Rikors ippreżentat fis-26 ta' Novembru 2010 - Evropaïki Dynamiki vs Frontex
(Kawża T-554/10)
Lingwa tal-kawża: l-Ingliż
Partijiet
Rikorrenti: Evropaïki Dynamiki - Proigmena Systimata Tilepikoinonion Pliroforikis kai Tilematikis AE (Ateni, il-Greċja) (rappreżentanti: N. Korogiannakis u M. Dermitzakis, avukati)
Konvenuta: L-Aġenzija Ewropea għall-Ġestjoni ta' Kooperazzjoni Operattiva fil-Fruntieri Esterni tal-Istati Membri tal-Unjoni Ewropea (FRONTEX)
Talbiet tar-rikorrenti
tannulla d-deċiżjoni tal-FRONTEX li tiċħad l-offerta tar-rikorrenti, ippreżentata bi tweġiba għas-sejħa għal offerti Frontex/OP/98/2010 - EOROSUR Proġett Pilota Kbir (ĠU 2010, S 90-134098), kif ukoll kull deċiżjoni oħra relatata tal-FRONTEX, inkluża dik li permezz tagħha l-kuntratt rispettiv ingħata lill-kuntrattur magħżul;
tannulla d-deċiżjoni tal-FRONTEX li tiċħad l-offerta tar-rikorrenti, ippreżentata bi tweġiba għal-Lott 1 u l-Lott 6 tas-sejħa għal offerti Frontex/OP/87/2010 - Kuntratt Qafas (ĠU 2010, S 66-098323), kif ukoll kull deċiżjoni oħra relatata tal-FRONTEX, inkluża dik li permezz tagħha l-kuntratti rispettivi ngħataw lill-kuntratturi magħżula;
tordna lill-FRONTEX tħallas lir-rikorrenti d-danni sostnuti minħabba l-proċedura tas-sejħa għal offerti inkwistjoni fl-ammont ta' EUR 9,358,915.00;
tordna lill-FRONTEX tħallas lir-rikorrenti d-danni sostnuti minħabba telf ta' opportunità u danni għar-reputazzjoni u l-kredibbiltà tagħha fl-ammont ta' EUR 9,358,915.00; u
tikkundanna lill-FRONTEX għall-ħlas tal-ispejjeż legali u spejjeż oħra tar-rikorrenti marbuta ma' dan ir-rikors, anki f'każ li r-rikors preżenti jiġi miċħud.
Motivi u argumenti prinċipali
Fil-kawża preżenti, ir-rikorrenti qiegħda titlob l-annullament tad-deċiżjonijiet tal-konvenuta, tas-16 ta' Settembru 2010 u tal-20 ta' Ottubru 2010, li jiċħdu l-offerta tagħha fil-kuntest tas-sejħa għal offerti Frontex/OP/98/2010 - EOROSUR Proġett Pilota Kbir (ĠU 2010, S 90-134098) u l-Lott 1 u l-Lott 6 tas-sejħa għal offerti Frontex/OP/87/2010 - Kuntratt Qafas (ĠU 2010, S 66-098323), kif ukoll ta' kull deċiżjoni oħra relatata tal-FRONTEX, inkluża dik li permezz tagħha l-kuntratti rispettivi ngħataw lill-kuntratturi magħżula. Barra minn hekk, ir-rikorrenti titlob kumpens għad-danni allegati minħabba s-sejħa għal offerti.
Insostenn tat-talbiet tagħha, ir-rikorrenti tressaq il-motivi segwenti.
L-ewwel nett, ir-rikorrenti ssostni li l-konvenuta kisret l-Artikoli 100(2) tar-Regolament Finanzjarju
1, l-obbligu ta' motivazzjoni, peress illi l-FRONTEX irrifjutat li tipprovdi lir-rikorrenti ġustifikazzjoni jew spjegazzjoni suffiċjenti.
Barra minn hekk, ir-rikorrenti ssostni li l-konvenuta wettqet diversi żbalji serji ta' evalwazzjoni, ksur tal-prinċipju ta' nondiskriminazzjoni u ma osservatx il-kriterji ta' esklużjoni, u għalhekk kisret l-Artikoli 93(1)(f) u 94 tar-Regolament Finanzjarju.
Fl-aħħar nett, ir-rikorrenti ssostni li l-konvenuta kisret il-prinċipju ta' amministrazzjoni tajba peress illi ħawdet illegalment il-kriterji tal-għażla mal-kriterji tal-għoti.
____________1 - Regolament tal-Kunsill (KE, EURATOM) Nru 1605/2002, tal-25 ta' Gunju 2002, rigward ir-Regolament Finanazjarju applikabbli ghall-bagit generali tal-Komunitajiet Ewropej (ĠU Edizzjoni Speċjali bil-Malti, Kapitolu 1,Vol. 4, p. 74)