Caingean arna tabhairt an 18 Márta 2024 – Piql v an Coimisiún
(Cás T-158/24)
Teanga an cháis: an Béarla
Páirtithe
Iarratasóir: Piql AS (Drammen, an Iorua) (ionadaí: L. Garnes, Dlíodóir)
Cosantóir: An Coimisiún Eorpach
An t-ordú atá á lorg
Iarrann an t-iarratasóir ar an gCúirt Ghinearálta:
cinneadh C(2024) 414 final an 17 Eanáir 2024 arna ghlacadh ag an gCoimisiún Eorpach a chur ar neamhní; 1
a ordú don Choimisiún Eorpach na costais a íoc.
Saincheisteanna dlí agus príomhargóintí
Mar thaca leis an gcaingean, maíonn an t-iarratasóir ar phléadáil aonair sa dlí, ag líomhain mar a leanas:
Ceanglaítear leis an gcinneadh thuasluaite ón gCoimisiún ar an iarratasóir, arb é an seolaí air, méid sonraithe a aisíoc, toisc go dtagann an cinneadh ón gCoimisiún ar an gconclúid go raibh costais áirithe a éilítear ar thionscadal arna mhaoiniú ag an Aontais neamh-incháilithe. Áitíonn an t-iarratasóir, áfach, gur bhain agus chuir an Coimisiún Eorpach comhaontú deontais an tionscadail i bhfeidhm go mícheart nuair a tháinig sé ar an gconclúid go raibh costais áirithe neamh-incháilithe. Mar sin, áitíonn an t-iarratasóir go raibh na costais chonspóideacha incháilithe agus, dá bhrí sin, nach mór an cinneadh ón gCoimisiún atá faoi chonspóid a chur ar neamhní, ionas gur féidir leis an gCoimisiún Eorpach cinneadh nua a ghlacadh bunaithe ar na costais cháilithe incháilithe dá bhforáiltear sa chomhaontú deontais i dtrácht.
____________
1 Cinneadh ón gCoimisiún an 17 Eanáir 2024 maidir le EUR 245 161.28 a ghnóthú (dhá chéad daichead a cúig mhíle, céad seasca a haon agus ocht cent is fiche) móide ús atá dlite ó PIQL AS.