Sentenza tal-Qorti Ġenerali tad-29 ta' Settembru 2011 - Ryanair vs Il-Kummissjoni
"Għajnuna mill-Istat - Settur tal-avjazzjoni - Għajnuna mogħtija mill-awtoritajiet Taljani lil Alitalia, lil Air One u lil Meridiana - Rikors għal nuqqas li tittieħed azzjoni - Nuqqas ta' teħid ta' pożizzjoni tal-Kummissjoni - Obbligu li tittieħed azzjoni"
Lingwa tal-kawża: l-Ingliż
Partijiet
Rikorrenti: Ryanair Ltd (Dublin, l-Irlanda) (rappreżentanti: E. Vahida u I. G. Metaxas-Maragkidis, avukati)
Konvenuta: Il-Kummissjoni Ewropea (rappreżentanti: L. Flynn, S. Noë u E. Righini, aġenti)
Parti intervenjenti insostenn tal-konvenuta: Air One SpA (Chieti, l-Italja) (rappreżentanti : M. Merola, C. Satacroce u G. Belotti, avukati)
Suġġett
Talba sabiex jiġi kkonstatat nuqqas li tittieħed azzjoni mill-Kummissjoni peress li naqset illegalment milli tieħu pożizzjoni dwar l-ilmenti tar-rikorrenti li jirrigwardaw, minn naħa, għajnuna allegatament mogħtija mir-Repubblika Taljana lil Alitalia, lil Air One u lil Meridiana, u min-naħa l-oħra, allegat ksur tad-dritt tal-kompetizzjoni.
Dispożittiv
1) Il-Kummissjoni tal-Komunitajiet Ewropej naqset milli twettaq l-obbligi tagħha taħt it-Trattat KE meta naqset milli tadotta deċiżjoni fir-rigward tat-trasferiment ta' 100 impjegat ta' Alitalia, kif irrapurtat fl-ittra tas-16 ta' Ġunju 2006, li intbagħtet lilha minn Ryanair Ltd, fir-rigward tal-kumpens mogħti sussegwentement għall-attentati tal-11 ta' Settembru, kif irrapurtat fl-ittri tat-3 ta' Novembru u tat-13 ta' Diċembru 2005, mibgħuta lilha minn Ryanair, u fir-rigward tat-tnaqqis ta' tariffi tal-ajruporti fl-ajruporti "ċentrali"li bbenefikat minnhom b'mod partikolari Alitalia, kif irrapurtat fl-ittri ċċitati tat-3 ta' Novembru u tat-13 ta' Diċembru 2005.
2) Il-kumplament tar-rikors huwa miċħud.
3) Kull waħda mill-partijiet, inkluża Air One SpA, għandha tbati l-ispejjeż tagħha.
____________1 - ĠU C 37, 09.02.2008.