Rikors ippreżentat fil-15 ta’ April 2024 – Zalando vs Il-Kummissjoni

(Kawża T-203/24)

Lingwa tal-kawża: il-Ġermaniż

Partijiet

Rikorrent: Zalando SE (Berlin, il-Ġermanja) (rappreżentant: R. Briske, J. Trouet, K. Ewald u L. Schneider, avukati)

Konvenut: Il-Kummissjoni Ewropea

Talbiet

Ir-rikorrenti titlob li l-Qorti Ġenerali jogħġobha:

tannulla d-deċiżjoni (preżunta) tal-Kummissjoni Ewropea li tiċħad l-applikazzjoni konfermatorja tar-rikorrenti, bin-numru tal-fajl EASE 2023/6032,

tikkundanna lill-konvenuta għall-ispejjeż tal-kawża.

Motivi u argumenti prinċipali

Insostenn tar-rikors tagħha, ir-rikorrenti tinvoka erba’ motivi.

L-ewwel motiv: ksur tad-dritt ta’ aċċess għal dokumenti previst fl-Artikolu 2 tar-Regolament (KE) Nru 1049/2001 ¹ .

Il-konvenuta ċaħdet b’mod żbaljat it-talba inizjali u t-talba konfermattiva tar-rikorrenti u invokat eċċezzjonijiet irrilevanti taħt l-Artikolu 4(2) u (3) tar-Regolament Nru 1049/2001.

L-ebda interessi kummerċjali ta’ persuna fiżika jew ġuridika ma huma affettwati b’mod li jipprevjenu l-pubblikazzjoni, peress li l-impriża potenzjalment affettwata hija r-rikorrenti nnifisha. Id-dispożizzjoni ta’ eżenzjoni hija wkoll prekluża mill-fatt li d-dokumenti ma ġewx mir-rikorrenti nnifisha u hija qatt ma talbet għall-kunfidenzjalità. Pjuttost, id-dokumenti mitluba huma essenzjalment informazzjoni relatata man-numru medju ta’ utenti attivi ta’ kull xahar tas-servizz tar-rikorrenti fl-Unjoni għall-formola ta’ kalkolu skont l-Artikolu 4(1) tar-Regolament Delegat tal-Kummissjoni (UE) 2023/1127 ¹ sabiex tiddetermina t-tariffa superviżorja skont l-Artikolu 43 tar-Regolament (UE) 2022/2065 ² . Madankollu, peress li din iċ-ċifra għandha tiġi ppubblikata bil-liġi skont l-Artikolu 24(2) tar-Regolament 2022/2065, il-passi li jwasslu għall-kalkolu ma setgħux ikunu kunfidenzjali.

Barra minn hekk, id-determinazzjoni tat-tariffa superviżorja ma hijiex “investigazzjoni” skont it-tielet inċiż tal-Artikolu 4(2) tar-Regolament Nru 1049/2001, peress li l-konvenuta mhux qed tipprepara opinjoni u mhux qed tinvestiga ksur potenzjali tar-Regolament 2022/2065. Pjuttost, dan jinvolvi l-passi li jwasslu għall-kalkolu matematiku u l-evalwazzjoni tad-data.

Ma hemm l-ebda preżunzjoni ta’ nuqqas ta’ pubblikazzjoni, peress li l-kategoriji ta’ każijiet fil-ġurisprudenza ma humiex rilevanti u d-determinazzjoni tat-tariffi bis-saħħa tar-Regolament 2022/2065 ma hijiex komparabbli magħhom.

Peress li l-proċess ta’ deċiżjoni dwar it-tariffi tlesta l-iktar tard meta r-rikorrenti ħallset, l-ewwel subparagrafu tal-Artikolu 4(3) tar-Regolament Nru 1049/2001 lanqas ma huwa rilevanti.

Fl-aħħar nett, il-konvenuta ma tistax tibbaża ruħha fuq it-tieni subparagrafu tal-Artikolu 4(3) tar-Regolament Nru 1049/2001, peress li l-proċess ta’ teħid ta’ deċiżjoni tal-konvenuta ma jkunx serjament affettwat li kieku jiġi ppubblikat: hija informazzjoni li tirrigwarda is-servizz tar-rikorrenti, li fil-parti l-kbira tagħha nġabret u tħejjiet minn fornituri kummerċjali terzi.

It-tieni motiv: ksur tal-obbligu ta’ motivazzjoni

Fid-deċiżjoni tagħha, il-konvenuta kisret l-obbligu ta’ motivazzjoni fl-Artikolu 296 TFUE, b’tali mod li ma kienx jinftiehem mir-rikorrenti bħala d-destinatarja. Fl-ewwel ċaħda tagħha, il-konvenuta lanqas biss ttrattat dokument wieħed b’mod speċifiku, iżda pjuttost ċaħdet il-pubblikazzjoni b’mod ġenerali bl-użu ta’ argumenti intiżi għall-preżunzjoni ta’ nuqqas ta’ pubblikazzjoni.

It-tielet motiv: ksur tad-dritt fundamentali ta’ aċċess għal dokumenti

Permezz taċ-ċaħda illegali tagħha, il-konvenuta kisret ukoll id-dritt fundamentali tar-rikorrenti ta’ aċċess għal dokumenti taħt l-Artikolu 42 tal-Karta tad-Drittijiet Fundamentali tal-Unjoni Ewropea ¹ .

Ir-raba’ motiv: ksur tad-dritt fundamentali għal amministrazzjoni tajba

Fl-istess ħin, il-konvenuta kisret id-dritt fundamentali tar-rikorrenti għal amministrazzjoni tajba taħt l-Artikolu 41(2)(b) tal-Karta tad-Drittijiet Fundamentali peress li injorat kompletament ir-rwol tar-rikorrenti bħala l-impriża kkonċernata mir-rifjut sħiħ tagħha.

____________

¹     Regolament (KE) Nru 1049/2001 tal-Parlament Ewropew u tal-Kunsill tat-30 ta’ Mejju 2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni (ĠU Edizzjoni Speċjali bil-Malti, Kapitolu 1, Vol. 3, p. 331).

¹     Regolament Delegat tal-Kummissjoni (UE) 2023/1127 tat-2 ta’ Marzu 2023 li jissupplimenta r-Regolament (UE) 2022/2065 tal-Parlament Ewropew u tal-Kunsill bil-metodoloġiji u l-proċeduri dettaljati rigward it-tariffi superviżorji imposti mill-Kummissjoni fuq fornituri ta’ pjattaformi online kbar ħafna u magni tat-tiftix online kbar ħafna (ĠU 2023, L 149, p. 16).

¹     Regolament (UE) 2022/2065 tal-Parlament Ewropew u tal-Kunsill tad-19 ta’ Ottubru 2022 dwar Suq Uniku għas-Servizzi Diġitali u li jemenda d-Direttiva 2000/31/KE (l-Att dwar is-Servizzi Diġitali) (ĠU 2022, L 277, p. 1).

¹     ĠU 2012, C 326, p. 391.