Achomharc arna thabhairt an 31 Bealtaine 2023 ag Jean-Marc Colombani i gcoinne bhreithiúnais na Cúirte Ginearálta (an Cúigiú Dlísheomra) a tugadh an 22 Márta 2023 i gCás T-113/22, Colombani v SEGS

(Cás C-343/23 P)

Teanga an cháis: an Fhraincis

Páirtithe

Achomharcóir: Jean-Marc Colombani (ionadaí: N. de Montigny, avocate)

Páirtí eile sna himeachtaí: an tSeirbhís Eorpach Gníomhaíochta Seachtraí (SEGS)

An t-ordú atá á lorg

Iarrann an t-achomharcóir ar an gCúirt Bhreithiúnais:

–    glacadh leis an achomharc agus an breithiúnas atá faoi chonspóid a chur ar neamhní;

–    an cás a dhiúscairt agus, déanamh de réir mar a chaithfear a dhéanamh faoi CAE:

a dhearbhú go bhfuil cinneadh an 15 Meitheamh 2021 ar neamhní;

a ordú don chosantóir EUR 1 siombalach a íoc mar chúiteamh ar an díobháil neamhábhartha a chothaigh sé;

a ordú don chosantóir san achomharc na costais arna n-íoc ag an achomharcóir i gcomhthéacs na n-imeachtaí reatha agus na n-imeachtaí céadchéime.

Saincheisteanna dlí agus príomhargóintí

Mar thaca lena chaingean, maíonn an t-achomharcóir iliomad saincheisteanna dlí.

I dtosach báire, agus ar bhonn ginearálta, agraíonn an t-achomharcóir earráid dlí na Cúirte Ginearálta agus í i mbun scrúdaithe ar ábhar an iarratais ar chúnamh seo, tá feidhm ag an teorainn neamhdhleathach ar chaoi nach gcoinnítear ach iompar uathrialaitheach agus gníomhach aonair gach duine lena mbaineann, agus eisiamh á déanamh léi ar gach coincheap de chiapadh agus de chleachtas comhbheartaithe, chomh maith leis an mbonn a bhaint ó uathúlacht an chásdlí ar an ábhar.

Sa dara háit, is mian leis an achomharcóir an earráid dlí arna déanamh ag an gCúirt Ghinearálta maidir leis an earráid mheasúnaithe arna déanamh ag SEGS a agairt, agraíonn an t-achomharcóir, go háirithe, malartú neamhdhleathach ar an ualach cruthúnais san anailís ar choinníoll na “fianaise prima facie” d’iompar diúltach, agraíonn sé nár cuireadh coincheap an chomhúdair/na rannpháirtíochta nach n-éilítear iompar gníomhach leis san áireamh, saobhadh na mball fianaise arna dtabhairt, an sárú ar phrionsabal na sáraíochta, sáruithe ar ghnéithe na cúise arna tabhairt, an earráid dlí arna déanamh sa scrúdú ar na “boinn chirt” atá leis an iompar a ghearántar atá i gcontrárthacht le hAirteagail 11, 12, 12a, 21 agus 21a den Rialachán agus lena laghdaítear dualgais na stiúrthóirí is airde céim d’institiúid.

Sa tríú háit, agraíonn an t-achomharcóir sárú ar Airteagal 24 de Rialachán na nOifigeach agus é á chinneadh go raibh sé de cheart ag SEGS diúltú d’iarratas ar chúnamh an achomharcóra.

Sa cheathrú háit, agraíonn an t-achomharcóir nár cuireadh san áireamh gurb ann do chinneadh lenar díbheadh an t-iarratas arna dhéanamh, agus go ndearnadh earráid dlí san anailís ar Airteagail 17 agus 19 den Rialachán.

Ar deireadh, iarrann an t-achomharcóir go n-aithneofaí go ndearnadh damáiste neamhábhartha dó, rud ar dhiúltaigh Cúirt Ghinearálta an Aontais Eorpaigh dó.

____________