Rikors ippreżentat fis-27 ta' Frar 2009 - Idromacchine et vs Il-Kummissjoni

(Kawża T-88/09)

Lingwa tal-kawża: It-Taljan

Partijiet

Rikorrenti: Idromacchine Srl (Porto Marghera, l-Italja) Alessandro Capuzzo (Mirano, l-Italja), Roberto Capuzzo (Mogliano Veneto, l-Italja) (rappreżentanti: W. Viscardini, avukat, G. Donà, avukat)

Konvenuta: Il-Kummissjoni tal-Komunitajiet Ewropej

Talbiet tar-rikorrenti

A) Tikkundanna lill-Kommissjoni tal-Komunitajiet Ewropej:

1) għad-dannu materjali, tħallas lil Idromacchine Srl is-somma ta' Euro 5 459 641.28 (jew somma oħra stabbilita sussegwentement mill-Qorti tal-Prim'Istanza).

2) għad-dannu morali,

tħallas lil Idromacchine Srl somma stabbilita ex aequo et bono bħala indikazzjoni, f'ammont ekwivalenti għal persentaġġ sinjifikattiv (per eżempju, minn 30 % sa 50 %) tad-dannu materjali;

tħallas lil Alessandro Capuzzo u Roberto Capuzzo somma stabbilita ex aequo et bono għal kull wieħed minnhom, anke din bħala indikazzjoni f'ammont ekwivalenti għal persentaġġ sinjifikattiv (per eżempju, minn 30 % sa 50 %) tad-dannu materjali;

3) tirrijabilita l-immaġni ta' Idromacchine Srl u ta' Alessandro Capuzzo u Roberto Capuzzo, skont kif il-Qorti tal-Prim'Istanza tqis xieraq (per eżempju, permezz ta' pubblikazzjoni ad hoc fil-Ġurnal Uffiċjali u/jew permezz ta' ittra indirizzata lill-operaturi ewlenin fis-settur ikkonċernat, filwaqt li tordna r-rettifika tal-informazzjoni relativa għar-rikorrenti li dehret fil-Ġurnal Uffiċjali tal-Unjoni Ewropea tat-18 ta' Frar 2005, sensiela C 42, paġni 15 et seq.

B) Tikkundanna lill-Kummissjoni tal-Komunitajiet Ewropej għall-ispejjeż.

Motivi u argumenti prinċipali

Ir-rikorrenti jsostnu li minn naħa, il-publikazzjoni mill-Kummissjoni tal-isem ta' Idromacchine Srl, terza persuna fil-konfront tad-destinatarju formali tad-deċiżjoni tal-Kummissjoni tat-30 ta' Diċembru 2004 C(2004) 5426 finali, li dehret fil-Ġurnal Uffiċjali tal-Unjoni Ewropea tat-18 ta' Frar 2005, sensiela C 42, paġni 15 et seq. u min-naħa l-oħra, tal-informazzjoni li tista' toħloq preġudizzju li tikkonċerna lill-kumpannija inkwistjoni, tikkostitwixxi ksur gravi ta' diversi prinċipji tad-dritt Komunitarju u konsegwentement, huma jitolbu kumpens għad-dannu materjali u morali li huma subew minħabba dan il-fatt

B'mod partikolari, billi ppubblikat l-informazzjoni msemmija hawn fuq mingħajr ma għamlet il-verifiki neċessarji, fosthom prinċipalment dik li tisma' minn qabel lir-rikorrenti, il-Kummissjoni naqset mid-dmirijiet ta' diliġenza, tal-protezzjoni tad-drittijiet tad-difiża u tas-sigriet professjonali.

Fi kwalunkwe każ, peress li d-deċiżjoni ppubblikata mhijiex indirizzata lil Idromacchine Srl, il-pubblikazzjoni tad-data li tikkonċernaha għandha tiġi kkunsidrata bħala miżura mhux proporzjonata mal-għan tal-Kummissjoni, li tillimita ruħha li tirreni pubbliċi kwistjonijiet relativi għall-applikazzjoni tar-regoli Komunitarja fil-qasam tal-kompetizzjoni.

F'dak li jirrigwarda d-danni invokati, il-pubblikazzjoni fit-termini indikati iktar 'il fuq, ġabet fix-xejn id-dħul mill-bejgħ ta' Idromacchine Srl fis-settur tagħha, u ppreġudikat b'mod serju r-reputazzjoni tal-kumpannija u tal-persuni li jirrippreżentawha.

____________