Rikors ippreżentat fit-3 ta' Awissu 2010 - Iliad et vs Il-Kummissjoni
(Kawża T-325/10)
Lingwa tal-kawża: il-Franċiż
Partijiet
Rikorrenti: Iliad SA (Pariġi, Franza), Free infrastructure SAS (Pariġi) u Free SA (Pariġi) (rappreżentant: T. Cabot, avukat)
Konvenuta: Il-Kummissjoni Ewropea
Talbiet tar-rikorrenti
tiddikjara dan ir-rikors ammissibbli;
tannulla d-deċiżjoni tal-Kummissjoni Ewropea tat-30 ta' Settembru 2009 li tapprova l-finanzjament pubbliku ta' EUR 59 miljun tal-proġett ta' netwerk b'veloċità qawwija ħafna (very high speed broadband network) fid-dipartiment tal-Hauts-de-Seine, skont l-Artikolu 263 TFUE
tikkundanna lill-Kummissjoni għall-ispejjeż.
Motivi u argumenti prinċipali
Ir-rikorrenti jitolbu l-annullament tad-Deċiżjoni tal-Kummissjoni C(2009) 7426 finali, tat-30 ta' Settembru 2009
1, li tiddikjara li l-kumpens għal spejjeż ta' servizz pubbliku ta' EUR 59 miljun, mogħti mill-awtoritajiet Franċiżi lil grupp ta' impriżi għall-istabbiliment u l-użu ta' netwerk ta' komunikazzjonijiet elettroniċi b'veloċità qawwija ħafna (proġett THD 92) fid-dipartiment tal-Hauts-de-Seine, ma jikkostitwixxix għajnuna mill-Istat.
Insostenn tar-rikors tagħhom, ir-rikorrenti jissollevaw tliet motivi bbażati fuq:
- ksur tal-Artikolu 107(1) TFUE, peress li l-Kummissjoni ma rrispettat l-ebda wieħed mill-erba' kriterji stabbiliti fil-kawża Altmark
2 meta ddeċidiet illi l-miżura inkwistjoni ma kinitx tikkostitwixxi għajnuna mill-Istat;
- ksur tal-obbligu ta' motivazzjoni, peress li d-deċiżjoni kkontestata ma fihiex elementi biżżejjed sabiex jista' jiġi konkluż illi l-kriterji kollha tal-kawża Altmark li għandhom jiġu applikati, huma sodisfatti;
- ksur tal-obbligu tal-ftuħ ta' proċedura ta' investigazzjoni formali stipulata fl-Artikolu 108(2) TFUE, peress li numru ta' indizji bbażati fuq it-tul tal-proċedura ta' eżami preliminari, fuq id-dokumenti li juru l-portata u l-kumplessità tal-eżami li kellu jsir u fuq il-kontenut parzjalment inkomplet u insuffiċjenti tad-deċiżjoni kkontestata, juru li l-Kummissjoni ħadet id-deċiżjoni kkontestata minkejja l-fatt illi hija kellha diffikultajiet serji sabiex tevalwa jekk il-miżura inkwistjoni kinitx kompatibbli mas-suq komuni.
____________1 - Għajnuna mill-Istat N 331/2008 - Franza2 - Sentenza tal-Qorti tal-Ġustizzja tal-24 ta' Lulju 2003, Altmark Trans u Regierungsprasidium Magdeburg (C-280/00, Ġabra 2003, p. I-7747)