Rikors ippreżentat fl-10 ta' Ġunju 2009 - Feng Shen Technology vs UASI - Majtczak (FS)

(Kawża T-227/09)

Lingwa tar-rikors: L-Ingliż

Partijiet

Rikorrenti: Feng Shen Technology Co. Ltd (Gueishan, Tajwan) (rappreżentanti: W. Festl-Wietek u P. Rath, avukati)

Konvenut: L-Uffiċċju għall-Armonizzazzjoni fis-Suq Intern (Trade marks u Disinni)

Parti oħra quddiem il-Bord tal-Appell: Jarosław Majtczak (Łódź, il-Polonja)

Talbiet tar-rikorrenti

tannulla d-deċiżjoni tar-Raba' Bord tal-Appell tal-Uffiċċju għall-Armonizzazzjoni fis-Suq Intern (Trade marks u Disinni), tal-1 ta' April 2009, fil-Każ R 529/2008-4;

tiddikjara t-trade mark Komunitarja Nru 4 431 391 invalida; u

tikkundanna lill-UASI għall-ispejjeż tal-proċedimenti quddiem il-Qorti tal-Ġustizzja u l-Bord tal-Appell.

Motivi u argumenti prinċipali

Trade mark Komunitarja rreġistrata li hija s-suġġett tat-talba għal dikjarazzjoni ta' invalidità: It-trade mark "FS" għal prodotti fil-klassi 26 - Trade mark Komunitarja Nru 4 431 391

Proprjetarju tat-trade mark Komunitarja: Il-parti l-oħra fil-proċedimenti quddiem il-Bord tal-Appell

Parti li qed titlob id-dikjarazzjoni ta' invalidità tat-trade mark Komunitarja: Ir-rikorrenti

Dritt tat-trade mark tal-parti li qed titlob id-dikjarazzjoni ta' invalidità: Diversi reġistrazzjonijiet ta' trade marks preċedenti għas-sinjal figurattiv "FS" f'Tajwan, iċ-Ċina, u l-Gana fir-rigward ta' żippijiet u prodotti relatati

Deċiżjoni tad-Diviżjoni tal-Kanċellazzjoni: Talba għal dikjarazzjoni ta' invalidità miċħuda

Deċiżjoni tal-Bord tal-Appell: Appell miċħud

Motivi invokati: Ksur tal-Artikoli 51(1)(b) tar-Regolament tal-Kunsill 40/94 (li sar l-Artikolu 52(1)(b) tar-Regolament tal-Kunsill 207/2009), peress li l-Bord tal-Appell naqas milli jevalwa b'mod xieraq il-provi u d-dokumenti mressqa mill-partijiet u naqas milli janalizza b'mod xieraq il-fatti bħala kundizzjoni preliminari sabiex jiġi kkonstatat li l-applikazzjoni għal trade mark inkwistjoni kienet saret in mala fede

____________