Rikors ippreżentat fit-8 ta' Settembru 2010 - Wabco Europe et vs Il-Kummissjoni
(Kawża T-380/10)
Lingwa tal-kawża: l-Ingliż
Partijiet
Rikorrenti: Wabco Europe BVBA (Brussell, il-Belġju), Wabco Austria GesmbH (Vjenna, l-Awstrija), Trane Inc. (Piscataway, l-Istati Uniti), Ideal Standard Italia s.r.l. (Milano, l-Italja) u Ideal Standard GmbH (Bonn, il-Ġermanja), (rappreżentanti: S. Völcker, F. Louis, A. Israel u N. Niejahr, avukati, C. O'Daly u E. Batchelor, Solicitors, u F. Carlin, Barrister) )
Konvenuta: Il-Kummissjoni Ewropea
Talbiet tar-rikorrenti
tannulla parzjalment l-Artikolu 2 u, sa fejn neċessarju, it-tielet u r-raba subparagrafi tal-Artikolu 1(1) tad-Deċiżjoni tal-Kummissjoni Nru C(2010) 4185 finali, tat-23 ta' Ġunju 2010, fil-Każ COMP/39092 - Installazzjonijiet sanitarji għall-kmamar tal-banju
tnaqqas l-ammont tal-multa imposta fuq ir-rikorrenti; u
tikkundanna lill-Kummissjoni għall-ispejjeż.
Motivi u argumenti prinċipali
Permezz tar-rikors tagħhom, ir-rikorrenti jitolbu, skont l-Artikolu 263 TFUE, l-annullament parzjali tad-Deċiżjoni tal-Kummissjoni Nru C(2010) 4185 finali, tat-23 ta' Ġunju 2010, fil-Każ COMP/39092 - Installazzjonijiet sanitarji għall-kmamar tal-banju, relatata ma' akkordju bejn impriżi li jkopri s-suq Belġjan, Ġermaniż, Franċiż, Taljan, Olandiż u Awstrijak ta' installazzjonijiet sanitarji għall-kmamar tal-banju, dwar il-prezzijiet tal-bejgħ u l-iskambju ta' informazzjoni kummerċjali sensittiva kif ukoll, sussidjarjament, it-tnaqqis tal-ammont tal-multa imposta fuqhom.
Insostenn tar-rikors tagħhom, ir-rikorrenti jressqu l-motivi segwenti:
L-ewwel, ir-rikorrenti jallegaw li l-Kummissjoni ma osservatx l-istandards legali applikabbli fil-kuntest tal-isforzi tagħha sabiex tistabbilixxi l-parteċipazzjoni ta' Ideal Standard Italia s.r.l. u ta' Ideal Standard GmbH fi ksur relatat maċ-ċeramika fl-Italja.
It-tieni, ir-rikorrenti jallegaw li l-Kummissjoni naqset milli tnaqqas il-multa imposta fuqhom għall-ksur Franċiż u Belġjan minkejja li tat immunità parzjali minn multi għal tali ksur skont l-aħħar paragrafu tal-punt 23 tal-Avviż tal-Kummissjoni tal-2002 dwar l-immunità minn multi u tnaqqis f'multi f'każijiet ta' kartell
1.
It-tielet, ir-rikorrenti jallegaw li l-Kummissjoni żbaljat meta kkonstatat li Grohe Beteiligungs GmbH u Grohe AG u s-sussidjarji tagħha, minflok Ideal Standard Italia s.r.l. u Ideal Standard GmbH, kienu l-ewwel li pprovdew "valur miżjud sinnifikattiv" skont l-Avviż tal-Kummissjoni tal-2002 dwar l-immunità minn multi u tnaqqis f'multi f'każijiet ta' kartell.
Fl-aħħar, ir-rikorrenti jallegaw li l-applikazzjoni retroattiva tal-Kummissjoni tal-Linji gwida tal-2006 għall-kalkolu tal-multi imposti skont l-Artikolu 23(2)(a) tar-Regolament Nru 1/2003
2 kienet illegali, inkwantu ppenalizzat lil Ideal Standard Italia s.r.l. u lil Ideal Standard GmbH għat-tip ta' informazzjoni li pprovdiet bħala dik li qed titlob il-klemenza bl-aspettattiva
in bona fine li l-Kummissjoni ma tbiddilx drastikament il-kuntest applikabbli fil-qasam tal-multi għad-detriment tagħhom.