013, li hija determinanti għall-finijiet tal-identifikazzjoni tad-dritt sostantiv applikabbli, il-fatti tal-kawża huma rregolati mid-dispożizzjonijiet sostantivi tar-Regolament Nru 207/2009 (ara, f’dan is-sens, id-digriet tal‑5 ta’ Ottubru 2004, Alcon vs UASI, C‑192/03 P, EU:C:2004:587, punti 39 u 40, u s-sentenza tad‑29 ta’ Jannar 2020, Sky et, C‑371/18, EU:C:2020:45, punt 49). Konsegwentement, f’dan il-każ, għal dak li jirrigwarda r-regoli sostantivi, ir-riferimenti magħmula għall-Artikolu 59(1)(b) tar-Regolament 2017/1001 mill-Bord tal-Appell fid-deċiżjoni kkontestata u mill-partijiet fis-sottomissjonijiet bil-miktub tagħhom għandhom jinftiehmu bħala li jirreferu għall-Artikolu 52(1)(b) tar-Regolament Nru 207/2009, li għandu kontenut identiku.
17 Insostenn tar-rikors, ir-rikorrent jinvoka motiv wieħed, ibbażat fuq il-ksur tal-Artikolu 52(1)(b) tar-Regolament Nru 207/2009.
18 Ir-rikorrent isostni, essenzjalment, li l-Bord tal-Appell żbalja meta qies li huwa kien in mala fide meta ppreżenta l-applikazzjoni għal reġistrazzjoni tat-trade mark ikkontestata. Fil-fatt, minn naħa, l-intervenjenti ma wrewx li t-trade mark preċedenti Ċekoslovakka kienet għadha rreġistrata jew użata f’din id-data, b’tali mod li huma ma għandhom l-ebda dritt fuq is-sinjal u l-isem Nehera. Min-naħa l-oħra, l-intervenjenti lanqas ma stabbilixxew li Jan Nehera u t-trade mark preċedenti Ċekoslovakka kienu għadhom igawdu minn fama jew minn reputazzjoni residwa fl-imsemmija data. F’dawn iċ-ċirkustanzi, huwa ma jista’ jiġi akkużat b’ebda intenzjoni diżonesta jew prattika żleali.
19 L-EUIPO u l-intervenjenti jikkontestaw l-argument tar-rikorrent.
Kunsiderazzjonijiet preliminari
20 Għandu jitfakkar li, skont l-Artikolu 52(1)(b) tar-Regolament Nru 207/2009, l-invalidità tat-trade mark tal-Unjoni Ewropea tiġi ddikjarata wara li titressaq applikazzjoni quddiem l-EUIPO jew fuq kontrotalba f’azzjoni għal kontrafazzjoni, fil-każ fejn l-applikant kien in mala fide meta ppreżenta l-applikazzjoni għal reġistrazzjoni ta’ din it-trade mark.
21 F’dan ir-rigward, għandu jiġi nnotat li l-kunċett ta’ “mala fide”, imsemmi fl-Artikolu 52(1)(b) tar-Regolament Nru 207/2009, la huwa definit, la huwa delimitat u lanqas huwa deskritt b’xi mod fil-leġiżlazzjoni (ara s-sentenza tad‑29 ta’ Ġunju 2017, Cipriani vs EUIPO – Hotel Cipriani (CIPRIANI), T‑343/14, EU:T:2017:458, punt 25 u l-ġurisprudenza ċċitata).
22 Madankollu, għandu jiġi osservat li l-Qorti tal-Ġustizzja u l-Qorti Ġenerali għamlu diversi preċiżazzjonijiet dwar il-mod kif għandu jiġi interpretat il-kunċett ta’ mala fide kif imsemmi fl-Artikolu 52(1)(b) tar-Regolament Nru 207/2009 u kif għandha tiġi evalwata l-eżistenza ta’ din tal-aħħar.
23 Fl-ewwel lok, konformement mas-sens abitwali tiegħu fil-lingwaġġ ta’ kuljum, il-kunċett ta’ mala fide jippreżupponi l-preżenza ta’ stat tal-moħħ jew ta’ intenzjoni diżonesta (sentenzi tat‑12 ta’ Settembru 2019, Koton Mağazacilik Tekstil Sanayi ve Ticaret vs EUIPO, C‑104/18 P, EU:C:2019:724, punt 45, u tad‑29 ta’ Jannar 2020, Sky et, C‑371/18, EU:C:2020:45, punt 74).
24 Il-kunċett ta’ mala fide għandu barra minn hekk jinftiehem fil-kuntest tad-dritt tat-trade marks, li huwa dak tal-kummerċ. F’dan ir-rigward, ir-regoli dwar it-trade mark tal-Unjoni Ewropea huma intiżi, b’mod partikolari, li jikkontribwixxu għas-sistema ta’ kompetizzjoni mhux distorta fl-Unjoni Ewropea, li fiha kull impriża għandha, sabiex tattira il-klijentela permezz tal-kwalità tal-prodotti jew tas-servizzi tagħha, tkun fil-pożizzjoni li tirreġistra bħala trade marks sinjali li jippermettu lill-konsumatur jagħmel distinzjoni mingħajr konfużjoni possibbli bejn dawn il-prodotti jew dawn is-servizzi u dawk li għandhom provenjenza oħra (sentenzi tat‑12 ta’ Settembru 2019, Koton Mağazacilik Tekstil Sanayi ve Ticaret vs EUIPO, C‑104/18 P, EU:C:2019:724, punt 45, u tad‑29 ta’ Jannar 2020, Sky et, C‑371/18, EU:C:2020:45, punt 74).
25 Konsegwentement, ir-raġuni assoluta ta’ invalidità prevista fl-Artikolu 52(1)(b) tar-Regolament Nru 207/2009 tapplika meta minn indizji rilevanti u konkordanti jirriżulta li l-proprjetarju ta’ trade mark tal-Unjoni Ewropea ppreżenta l-applikazzjoni għar-reġistrazzjoni ta’ din it-trade mark mhux bil-għan li jipparteċipa b’mod leali fil-kompetizzjoni iżda bl-intenzjoni li jippreġudika, b’mod li ma jkunx konformi mal-użanzi onesti, l-interessi ta’ terzi, jew bl-intenzjoni li jikseb, mingħajr ma jimmira lejn terzi b’mod partikolari, dritt esklużiv għal skopijiet differenti minn dawk li jaqgħu taħt il-funzjonijiet ta’ trade mark, b’mod partikolari l-funzjoni essenzjali ta’ indikazzjoni ta’ oriġini mfakkra fil-punt 24 iktar ’il fuq (sentenzi tat‑12 ta’ Settembru 2019, Koton Mağazacilik Tekstil Sanayi ve Ticaret vs EUIPO, C‑104/18 P, EU:C:2019:724, punt 46, u tad‑29 ta’ Jannar 2020, Sky et, C‑371/18, EU:C:2020:45, punt 75).
26 Fit-tieni lok, l-intenzjoni tal-applikant ta’ trade mark hija element suġġettiv li għandu madankollu jiġi ddeterminat b’mod oġġettiv mill-awtoritajiet amministrattivi u ġudizzjarji kompetenti. Għaldaqstant, kwalunkwe allegazzjoni ta’ mala fide għandha tiġi evalwata globalment, billi jittieħdu inkunsiderazzjoni ċ-ċirkustanzi fattwali rilevanti kollha tal-każ inkwistjoni. Huwa biss b’dan il-mod li l-allegazzjoni ta’ mala fide tista’ tiġi evalwata oġġettivament (sentenza tat‑12 ta’ Settembru 2019, Koton Mağazacilik Tekstil Sanayi ve Ticaret vs EUIPO, C‑104/18 P, EU:C:2019:724, punt 47 u l-ġurisprudenza ċċitata).
27 Għal dan il-għan, għandhom b’mod partikolari jittieħdu inkunsiderazzjoni, l-ewwel, il-fatt li l-applikant jaf jew għandu jkun jaf li terz juża, tal-inqas fi Stat Membru wieħed, sinjal identiku jew simili għal prodott jew servizz identiku jew simili, li jista’ jwassal għal konfużjoni mas-sinjal li għalih qed issir applikazzjoni għal reġistrazzjoni, it-tieni, l-intenzjoni tal-applikant li jipprekludi lil dan it-terz milli jkompli juża tali sinjal kif ukoll, it-tielet, il-livell ta’ protezzjoni legali li jgawdu minnha s-sinjal tat-terz u s-sinjal li għalih qed issir applikazzjoni għal reġistrazzjoni (sentenza tal‑11 ta’ Ġunju 2009, Chocoladefabriken Lindt & Sprüngli, C‑529/07, EU:C:2009:361, punt 53).
28 Madankollu, il-fatturi elenkati fil-punt 27 iktar ’il fuq huma biss eżempji fost ġabra ta’ elementi li jistgħu jittieħdu inkunsiderazzjoni bil-għan li tingħata deċiżjoni dwar l-eventwali mala fide ta’ applikant għal reġistrazzjoni fil-mument tal-preżentata tal-applikazzjoni għal trade mark (ara, f’dan is-sens, is-sentenza tad‑29 ta’ Ġunju 2017, CIPRIANI, T‑343/14, EU:T:2017:458, punt 28 u l-ġurisprudenza ċċitata).
29 Għalhekk, jistgħu jeżistu każijiet fejn l-applikazzjoni għal reġistrazzjoni ta’ trade mark tista’ titqies li ġiet ippreżentata b’mala fide minkejja l-assenza ta’ probabbiltà ta’ konfużjoni bejn is-sinjal użat minn terz u t-trade mark ikkontestata jew l-assenza ta’ użu, minn terz, ta’ sinjal identiku jew simili għat-trade mark ikkontestata. Fil-fatt, ċirkustanzi fattwali oħra jistgħu, jekk ikun il-każ, jikkostitwixxu indizji rilevanti u konkordanti li jistabbilixxu l-mala fide tal-applikant (ara, f’dan is-sens, is-sentenza tat‑12 ta’ Settembru 2019, Koton Mağazacilik Tekstil Sanayi ve Ticaret vs EUIPO, C‑104/18 P, EU:C:2019:724, punti 52 sa 56).
30 Għalhekk, għandu jitqies li, fil-kuntest tal-analiżi globali mwettqa skont l-Artikolu 52(1)(b) tar-Regolament Nru 207/2009, jistgħu wkoll jittieħdu inkunsiderazzjoni l-oriġini tas-sinjal ikkontestat u l-użu tiegħu sa mill-ħolqien tiegħu, il-loġika kummerċjali li ntużat għall-preżentata tal-applikazzjoni għar-reġistrazzjoni tas-sinjal bħala trade mark tal-Unjoni Ewropea kif ukoll il-kronoloġija tal-avvenimenti li wasslu għall-imsemmija preżentata (ara s-sentenza tas‑7 ta’ Lulju 2016, Copernicus-Trademarks vs EUIPO – Maquet (LUCEO), T‑82/14, EU:T:2016:396, punt 32 u l-ġurisprudenza ċċitata).
31 Bl-istess mod, huwa possibbli li jittieħed inkunsiderazzjoni l-livell ta’ reputazzjoni li jgawdi minnha s-sinjal inkwistjoni fil-mument meta saret l-applikazzjoni għar-reġistrazzjoni tiegħu (ara, f’dan is-sens, is-sentenza tal‑11 ta’ Ġunju 2009, Chocoladefabriken Lindt & Sprüngli, C‑529/07, EU:C:2009:361, punt 51), b’mod partikolari meta dan is-sinjal ikun ġie preċedentement irreġistrat jew użat minn terz bħala trade mark (ara, f’dan is-sens, is-sentenza tat‑8 ta’ Mejju 2014, Simca Europe vs UASI – PSA Peugeot Citroën (Simca), T‑327/12, EU:T:2014:240, punt 40).
32 Fil-fatt, il-fatt li l-użu ta’ sinjal li għalih saret l-applikazzjoni għal reġistrazzjoni jippermetti lill-applikant jieħu vantaġġ inġust mir-reputazzjoni ta’ trade mark jew ta’ sinjal preċedenti jew ukoll mill-isem ta’ persuna famuża huwa ta’ natura li jistabbilixxi l-mala fide tal-applikant (ara, f’dan is-sens, is-sentenzi tat‑8 ta’ Mejju 2014, Simca, T‑327/12, EU:T:2014:240, u tal‑14 ta’ Mejju 2019, Moreira vs EUIPO – Da Silva Santos Júnior (NEYMAR), T‑795/17, mhux ippubblikata, EU:T:2019:329).
33 Fit-tielet lok, meta l-mala fide tal-applikant għal trade mark tkun ibbażata fuq l-intenzjoni tiegħu li jieħu vantaġġ inġust mir-reputazzjoni ta’ sinjal jew ta’ isem preċedenti, il-pubbliku rilevanti sabiex tiġi evalwata l-eżistenza ta’ din ir-reputazzjoni u tal-vantaġġ indebitu miksub mill-imsemmija reputazzjoni huwa dak kopert mit-trade mark ikkontestata, jiġifieri l-konsumatur medju tal-prodotti li għalihom din ġiet irreġistrata (ara, b’analoġija, is-sentenza tas‑27 ta’ Novembru 2008, Intel Corporation, C‑252/07, EU:C:2008:655, punt 36).
34 Fir-raba’ u l-aħħar lok, għandu jitfakkar li huwa l-applikant għal dikjarazzjoni ta’ invalidità li għandu jistabbilixxi ċ-ċirkustanzi li jippermettu li jiġi konkluż li l-proprjetarju ta’ trade mark tal-Unjoni Ewropea kien in mala fide meta ppreżenta l-applikazzjoni għal reġistrazzjoni ta’ din tal-aħħar (ara s-sentenza tat‑8 ta’ Mejju 2014, Simca, T‑327/12, EU:T:2014:240, punt 35 u l-ġurisprudenza ċċitata), peress li l-bona fide hija preżunta sakemm tingħata prova kuntrarja (sentenza tat‑13 ta’ Diċembru 2012, pelicantravel.com vs UASI – Pelikan (Pelikan), T‑136/11, mhux ippubblikata, EU:T:2012:689, punt 57).
35 Huwa fid-dawl tal-kunsiderazzjonijiet preliminari li għandha tiġi mistħarrġa l-legalità tad-deċiżjoni kkontestata sa fejn il-Bord tal-Appell ikkonkluda li r-rikorrent kien in mala fide meta ppreżenta l-applikazzjoni għar-reġistrazzjoni tat-trade mark ikkontestata.
Eżistenza tal‑mala fide tar‑rikorrent
36 Mill-punti 35 u 37 tad-deċiżjoni kkontestata jirriżulta li, sabiex jikkonkludi li r-rikorrent kien in mala fide, il-Bord tal-Appell ibbaża ruħu fuq il-fatt li, meta talab ir-reġistrazzjoni tat-trade mark ikkontestata, ir-rikorrent fir-realtà ried juża b’mod parassitiku r-reputazzjoni ta’ Jan Nehera u tat-trade mark preċedenti Ċekoslovakka u b’hekk jikseb vantaġġ indebitu minn din ir-reputazzjoni. Għalhekk, hija l-intenzjoni li jiġi adottat aġir ta’ parassitiżmu (free-riding) fir-rigward tal-imsemmija reputazzjoni li fuqha hija bbażata l-konklużjoni tal-Bord tal-Appell.
37 F’dan il-kuntest, fost il-fatturi differenti li jistgħu jittieħdu inkunsiderazzjoni sabiex tiġi evalwata globalment il-bona fide jew il-mala fide tar-rikorrent, huwa partikolarment rilevanti li jiġi eżaminat, minbarra l-kuntest fattwali u storiku tat-tilwima, il-livell ta’ protezzjoni legali, ta’ użu effettiv u ta’ reputazzjoni kemm tat-trade mark preċedenti Ċekoslovakka kif ukoll tal-isem ta’ Jan Nehera kif ukoll il-livell ta’ għarfien ta’ dawn l-elementi mir-rikorrent.
38 Barra minn hekk, fid-dawl tal-ġurisprudenza ċċitata fil-punt 33 iktar ’il fuq, il-pubbliku rilevanti f’dan il-każ sabiex tiġi evalwata l-eżistenza tar-reputazzjoni tat-trade mark preċedenti Ċekoslovakka u tal-isem ta’ Jan Nehera kif ukoll ta’ vantaġġ indebitu miksub minn din ir-reputazzjoni huwa kompost minn konsumaturi medji tal-prodotti msemmija fil-punt 4 iktar ’il fuq, jiġifieri l-pubbliku ġenerali tal-Unjoni.
– Il‑kuntest fattwali u storiku
39 Huwa paċifiku li Jan Nehera, imwieled fl‑1899 f’Kostelec na Hané (illum fir-Repubblika Ċeka), kien imprenditur fis-settur tal-moda, attiv fiċ-Ċekoslovakkja fis-snin 20, 30 u 40. B’mod partikolari, fil-bidu tas-snin 30, huwa ħoloq fi Prostějov (illum fir-Repubblika Ċeka) impriża li l-isem kummerċjali tagħha jirreferi għal kunjomu u li kienet timmanifattura u tikkummerċjalizza ħwejjeġ lesti biex jintlibsu għan-nisa, għall-irġiel u għat-tfal kif ukoll aċċessorji. Bis-saħħa tal-metodi moderni ta’ tmexxija u ta’ użu intensiv tar-reklamar, din l-impriża kellha ċertu suċċess fiċ-Ċekoslovakkja u barra mill-pajjiż. Ftit qabel it-Tieni Gwerra Dinjija, hija kienet timpjega kważi 1 000 impjegat u kellha network ta’ iktar minn 130 ħanut tal-bejgħ bl-imnut fl-Ewropa, fl-Istati Uniti u fl-Afrika. L-imsemmija impriża kompliet l-attività tagħha matul it-Tieni Gwerra Dinjija, taħt il-kontroll effettiv ta’ ċittadin Ġermaniż wara “amalgamazzjoni” imposta fuq Jan Nehera. Fl‑1 ta’ Jannar 1946, hija ġiet nazzjonalizzata u l-proprjetà ġiet ittrasferita lill-Istat Ċekoslovakk. Sussegwentement, hija kompliet l-attività tagħha taħt isem imprenditorjali ġdid li ma għamilx iktar riferiment għall-kunjom tal-fundatur tagħha. Dak iż-żmien, Jan Nehera kien diġà telaq miċ-Ċekoslovakkja u kien stabbilixxa ruħu fil-Marokk, pajjiż fejn kompla jopera żewġ ħwienet tal-ħwejjeġ u fejn miet fl‑1958.
40 Huwa paċifiku wkoll li, permezz tal-impriża tiegħu, Jan Nehera ppreżenta fiċ-Ċekoslovakkja trade mark identika għat-trade mark ikkontestata, jiġifieri t-trade mark preċedenti Ċekoslovakka (ara l-punt 7 iktar ’il fuq). Din it-trade mark ġiet irreġistrata f’Ġunju 1936 bin-numru 6414 fir-reġistru Ċekoslovakk tal-kmamar tal-kummerċ, li silta minnu hija prodotta mill-intervenjenti. Jan Nehera uża l-imsemmija trade mark fis-snin 30 u 40 sabiex jikkummerċjalizza, fiċ-Ċekoslovakkja u barra mill-pajjiż, il-prodotti mmanifatturati mill-impriża tiegħu. Huwa uża wkoll din it-trade mark fil-ħwienet tal-ħwejjeġ Marokkini tiegħu sa mis-snin 50.
41 Min-naħa tiegħu, ir-rikorrent huwa imprenditur Slovakk, attiv fil-qasam tar-reklamar u tal-kummerċjalizzazzjoni. Huwa ma għandu l-ebda relazzjoni ta’ parentela ma’ Jan Nehera u mal-familja ta’ dan tal-aħħar. Fl‑2006, huwa talab u kiseb fir-Repubblika Ċeka r-reġistrazzjoni ta’ trade mark nazzjonali identika għat-trade mark preċedenti Ċekoslovakka u għat-trade mark ikkontestata; din it-trade mark Ċeka skadiet fl‑2016. Fis‑6 ta’ Mejju 2013, huwa talab ir-reġistrazzjoni tat-trade mark ikkontestata, bħala trade mark tal-Unjoni Ewropea; din it-trade mark ġiet irreġistrata fil‑31 ta’ Ottubru 2014 (ara l-punti 2, 3 u 6 iktar ’il fuq). Fl‑2014, huwa beda jippreżenta kollezzjonijiet ta’ ħwejjeġ għan-nisa f’wirjiet tal-moda u jikkummerċjalizzahom bl-użu tat-trade mark ikkontestata.
– Protezzjoni ġuridika tat‑trade mark preċedenti Ċekoslovakka u tal‑isem ta’ Jan Nehera
42 Mill-proċess ma jirriżultax – u barra minn hekk ma huwa allegat minn ebda waħda mill-partijiet – li t-trade mark preċedenti Ċekoslovakka kienet għadha rreġistrata f’isem terz fid-data tal-preżentata tal-applikazzjoni għar-reġistrazzjoni tat-trade mark ikkontestata. Għall-kuntrarju, minn naħa, l-EUIPO jirrikonoxxi li t-trade mark preċedenti Ċekoslovakka ma baqgħatx tintuża fl‑1946. Fil-fatt, mill-estratt tar-reġistru Ċekoslovakk tal-kmamar tal-kummerċ prodott mill-intervenjenti jirriżulta li din it-trade mark tħassret f’Ġunju 1946. Min-naħa l-oħra, huwa paċifiku li, għalkemm trade mark nazzjonali identika għat-trade mark preċedenti Ċekoslovakka ġiet irreġistrata f’isem terz fir-Repubblika Ċeka bejn l‑1992 u l‑2002, din it-trade mark kienet skadiet qabel il-preżentata tal-applikazzjoni għar-reġistrazzjoni tat-trade mark ikkontestata.
43 Lanqas ma ġie stabbilit jew allegat li l-isem ta’ Jan Nehera kien igawdi minn protezzjoni legali speċifika fid-data tal-preżentata tal-applikazzjoni għar-reġistrazzjoni tat-trade mark ikkontestata.
– Użu tat‑trade mark preċedenti Ċekoslovakka u tal‑isem ta’ Jan Nehera
44 Lanqas ma jirriżulta mill-proċess – u barra minn hekk ma huwa allegat minn ebda waħda mill-partijiet – li t-trade mark preċedenti Ċekoslovakka jew l-isem ta’ Jan Nehera kienu għadhom jintużaw minn terz sabiex jikkummerċjalizza ħwejjeġ fid-data tal-preżentata tal-applikazzjoni għar-reġistrazzjoni tat-trade mark ikkontestata. Fil-fatt, minn naħa, l-EUIPO jirrikonoxxi li, bl-eċċezzjoni ta’ ċertu użu fil-Marokk fis-snin 50 minn Jan Nehera, din it-trade mark ma ntużatx iktar wara l‑1946. L-intervenjenti lanqas ma jinvokaw xi użu tal-imsemmija trade mark, kemm jekk fl-Ewropa wara n-nazzjonalizzazzjoni tal-impriża ta’ Jan Nehera fl‑1946 jew fil-Marokk wara l-mewt ta’ dan tal-aħħar fl‑1958. Min-naħa l-oħra, ma jidhirx li t-terz li huwa l-proprjetarju ta’ trade mark nazzjonali identika għat-trade mark preċedenti Ċekoslovakka u rreġistrata fir-Repubblika Ċeka bejn l‑1992 u l‑2002 qatt użaha.
– Reputazzjoni tat‑trade mark preċedenti Ċekoslovakka u tal‑isem ta’ Jan Nehera
45 Kuntrarjament għad-Diviżjoni tal-Kanċellazzjoni, il-Bord tal-Appell qies, fil-punti 33 u 34 tad-deċiżjoni kkontestata, minn naħa, li Jan Nehera kien “famuż” u, min-naħa l-oħra, li t-trade mark preċedenti Ċekoslovakka kienet għadha tgawdi, tal-inqas, minn “ċerta reputazzjoni residwa” u għalhekk kellha “valur storiku” fid-data tal-preżentata tal-applikazzjoni għar-reġistrazzjoni tat-trade mark ikkontestata.
46 Il-partijiet jaqblu fuq il-fatt li t-trade mark preċedenti Ċekoslovakka u l-isem ta’ Jan Nehera kienu jgawdu, tal-inqas, minn ċerta reputazzjoni jew minn ċerta fama fiċ-Ċekoslovakkja fis-snin 30 u 40. Min-naħa l-oħra, dawn ma jaqblux fuq il-kwistjoni dwar jekk din ir-reputazzjoni jew din il-fama kinitx għadha tippersisti fid-data tal-preżentata tal-applikazzjoni għar-reġistrazzjoni tat-trade mark ikkontestata.
47 Fil-fatt, ir-rikorrent huwa tal-opinjoni li Jan Nehera u t-trade mark preċedenti Ċekoslovakka llum huma totalment minsija. L-EUIPO jammetti wkoll li mal-ewwel daqqa ta’ għajn ma jidher li hemm ebda prova li dawn għad għandhom reputazzjoni residwa fir-Repubblika Ċeka jew fis-Slovakkja. Huma biss l-intervenjenti li jsostnu li fl‑2013 kien għad għadhom reputazzjoni f’dawn iż-żewġ Stati Membri.
48 F’dan ir-rigward, għandu jiġi kkonstatat, qabelxejn, li, sabiex tiġi stabbilita l-persistenza ta’ din ir-reputazzjoni, l-intervenjenti sempliċement, quddiem il-Qorti Ġenerali, jirreferu għal żewġ provi, jiġifieri, minn naħa, artikolu tal-enċiklopedija Wikipedia ddedikata għal Jan Nehera u, min-naħa l-oħra, dissertazzjoni universitarja ta’ studenta Ċeka dwar in-nazzjonalizzazzjoni tal-impriża ta’ Jan Nehera u l-istorja ta’ din l-impriża matul il-perijodu 1945‑1948. L-intervenjenti jinvokaw b’mod partikolari silta minn din id-dissertazzjoni universitarja li tgħid li “[l]-isem ta’ Jan Nehera huwa mfakkar bħala wieħed mill-ikbar imprendituri Ċekoslovakki fis-settur tal-ħwejjeġ tal-ewwel Repubblika [Ċekoslovakka]”.
49 Issa, għalkemm iż-żewġ provi invokati mill-intervenjenti jinkludu informazzjoni dwar l-istorja ta’ Jan Nehera u tal-impriża tiegħu fis-snin 30 u 40, huma ma jipprovdu ebda informazzjoni ddettaljata li tista’ tistabbilixxi li Jan Nehera jew it-trade mark preċedenti Ċekoslovakka kienu għadhom magħrufa fl‑2013 minn parti sinjifikattiva tal-pubbliku rilevanti. Barra minn hekk, l-EUIPO stess iqis li dawn iż-żewġ provi ma humiex probatorji.
50 Sussegwentement, ir-rikorrent ġustament josserva li l-provi l-oħra prodotti mill-intervenjenti quddiem l-EUIPO lanqas ma jistgħu jistabbilixxu l-persistenza tar-reputazzjoni ta’ Jan Nehera jew tat-trade mark preċedenti Ċekoslovakka. L-intervenjenti kienu inkludew fil-fajl tal-EUIPO, pereżempju, l-ewwel, ritratt meħud fil-Marokk fis-snin 50 u li juri ħanut li kellu t-trade mark preċedenti Ċekoslovakka, it-tieni, fuljett kommemorattiv ippubblikat fl‑2000 mill-impriża Slovakka Ozeta fl-okkażjoni tal-għeluq tas-sittin sena tagħha u li jsemmi l-ftuħ fl‑1940 ta’ fabbrika f’Trenčín (illum fis-Slovakkja) mill-impriża ta’ Jan Nehera jew ukoll, it-tielet, diversi artikli tal-istampa u dokumenti oħra relatati mal-attività tar-rikorrent. Issa, dawn id-diversi provi ma jinkludu ebda informazzjoni li tistabbilixxi għarfien attwali ta’ Jan Nehera jew tat-trade mark preċedenti Ċekoslovakka mill-pubbliku rilevanti fid-data tal-preżentata tal-applikazzjoni għar-reġistrazzjoni tat-trade mark ikkontestata.
51 B’mod partikolari, ir-rikorrent jiġbed l-attenzjoni tal-Qorti Ġenerali għall-intervista ma’ disinjatur tal-moda prodotta mill-intervenjenti. F’din l-intervista mogħtija fl‑2015, jiġifieri ħafna qabel il-preżentata tat-talba għal dikjarazzjoni ta’ invalidità kontra t-trade mark ikkontestata u, konsegwentement, mingħajr ebda rabta magħha, Samuel Drira, kofondatur u editur ewlieni ta’ rivista tal-moda Franċiża, spjega li huwa kien ġie informat bl-eżistenza tat-trade mark Nehera biss jum qabel ma wasal fi Bratislava u qabel ma ltaqa’ mar-rikorrent, li kien ipproponilu li jsir id-direttur kreattiv fi ħdan l-impriża tiegħu. B’hekk, jidher li anki speċjalist tas-settur tal-moda rreklutat mir-rikorrent sabiex jibda l-attività tiegħu ta’ fabrikazzjoni ta’ ħwejjeġ għan-nisa ma kienx assolutament jaf bl-eżistenza tat-trade mark preċedenti Ċekoslovakka.
52 Fl-aħħar nett, għandu jiġi osservat li għaddew kważi seba’ deċennji bejn l‑1946, is-sena li matulha t-trade mark preċedenti Ċekoslovakka waqfet tintuża fl-Ewropa, u l‑2013, is-sena li matulha r-rikorrent applika għar-reġistrazzjoni tat-trade mark ikkontestata.
53 F’dawn iċ-ċirkustanzi, l-intervenjenti ma pproduċewx il-prova, li huma għandhom jipproduċu skont il-ġurisprudenza mfakkra fil-punt 34 iktar ’il fuq, li, fl‑2013, it-trade mark preċedenti Ċekoslovakka kienet għadha tgawdi minn ċerta reputazzjoni fir-Repubblika Ċeka, fis-Slovakkja jew fi Stati Membri oħra jew li l-isem ta’ Jan Nehera kien għadu famuż ma’ parti sinjifikattiva tal-pubbliku rilevanti. Minn dan isegwi li l-Bord tal-Appell wettaq żball meta qies li din it-trade mark kienet żammet “ċerta reputazzjoni residwa” u li dan l-isem kien għadu famuż fil-mument tal-preżentata tal-applikazzjoni għar-reġistrazzjoni tat-trade mark ikkontestata.
– Għarfien mir‑rikorrent tal‑eżistenza u tar‑reputazzjoni preċedenti tat‑trade mark preċedenti Ċekoslovakka u tal‑isem ta’ Jan Nehera
54 Huwa paċifiku li, kif ikkonstata l-Bord tal-Appell fil-punt 29 tad-deċiżjoni kkontestata, ir-rikorrent kellu għarfien tal-eżistenza u tar-reputazzjoni preċedenti ta’ Jan Nehera u tat-trade mark preċedenti Ċekoslovakka fil-mument meta ppreżenta l-applikazzjoni għar-reġistrazzjoni tat-trade mark ikkontestata.
55 Fil-fatt, mill-proċess, u b’mod partikolari mill-ispjegazzjonijiet tar-rikorrent li jinsabu fir-rikors kif ukoll f’posta elettronika mibgħuta minnu lis-Sinjura Sehnal fis‑16 ta’ Frar 2016, jirriżulta li huwa kien qiegħed ifittex trade mark antika, mhux użata u minsija, li huwa seta’ juża sabiex iniedi l-attività tiegħu ta’ fabrikazzjoni ta’ ħwejjeġ għan-nisa. Wara li kkunsidra diversi ismijiet, huwa ddeċieda li juża t-trade mark Nehera Praguea, u sussegwentement it-trade mark preċedenti Ċekoslovakka, sabiex “jagħti omaġġ” liż-“żmien tad-deheb tal-industrija tessili Ċekoslovakka tas-snin 30” u b’mod partikolari lil Jan Nehera, li huwa kien iqis bħala “figura kbira” u “simbolu” ta’ dan il-“perijodu mbierek” għas-settur tal-ħwejjeġ Ċekoslovakka.
– Evalwazzjoni globali
56 Mill-punti 42 sa 53 iktar ’il fuq jirriżulta li, fid-data tal-preżentata tal-applikazzjoni għar-reġistrazzjoni tat-trade mark ikkontestata, it-trade mark preċedenti Ċekoslovakka u l-isem ta’ Jan Nehera ma kinux għadhom la rreġistrati jew protetti, la użati minn terz sabiex jiġu kkummerċjalizzati ħwejjeġ, u lanqas kellhom reputazzjoni mal-pubbliku rilevanti.
57 Issa, aġir ta’ parassitiżmu fir-rigward tar-reputazzjoni ta’ sinjal jew ta’ isem, bħal dak invokat mill-Bord tal-Appell fid-deċiżjoni kkontestata sabiex jiġġustifika l-konstatazzjoni ta’ mala fide tar-rikorrent, huwa, bħala prinċipju, possibbli biss jekk dan is-sinjal jew dan l-isem ikollu effettivament u attwalment ċerta reputazzjoni jew ċerta fama (ara, b’analoġija, is-sentenza tat‑3 ta’ Settembru 2015, Iron & Smith, C‑125/14, EU:C:2015:539, punt 29).
58 B’hekk, il-qorti tal-Unjoni diġà kkonstatat, fir-rigward ta’ persuna li titlob ir-reġistrazzjoni ta’ trade mark tal-Unjoni Ewropea, intenzjoni li jittieħed vantaġġ inġust mir-reputazzjoni residwa ta’ trade mark preċedenti, inkluż meta din ma kinitx għadha użata (sentenza tat‑8 ta’ Mejju 2014, Simca, T‑327/12, EU:T:2014:240), jew dwar il-fama attwali tal-isem ta’ persuna fiżika (sentenza tal‑14 ta’ Mejju 2019, NEYMAR, T‑795/17, mhux ippubblikata, EU:T:2019:329), f’każijiet fejn din ir-reputazzjoni residwa jew din il-fama kienet ġiet debitament stabbilita. Min-naħa l-oħra, hija kkonstatat l-assenza ta’ użu ħażin tar-reputazzjoni ta’ terminu invokat minn terz u, għaldaqstant, l-assenza ta’ mala fide tal-applikant għal trade mark meta dan it-terminu la kien irreġistrat, la kien jintuża u lanqas kellu reputazzjoni fl-Unjoni (ara, f’dan is-sens, is-sentenza tad‑29 ta’ Novembru 2018, Khadi and Village Industries Commission vs EUIPO – BNP Best Natural Products (Khadi Ayurveda), T‑683/17, mhux ippubblikata, EU:T:2018:860, punti 68 sa 71).
59 F’dawn iċ-ċirkustanzi, fl-assenza ta’ reputazzjoni residwa tat-trade mark preċedenti Ċekoslovakka u tal-fama attwali tal-isem ta’ Jan Nehera fil-mument tal-preżentata tal-applikazzjoni għar-reġistrazzjoni tat-trade mark ikkontestata, l-użu sussegwenti mir-rikorrent ta’ din l-aħħar trade mark ma setax, bħala prinċipju, jikkostitwixxi aġir ta’ parassitiżmu li juri l-mala fide tar-rikorrent.
60 Din il-konklużjoni ma hijiex ikkontestata mill-fatt li r-rikorrent kien jaf bl-eżistenza u bir-reputazzjoni preċedenti ta’ Jan Nehera u tat-trade mark preċedenti Ċekoslovakka (ara l-punti 54 u 55 iktar ’il fuq). Fil-fatt, is-sempliċi fatt li l-applikant għal trade mark jaf jew għandu jkun jaf li terz uża, fil-passat, trade mark identika jew simili għat-trade mark li għaliha saret l-applikazzjoni ma huwiex biżżejjed sabiex tiġi stabbilita l-eżistenza tal-mala fide ta’ dan l-applikant (ara, f’dan is-sens u b’analoġija, is-sentenzi tas‑27 ta’ Ġunju 2013, Malaysia Dairy Industries, C‑320/12, EU:C:2013:435, punti 36 u 37 u l-ġurisprudenza ċċitata, u tad‑29 ta’ Novembru 2018, Khadi Ayurveda, T‑683/17, mhux ippubblikata, EU:T:2018:860, punt 69).
61 Madankollu, għad hemm lok li jiġu eżaminati l-argumenti l-oħra tal-EUIPO u tal-intervenjenti, intiżi, essenzjalment, sabiex tiġi stabbilita l-intenzjoni ta’ parassitiżmu u l-mala fide tar-rikorrent indipendentement mill-eżistenza ta’ reputazzjoni residwa tat-trade mark preċedenti Ċekoslovakka u mill-isem ta’ Jan Nehera.
62 Fl-ewwel lok, l-EUIPO, sostnut mill-intervenjenti, jikkritika, essenzjalment, lir-rikorrent talli pprova joħloq assoċjazzjoni bejn l-attività tiegħu, minn naħa, u t-trade mark preċedenti Ċekoslovakka u Jan Nehera, min-naħa l-oħra. Skont l-EUIPO, ir-rikorrent kiseb vantaġġ fis-suq billi bena l-immaġni tal-impriża tiegħu fuq rabta espliċita ma’ trade mark li qabel kellha reputazzjoni u ma’ imprenditur li qabel kien famuż.
63 F’dan ir-rigward, huwa ċertament minnu li, kif osserva essenzjalment il-Bord tal-Appell fil-punt 35 tad-deċiżjoni kkontestata, ir-rikorrent stabbilixxa rabta bejn l-impriża tiegħu u t-trade mark preċedenti Ċekoslovakka. Fil-fatt, huwa paċifiku li, diversi drabi, huwa rrefera għal din it-trade mark u għal Jan Nehera fil-kuntest tal-istrateġija ta’ komunikazzjoni u ta’ kummerċjalizzazzjoni tal-impriża tiegħu. Għalhekk, diversi annessi tal-proċess, bħal, pereżempju, is-sit internet tal-impriża tar-rikorrent, il-paġna ta’ din l-impriża fuq in-network soċjali Facebook u diversi artikli tal-istampa jirreferu għall-fatt li l-imsemmija impriża “reġgħet niedet” u “tat ħajja ġdida” lit-trade mark preċedenti Nehera, maħluqa minn Jan Nehera fis-snin 30.
64 Madankollu, għandu jitfakkar li, skont il-ġurisprudenza, l-eżistenza ta’ rabta f’moħħ il-pubbliku rilevanti bejn trade mark sussegwenti u sinjal jew isem preċedenti ma hijiex biżżejjed, waħedha, sabiex jiġi konkluż li jeżisti vantaġġ indebitu miksub mir-reputazzjoni tas-sinjal jew tal-isem preċedenti (ara, f’dan is-sens u b’analoġija, is-sentenzi tas‑27 ta’ Novembru 2008, Intel Corporation, C‑252/07, EU:C:2008:655, punt 32, u tat‑3 ta’ Settembru 2015, Iron & Smith, C‑125/14, EU:C:2015:539, punt 31).
65 Barra minn hekk, għandu jiġi osservat li l-kunċett ta’ vantaġġ indebitu miksub mir-reputazzjoni ta’ sinjal jew ta’ isem ikopri l-ipoteżi li fiha terz japprofitta minn sinjal jew minn isem preċedenti li kellu reputazzjoni sabiex jibbenefika mis-setgħa ta’ attrazzjoni tiegħu, mir-reputazzjoni tiegħu u mill-prestiġju tiegħu u juża, mingħajr ebda kumpens finanzjarju u mingħajr ma jkollu juża r-riżorsi tiegħu stess għal dan il-għan, l-isforz kummerċjali li wettaq il-proprjetarju jew l-utent ta’ dan is-sinjal jew ta’ dan l-isem (ara, f’dan is-sens u b’analoġija, is-sentenza tat‑18 ta’ Ġunju 2009, L’Oréal et, C‑487/07, EU:C:2009:378, punt 49).
66 Issa, f’dan il-każ, ir-rikorrent isostni, mingħajr ma ġie kontradett mill-EUIPO u mill-intervenjenti, li t-trade mark preċedenti Ċekoslovakka u l-isem ta’ Jan Nehera kienu totalment minsija mill-pubbliku rilevanti fl‑2013 u li huwa stess iddedika ħafna riżorsi, ħin u flus sabiex jagħti ħajja ġdida lit-trade mark Nehera u sabiex l-istorja ta’ Jan Nehera u tal-impriża tiegħu ssir magħrufa. Minn dan isegwi li, mhux talli ma llimitax ruħu li juża b’mod parassitiku r-reputazzjoni preċedenti tat-trade mark preċedenti Ċekoslovakka u tal-isem ta’ Jan Nehera, iżda r-rikorrent għamel sforz kummerċjali proprju sabiex jagħti ħajja ġdida lill-immaġni ta’ din it-trade mark u b’hekk jirrestawra, bi spejjeż tiegħu, l-imsemmija reputazzjoni. F’dawn iċ-ċirkustanzi, is-sempliċi fatt li għamel riferiment, għall-finijiet tal-promozzjoni tat-trade mark ikkontestata, għall-immaġni storika ta’ Jan Nehera u tat-trade mark preċedenti Ċekoslovakka ma jidhirx li jmur kontra l-prattiki onesti fil-qasam industrijali jew kummerċjali.
67 Fit-tieni lok, l-EUIPO u l-intervenjenti jsostnu li r-rikorrent fittex li jqarraq bil-pubbliku billi tah x’jifhem li huwa kien il-kontinwatur u s-suċċessur leġittimu ta’ Jan Nehera. B’mod partikolari, l-intervenjenti jikkritikaw lir-rikorrent li ried joħloq “illużjoni ta’ kontinwità” u “relazzjoni falza ta’ wirt” bejn l-impriża tiegħu u dik ta’ Jan Nehera. L-intervenjenti jsemmu wkoll l-Artikolu 7(1)(g) tar-Regolament 2017/1001, li jipprevedi li ma jistgħux jiġu rreġistrati trade marks li huma ta’ natura li tqarraq bil-pubbliku, pereżempju fir-rigward tax-xorta, tal-kwalità jew l-oriġini ġeografika tal-prodott jew tas-servizz.
68 F’dan ir-rigward, għandu jiġi osservat li ma jistax jiġi eskluż li, f’ċerti ċirkustanzi partikolari, l-użu mill-ġdid minn terz ta’ trade mark preċedenti li darba kellha reputazzjoni jew tal-isem ta’ persuna li darba kien famuż jista’ jagħti impressjoni falza ta’ kontinwità jew ta’ wirt ma’ din it-trade mark preċedenti jew ma’ din il-persuna. Dan jista’ jkun il-każ b’mod partikolari meta l-applikant għal trade mark jippreżenta ruħu mal-pubbliku rilevanti bħala s-suċċessur legali jew ekonomiku tal-proprjetarju tat-trade mark preċedenti, filwaqt li ma tkun teżisti ebda relazzjoni ta’ kontinwità jew ta’ wirt bejn il-proprjetarju tat-trade mark preċedenti u l-applikant għal trade mark. Tali ċirkustanza tista’ tittieħed inkunsiderazzjoni sabiex tiġi stabbilita, jekk ikun il-każ, il-mala fide tal-applikant għal trade mark u sabiex tiġi kkonstatata, konsegwentement, l-invalidità tat-trade mark ġdida abbażi tad-dispożizzjonijiet tal-Artikolu 52(1)(b) tar-Regolament Nru 207/2009.
69 Madankollu, f’dan il-każ, qabelxejn, għandu jiġi osservat li l-Bord tal-Appell ma bbażax ir-raġunament tiegħu fuq intenzjoni tar-rikorrent li joħloq impressjoni falza ta’ kontinwità jew ta’ wirt bejn l-impriża tiegħu u dik ta’ Jan Nehera.
70 Sussegwentement, u fi kwalunkwe każ, ma huwiex stabbilit jew anki allegat li r-rikorrent invoka rabta ta’ parentela ma’ Jan Nehera jew li ppreżenta ruħu bħala l-eredi u s-suċċessur legali ta’ dan tal-aħħar jew tal-impriża tiegħu. Barra minn hekk, billi indika li reġa’ nieda u ta ħajja ġdida lil trade mark ta’ suċċess fis-snin 30, ir-rikorrent pjuttost issuġġerixxa interruzzjoni u, għaldaqstant, nuqqas ta’ kontinwità bejn l-attività ta’ Jan Nehera u dik tiegħu stess. Għaldaqstant, ma jidhirx li r-rikorrent deliberatament ipprova jistabbilixxi impressjoni falza ta’ kontinwità jew ta’ wirt bejn l-impriża tiegħu u dik ta’ Jan Nehera.
71 Fl-aħħar nett, id-dispożizzjonijiet tal-Artikolu 7(1)(g) tar-Regolament 2017/1001 huma kompletament irrilevanti fil-kuntest ta’ dan ir-rikors. Fil-fatt, il-Bord tal-Appell iddikjara l-invalidità tat-trade mark ikkontestata mhux abbażi tad-dispożizzjonijiet tal-Artikolu 52(1)(a) tar-Regolament Nru 207/2009 flimkien ma’ dawk tal-Artikolu 7(1)(g) tal-istess regolament, dwar it-trade marks ta’ natura li tqarraq bil-pubbliku, iżda biss fuq dawk tal-Artikolu 52(1)(b) tal-imsemmi regolament, dwar il-mala fide.
72 Fit-tielet lok, l-intervenjenti jsostnu li r-rikorrent ipprova jwettaq frodi fil-konfront tad-dixxendenti u tal-werrieta ta’ Jan Nehera u li juża b’mod ħażin id-drittijiet tagħhom billi ma kisibx il-kunsens tagħhom qabel ma talab ir-reġistrazzjoni tat-trade mark ikkontestata.
73 F’dan ir-rigward, għandu jiġi osservat, minn naħa, li l-Bord tal-Appell ma bbażax ir-raġunament tiegħu fuq intenzjoni tar-rikorrent li jwettaq frodi fil-konfront tad-dixxendenti u tal-werrieta ta’ Jan Nehera jew li juża b’mod ħażin id-drittijiet tagħhom.
74 Min-naħa l-oħra, u fi kwalunkwe każ, it-trade mark preċedenti Ċekoslovakka u l-isem ta’ Jan Nehera ma kienu għadhom is-suġġett ta’ ebda protezzjoni legali favur terz fid-data tal-preżentata tal-applikazzjoni għar-reġistrazzjoni tat-trade mark ikkontestata (ara l-punti 42 u 43 iktar ’il fuq). Minn dan isegwi li d-dixxendenti u l-werrieta ta’ Jan Nehera ma kellhom ebda dritt li jista’ jkun is-suġġett ta’ frodi jew ta’ użu ħażin mir-rikorrent. Għaldaqstant, ma jidhirx li, meta talab ir-reġistrazzjoni tat-trade mark ikkontestata, ir-rikorrent kellu l-intenzjoni li jwettaq frodi fil-konfront tad-dixxendenti u tal-werrieta ta’ Jan Nehera jew li juża b’mod ħażin id-drittijiet tagħhom.
75 Fir-raba’ lok, l-intervenjenti jsostnu li Jan Nehera ġie illegalment u inġustament imċaħħad mill-beni tiegħu waqt in-nazzjonalizzazzjoni tal-impriża tiegħu fl‑1946. Huma jqisu li, skont il-prinċipju li jgħid li dritt ma jistax jitnissel minn fatt illegali (ex injuria jus non oritur), ħadd ma jista’ jibbenefika llum minn din l-inġustizzja sabiex jarrikkixxi ruħu billi juża l-isem ta’ Jan Nehera.
76 F’dan ir-rigward, għandu jiġi osservat li n-nazzjonalizzazzjoni tal-impriża ta’ Jan Nehera fl‑1946 ma hijiex imputabbli lir-rikorrent. L-istess japplika għall-assenza ta’ protezzjoni u ta’ użu tat-trade mark preċedenti Ċekoslovakka matul kważi seba’ deċennji kif ukoll għall-għajbien tar-reputazzjoni ta’ din it-trade mark u tar-reputazzjoni tad-disinjatur tagħha. F’dawn iċ-ċirkustanzi, il-fatt li Jan Nehera kien ġie illegalment jew inġustament imċaħħad mill-beni tiegħu ma jistax jistabbilixxi l-mala fide tar-rikorrent.
77 Fil-ħames u fl-aħħar lok, l-EUIPO jsostni li, kif indika l-Bord tal-Appell fil-punt 36 tad-deċiżjoni kkontestata, il-kunċett ta’ mala fide ma jimplikax neċessarjament xi grad ta’ depravità morali.
78 F’dan ir-rigward, huwa biżżejjed li jiġi kkonstatat li, skont il-ġurisprudenza mfakkra fil-punt 23 iktar ’il fuq, il-kunċett ta’ mala fide jippreżumi l-preżenza ta’ stat tal-moħħ jew ta’ intenzjoni diżonesta. Issa, f’dan il-każ, l-EUIPO u l-intervenjenti ma stabbilixxewx li r-rikorrent kien immotivat minn stat tal-moħħ jew minn intenzjoni diżonesta waqt il-preżentata tal-applikazzjoni għar-reġistrazzjoni tat-trade mark ikkontestata.
79 Minn dak kollu li ntqal jirriżulta li l-Bord tal-Appell żbalja meta qies li r-rikorrent kellu l-intenzjoni li jieħu vantaġġ inġust mir-reputazzjoni ta’ Jan Nehera u tat-trade mark preċedenti Ċekoslovakka u meta minn dan ikkonkluda li huwa kellu mala fide meta ppreżenta l-applikazzjoni għar-reġistrazzjoni tat-trade mark ikkontestata.
80 Għaldaqstant, il-motiv uniku tar-rikorrent għandu jintlaqa’ u d-deċiżjoni kkontestata għandha tiġi annullata.
Fuq l‑ispejjeż
81 Skont l-Artikolu 134(1) tar-Regoli tal-Proċedura tal-Qorti Ġenerali, il-parti li titlef il-kawża għandha tiġi kkundannata għall-ispejjeż, jekk dawn ikunu ntalbu. F’din il-kawża, l-EUIPO u l-intervenjenti tilfu. Peress li r-rikorrent talab biss il-kundanna tal-EUIPO għall-ispejjeż quddiem il-Qorti Ġenerali, hemm lok li l-EUIPO jiġi kkundannat ibati l-ispejjeż tiegħu stess kif ukoll dawk sostnuti mir-rikorrent fil-kuntest ta’ din l-istanza.
82 Barra minn hekk, ir-rikorrent talab li l-EUIPO jiġi kkundannat għall-ispejjeż tal-proċedimenti ta’ appell quddiem il-Bord tal-Appell. F’dan ir-rigward, għandu jitfakkar li, skont l-Artikolu 190(2) tar-Regoli tal-Proċedura, l-ispejjeż indispensabbli sostnuti mill-partijiet għall-finijiet tal-proċedimenti quddiem il-Bord tal-Appell għandhom jitqiesu li huma spejjeż li jistgħu jinġabru. Għaldaqstant, l-EUIPO għandu jiġi kkundannat ibati ukoll l-ispejjeż indispensabbli sostnuti mir-rikorrent għall-finijiet tal-proċedimenti quddiem il-Bord tal-Appell.
83 Barra minn hekk, skont l-Artikolu 138(3) tar-Regoli tal-Proċedura, l-intervenjenti għandhom ibatu l-ispejjeż rispettivi tagħhom.
Għal dawn ir-raġunijiet,
IL-QORTI ĠENERALI (L-Għaxar Awla Estiża)
taqta’ u tiddeċiedi:
1) Id-deċiżjoni tat-Tieni Bord tal-Appell tal-Uffiċċju tal-Proprjetà Intellettwali tal-Unjoni Ewropea (EUIPO), tal‑10 ta’ Marzu 2021 (Każ R 1216/2020‑2), hija annullata.
2) L-EUIPO huwa kkundannat ibati l-ispejjeż tiegħu stess kif ukoll dawk sostnuti minn Ladislav Zdút, inklużi l-ispejjeż indispensabbli sostnuti għall-finijiet tal-proċedimenti ta’ appell quddiem il-Bord tal-Appell.
3) Isabel Nehera, Jean-Henri Nehera u Natacha Sehnal għandhom ibatu l-ispejjeż rispettivi tagħhom.
Kornezov | Buttigieg | Kowalik-Bańczyk |
Mogħtija f’qorti bil-miftuħ fil-Lussemburgu, fis‑6 ta’ Lulju 2022.
Firem