Iarraidh ar réamhrialú ón Bundesfinanzhof (an Ghearmáin) a taisceadh an 7 Feabhra 2024 - Finanzamt Hamburg-Altona v XYRALITY GmbH
(Cás C-101/24, Finanzamt Hamburg-Altona)
Teanga an cháis: an Ghearmáinis
An chúirt a rinne an tarchur
Bundesfinanzhof
Páirtithe sna príomhimeachtaí
Achomharcóir: Finanzamt Hamburg-Altona
Freagróir: XYRALITY GmbH
Na ceisteanna a tharchuirtear
I gcúinsí amhail iad siúd sna príomhimeachtaí, inar chuir duine inchánach Gearmánach (forbróir) seirbhís ar fáil go leictreonach do dhaoine neamh-inchánach a raibh cónaí orthu ar chríoch an Chomhphobail (custaiméirí deiridh) trí aipmhargadh arna oibriú ag duine inchánach Éireannach roimh an 1 Eanáir 2015, an bhfuil Airteagal 28 de Threoir 2006/112/CE 1 le cur i bhfeidhm, agus an toradh a bhíonn air go ndéileáiltear leis an duine inchánach Éireannach amhail is go mbeadh na seirbhísí sin faighte aige ón bhforbróir agus gur sholáthair sé do na custaiméirí deiridh toisc nár ainmnigh an Appstore (aipmhargadh) ach an forbróir mar an soláthraí agus nár thuairiscigh sé CBL Gearmánach go dtí go ndearna sé sin sna deimhnithe ordaithe a eisíodh chuig na custaiméirí deiridh?
Má fhreagraítear Ceist 1 go dearfach: An bhfuil áit soláthair na seirbhíse ag an bhforbróir don Appstore (aipmhargadh) le haghaidh aipeanna, atá samhailteach de réir Airteagal 28 de Threoir 2006/112, in Éirinn i gcomhréir le hAirteagal 44 den Treoir sin, nó i bPoblacht Chónaidhme na Gearmáine, i gcomhréir le hAirteagal 45?
Más rud é, de réir an fhreagra ar Cheisteanna 1 agus 2, nach bhfuil aon seirbhísí curtha ar fáil ag an bhforbróir i bPoblacht Chónaidhme na Gearmáine: An bhfuil dliteanas cánach ag an bhforbróir i leith CBL Gearmánach de réir Airteagal 203 de Threoir 2006/112 toisc go bhfuil sé, mar a comhaontaíodh, ainmnithe ag an Appstore (aipmhargadh) mar sholáthraí ina dheimhnithe ordaithe a seoladh trí ríomhphost chuig na custaiméirí deiridh agus go bhfuil CBL Gearmánach léirithe aige, cé nach bhfuil na custaiméirí deiridh i dteideal cáin ionchuir a asbhaint?
____________
1 Treoir ón gComhairle an 28 Samhain 2006 maidir leis an gcóras comhchoiteann cánach breisluacha (IO 2006 L 347, lch. 1).