DIGRIET TAL-QORTI TAL-PRIM’ISTANZA (Awla tal-Appell)
tat‑22 ta’ Ġunju 2009
Kawża T‑340/08 P
Marianne Timmer
vs
Il‑Qorti tal-Awdituri tal-Komunitajiet Ewropej
“Appell – Servizz pubbliku – Uffiċjali – Evalwazzjoni – Fatti ġodda u sostanzjali – Appell parzjalment manifestament inammissibbli u parzjalment manifestament infondat”
Suġġett: Appell mid-digriet tat-Tribunal għas-Servizz Pubbliku tal-Unjoni Ewropea (It‑Tieni Awla) tal-5 ta’ Ġunju 2008, Timmer vs Il‑Qorti tal-Awdituri (F‑123/06, li għadu ma ġiex ippubblikat fil-Ġabra), u intiż għall-annullament ta’ dan id-digriet.
Deċiżjoni: L-appell huwa miċħud. Marianne Timmer għandha tbati l-ispejjeż tagħha kif ukoll dawk sostnuti mill-Qorti tal-Awdituri tal-Komunitajiet Ewropej fil-kuntest ta’ din l-istanza.
Sommarju
1. Appell – Formulazzjoni fir-rikors tal-aggravji u tal-argumenti ta’ dritt – Motiv mhux preċiż biżżejjed – Inammissibbiltà
[Regoli tal-Proċedura tal-Qorti tal-Prim’Istanza, Artikolu 138(1)(ċ)]
2. Uffiċjali – Appelli – Ilment amministrattiv imressaq qabel – Termini – Dekadenza – Ftuħ mill-ġdid – Kundizzjoni – Fatt ġdid sostanzjali
(Regolamenti tal-Persunal, Artikoli 90 u 91)
1. Appell ippreżentat quddiem il-Qorti tal-Prim’Istanza kontra deċiżjoni tat-Tribunal għas-Servizz Pubbliku li ma fih ebda argument speċifiku insostenn ta’ talba għal annullament u li jillimita ruħu sabiex jirreferi għar-“riżultati ta’ verifika fuq provi fattwali ġodda” insostenn ta’ talba għal kumpens ma jissodisfax ir‑rekwiżiti tal-Artikolu 138(1)(ċ) tar-Regoli tal-Proċedura tal-Qorti tal-Prim’Istanza u għandu jiġi miċħud bħala manifestament inammissibbli.
(ara l-punti 24, 25)
2. Il-ħatra illegali ta’ uffiċjal ma tistax taffettwa l-legalità tal-atti li dan kellu jwettaq fl-eżerċizzju tal-funzjonijiet tiegħu. B’mod partikolari, il-ħatra illegali ta’ superjur ġerarkiku ma tistax tivvizzja d-deċiżjonijiet ta’ dan tal-aħħar dwar l‑evalwazzjoni ta’ uffiċjal.
Għalhekk, l-illegalità ta’ ħatra ma tistax titqies bħala fatt sostanzjali li jiġġustifika talba għall-eżami mill-ġdid ta’ rapporti ta’ evalwazzjoni li ma ġewx ikkontestati fit-termini ta’ żmien stabbilit.
(ara l-punti 39, 41 u 42)