Sentenza tal-Qorti Ġenerali tat-13 ta’ Diċembru 2018 – Scandlines Danmark u Scandlines Deutschland vs Il-Kummissjoni
(Kawża T-630/15) 1
(“Għajnuna mill-Istat – Finanzjament pubbliku tal-konnessjoni fissa bil-ferrovija u bit-triq tal-Fehmarn Belt – Għajnuna individwali – Deċiżjoni li ma jitqajmux oġġezzjonijiet – Deċiżjoni li tikkonstata l-assenza ta’ għajnuna mill-Istat u li tiddikjara l-għajnuna kompatibbli mas-suq intern – Kunċett ta’ għajnuna mill-Istat – Effett ħażin fuq il-kompetizzjoni u effett fuq il-kummerċ bejn Stati Membri – Kundizzjonijiet ta’ kompatibbiltà – Għajnuna intiża għat-twettiq ta’ proġett importanti ta’ interess Ewropew komuni – Neċessità tal-għajnuna – Effett ta’ inċentiv – Proporzjonalità tal-għajnuna – Diffikultajiet serji li jiġġustifikaw il-ftuħ tal-proċedura ta’ investigazzjoni formali – Obbligu ta’ motivazzjoni – Komunikazzjoni dwar l-għajnuna mill-Istat intiża sabiex tippromwovi it-twettiq ta’ proġetti importanti ta’ interess Ewropew komuni”)
Lingwa tal-kawża:l-Ingliż
Partijiet
Rikorrenti: Scandlines Danmark ApS (Kopenħagen, id-Danimarka) u Scandlines Deutschland GmbH (Hamburg, il-Ġermanja) (rappreżentanti: inizjalment L. Sandberg-Mørch u M.-E. Vitali, sussegwentement L. Sandberg-Mørch, avukati)
Konvenuta: Il-Kummissjoni Ewropea (rappreżentanti: L. Armati, L. Flynn u S. Noë, aġenti)
Intervenjenti insostenn tar-rikorrenti: Naturschutzbund Deutschland (NABU) eV (Stuttgart, il-Ġermanja) (rappreżentant: T. Hohmuth, avukat), u Föreningen Svensk Sjöfart (Göteborg, l-Isvezja) (rappreżentanti: L. Sandberg-Mørch u J. Buendía Sierra, avukati)
Intervenjenti insostenn tal-kovenuta: Ir-Renju tad-Danimarka (rappreżentanti: inizjalment C. Thorning, sussegwentement J. Nymann-Lindegren, aġenti, assistiti minn R. Holdgaard, avukat)
Suġġett
Talba bbażata fuq l-Artikolu 263 TFUE u intiża għall-annullament tad-Deċiżjoni tal-Kummissjoni C(2015) 5023 final, tat-23 ta’ Lulju 2015, dwar l-għajnuna mill-Istat SA.39078 (2014/N) (id-Danimarka), li tirrigwarda l-finanzjament tal-proġett ta’ konnessjoni fissa bil-ferrovija u bit-triq tal-Fehmarn Belt (ĠU 2015, C 325, p. 5).
Dispożittiv
Id-Deċiżjoni tal-Kummissjoni C(2015) 5023 final, tat-23 ta’ Lulju 2015, dwar l-għajnuna mill-Istat SA.39078 (2014/N) (id-Danimarka), li tirrigwarda l-finanzjament tal-proġett ta’ konnessjoni fissa bil-ferrovija u bit-triq tal-Fehmarn Belt (ĠU 2015, C 325, p. 5) hija annullata sa fejn il-Kummissjoni ddeċidiet li ma tqajjimx oġġezzjonijiet fir-rigward tal-miżuri mogħtija mir-Renju tad-Danimarka lil Femern A/S għall-ippjanar, għall-kostruzzjoni u għall-użu tal-konnessjoni fissa tal-Fehmarn Belt.
Il-kumplament tar-rikors huwa miċħud.
Il-Kummissjoni għandha tbati, minbarra l-ispejjeż tagħha, l-ispejjeż sostnuti minn Scandlines Danmark ApS u Scandlines Deutschland GmbH.
Ir-Renju tad-Danimarka, Föreningen Svensk Sjöfart u Naturschutzbund Deutschland (NABU) eV għandhom ibatu l-ispejjeż tagħhom stess.
____________
1 ĠU C 59, 15.2.2016.