Rochtain ar dhoiciméid riaracháin

Baineann an leathanach seo le rochtain ar dhoiciméid atá i seilbh Chúirt Bhreithiúnais an Aontais Eorpaigh maidir lena feidhmeanna riaracháin.

Ní bhaineann sé le doiciméid a bhaineann leis na cásanna atá os comhair na Cúirte. Is féidir rochtain a fháil ar an bhfaisnéis agus ar na doiciméid uile atá ar fáil go poiblí a bhaineann le cásanna sa bhunachar sonraí cásdlí ar shuíomh gréasáin na Cúirte.

Is féidir teacht ar théacsanna lena rialaítear nósanna imeachta sa roinn ‘Nós Imeachta Cásanna’ ar an suíomh gréasáin seo don Chúirt Bhreithiúnais agus don Chúirt Ghinearálta araon.

Mar an gcéanna, níor cheart an nós imeachta rochtana ar dhoiciméid a úsáid le haghaidh iarratais ar fhaisnéis. Má tá iarratas faisnéise agat, déan teagmháil linn tríd ár bhfoirm theagmhála.

Glacadh na rialacha maidir le rochtain phoiblí ar dhoiciméid riaracháin le cinneadh an 26 Samhain 2019 faoi Airteagal 15(3) den Chonradh ar Fheidhmiú an Aontais Eorpaigh (CFAE).

Faoi na rialacha seo, tá ceart rochtana ag aon saoránach nó cónaitheoir den Aontas chomh maith le haon duine dlítheanach laistigh den Aontas ar dhoiciméid a chruthaigh an Chúirt, a fuair sí agus a bhí ina seilbh aici mar chuid dá feidhmeanna riaracháin. Tá sé seo faoi réir na gcoinníollacha a leagtar amach sa chinneadh.

Conas rochtain ar dhoiciméad riaracháin a iarraidh

Chun rochtain ar dhoiciméad riaracháin a iarraidh, ba cheart foirm iarratais a chomhlánú. Is féidir é sin a dhéanamh ar líne lena sheoladh go leictreonach, nó mar chomhad PDF atá le priontáil agus le seoladh tríd an bpost nó trí ríomhphost.

Maidir le d’iarratas:

• Ba cheart í a bheith scríofa i dteanga oifigiúil den Aontas.
• Ba cheart d’ainm agus do sheoladh a bheith ann
• Ba cheart don iarratas a bheith beacht agus dóthain sonraí a bheith ann chun cur ar chumas na Cúirte an doiciméad nó na doiciméid atá á n‑iarraidh agat a aithint.
• Ba cheart an teanga inar mhaith leat an doiciméad a chur san áireamh, chomh maith le rogha eile i gcás nach bhfuil do chéad rogha ar fáil.

Ní féidir na doiciméid a sholáthar ach i dteangacha agus i bhformáidí atá ann cheana — ní chruthóidh an Chúirt doiciméad nua, ní aistreoidh sí doiciméad ná ní bhaileoidh sí faisnéis chun freagra a thabhairt ar d’iarratas.

A luaithe a gheobhaidh an Chúirt d’iarratas, gheobhaidh tú admháil le huimhir chlárúcháin. Déileálfaidh an Chúirt le d’iarratas laistigh d’aon mhí amháin ar a mhéad. Féadfar síneadh a chur leis an tréimhse seo faoi choinníollacha a leagtar síos sa chinneadh.

Diúltaíodh do m’iarratas

Féadfaidh an Chúirt rochtain ar dhoiciméad a dhiúltú ar roinnt cúiseanna, lena n‑áirítear i gcás ina bhféadfaí dochar a dhéanamh dá scaoilfí é, eadhon:

• cosaint leas an phobail;
• príobháideachas agus sláine duine aonair lena mbaineann;
• leasanna tráchtála;
• Imeachtaí cúirte;
• comhairle dhlí; nó
• próiseas cinnteoireachta na gCúirteanna.

Má dhiúltaítear d’iarratas, nó mura bhfaighidh tú freagra laistigh den tréimhse a leagtar amach sa chinneadh, is féidir leat iarratas deimhnitheach a dhéanamh chuig an gCúirt laistigh de mhí. Ba cheart duit:

• An fhoirm iarratais chéanna a úsáid.
• A lua gur iarratas deimhnitheach é.
• An uimhir chlárúcháin a seoladh le hadmháil go bhfuil d’iarratas tosaigh faighte a thabhairt.

Cosaint sonraí

Tá próiseáil aon sonraí pearsanta a iontráladh ar an bhfoirm iarratais faoi réir na mbeartas cosanta a bunaíodh le Rialachán (AE) 2018/1725.

Chun tuilleadh eolais a fháil faoi chosaint sonraí, féach ár mbeartas cosanta sonraí.