Iarraidh ar réamhrialú ón Conseil d’État (an Fhrainc) an 7 Márta 2024 – WebGroup Czech Republic, a.s., NKL Associates s. r. o. v Ministre de la Culture, Premier ministre
(Cás C-188/24, WebGroup Czech Republic agus NKL Associates)
Teanga an cháis: an Fhraincis
An chúirt a rinne an tarchur
Conseil d’État
Páirtithe sna príomhimeachtaí
Iarratasóir: WebGroup Czech Republic, a.s., NKL Associates s. r. o.
Cosantóir: Ministre de la Culture, Premier ministre
Páirtithe atá i gceist: Osez le féminisme !, Le mouvement du Nid, Les effronté-E-S
Na ceisteanna a tharchuirtear
Ar an gcéad dul síos, an gá a mheas go bhfuil forálacha a bhaineann leis an dlí coiriúil, go háirithe forálacha ginearálta agus teibí a sonrófar iontu gníomhartha áirithe mar ghníomhartha lena gcomhdhéantar chionta coiriúla is féidir a ionchúiseamh, ag teacht faoin ‘réimse comhordaithe’ le Treoir 2000/31/CE ó Pharlaimint na hEorpa agus ón gComhairle, an 8 Meitheamh 2000 1 , nuair is féidir leo a bheith infheidhme maidir le hiompar soláthraí seirbhíse na sochaí faisnéise agus le hiompar aon duine nádúrtha nó dlítheanaigh eile, nó ar cheart a mheas, ós rud é gurb é an t-aon chuspóir atá ag an treoir ná gnéithe dlíthiúla áirithe de na seirbhísí sin a chomhchuibhiú gan réimse an dlí choiriúil féin a chomhchuibhiú agus nach leagtar amach inti ach na ceanglais is infheidhme maidir le seirbhísí, nach féidir forálacha coiriúla den sórt sin a mheas mar cheanglais is infheidhme maidir le rochtain agus feidhmiú ghníomhaíocht seirbhíse na sochaí faisnéise agus a thagann faoi ‘réimse comhordaithe’ leis an Treoir sin? Go háirithe, an dtagann forálacha pionósacha atá ceaptha chun cosaint mionaoiseach a áirithiú faoi raon feidhme an ‘réimse chomhordaithe’ sin?
Ar cheart an oibleagáid atá ar fhoilsitheoirí seirbhísí cumarsáide ar líne feistí a chur i bhfeidhm atá ceaptha chun cosc a chur ar mhionaoisigh rochtain a fháil ar ábhar pornagrafach a scaipeann siad a mheas mar oibleagáid a thagann faoi réim ‘réimse comhordaithe’ le Treoir 2000/31/CE, nach ndéanann ach gnéithe dlíthiúla áirithe de na seirbhísí lena mbaineann a chomhchuibhiú, ach, má bhaineann an oibleagáid sin le feidhmiú gníomhaíochta seirbhíse na sochaí faisnéise, a mhéid a bhaineann sí le hiompar an tsoláthraí seirbhíse, le cáilíocht nó le hábhar na seirbhíse, ní bhaineann sí, áfach, le bunú soláthraithe seirbhíse, ná le cumarsáidí tráchtála, ná le conarthaí trí mheán leictreonach, ná le dliteanas idirghabhálaithe, ná le cóid iompair, ná le réiteach díospóide lasmuigh den chúirt, ná le leigheasanna breithiúnacha agus le comhar idir na Ballstáit, agus dá bhrí sin ní mbaineann sí le haon cheann cheann de na hábhair a rialaítear leis na forálacha um chomhchuibhiú de Chaibidil II?
Más freagra dearfach a thabharfar ar an gceist roimhe seo, conas ba cheart an comhréiteach a dhéanamh idir na ceanglais a eascraíonn as Treoir 2000/31/CE agus na cinn a eascraíonn as cearta bunúsacha a chosaint san Aontas Eorpach, go háirithe ó chosaint dhínit an duine agus leas an linbh, a ráthaítear le hAirteagail 1 agus 24 de Chairt um Chearta Bunúsacha an Aontais Eorpaigh agus le hAirteagal 8 den Choinbhinsiún Eorpach chun Cearta an Duine agus Saoirsí Bunúsacha a Chosaint, nuair is cosúil nach n-áiritheofar cosaint éifeachtach na gceart sin trí bhearta aonair a ghlacadh maidir le seirbhís áirithe? An bhfuil prionsabal ginearálta de dhlí an Aontais Eorpaigh lena n-údarófaí do na Ballstáit, go háirithe i gcás éigeandála, na bearta a ghlacadh, fiú amháin nuair is bearta ginearálta agus teibí iad, maidir le catagóir de sholáthraithe seirbhísí a theastaíonn chun mionaoisigh a chosaint ar ionsaithe ar a ndínit agus sláine, trí mhaolú a dhéanamh nuair is gá, i leith soláthraithe seirbhísí arna rialú ag Treoir 2000/31/CE, ar phrionsabal a rialacháin óna Stát tionscnaimh atá leagtha síos sa Treoir sin?
____________
1 Treoir 2000/31/CE ó Pharlaimint na hEorpa agus ón gComhairle an 8 Meitheamh 2000 maidir le gnéithe áirithe dlí de sheirbhísí na sochaí faisnéise, go háirithe tráchtáil leictreonach, sa Mhargadh Inmheánach (‘An Treoir maidir le tráchtáil leictreonach’) (IO 2000 L 178, lch. 1).