Protezzjoni tad-data fil-kawżi

Funzjonijiet ġudizzjarji

Meta jaġixxu fil-kapaċità ġudizzjarja tagħhom, il-Qorti tal-Ġustizzja u l-Qorti Ġenerali għandhom jiġbru u jipproċessaw data personali sabiex jiżguraw l-iżvolġiment xieraq tal-proċeduri ġudizzjarji, jikkomunikaw l-atti proċedurali lill-partijiet ikkonċernati u jippubblikaw informazzjoni dwar kawżi pendenti jew magħluqa.

Dawn l-attivitajiet huma ggwidati minn rekwiżiti proċedurali speċifiċi li jirrispettaw il-prinċipji ta’ indipendenza u ta’ qorti bil-miftuħ. Tista’ ssib informazzjoni ddettaljata dwar il-proċeduri taż-żewġ Qrati fil-paġni li ġejjin:

• Testi proċedurali tal-Qorti tal-Ġustizzja
• Testi proċedurali tal-Qorti Ġenerali

Pubblikazzjoni tal-ismijiet u informazzjoni oħra fil-proċeduri

L-informazzjoni dwar il-proċeduri ġudizzjarji, inklużi l-ismijiet u informazzjoni oħra, ippubblikata online tista’ tiġi indiċjata u tkun aċċessibbli permezz ta’ muturi ta’ tfittxija. F’dan ir-rigward, il-persuni involuti f’kawża għandhom jeżaminaw bir-reqqa l-linji gwida tal-Qrati dwar it-talba għall-ommissjoni tad-data tagħhom fil-kuntest ta’ proċeduri ġudizzjarji

• Għoti tal-anonimat fil-proċeduri ġudizzjarji quddiem il-Qorti tal-Ġustizzja
• Ommissjoni ta’ data fil-konfront tal-pubbliku fil-kuntest ta’ proċeduri ġudizzjarji quddiem il-Qorti Ġenerali tal-Unjoni Ewropea

Kif tagħmel talba għall-ommissjoni ta’ data f’kawża

It-talbiet għall-ommissjoni ta’ data personali għandhom jitressqu quddiem il-Qorti kompetenti skont ir-regoli proċedurali applikabbli.

It-talbiet fil-kuntest ta’ kawżi pendenti għandhom isiru skont ir-regoli dwar il-komunikazzjoni mar-Reġistri matul il-proċeduri, kif deskritti fil-paġni li ġejjin:

• Preżentata ta’ dokumenti quddiem il-Qorti tal-Ġustizzja
• Preżentata ta’ dokumenti quddiem il-Qorti Ġenerali

Talbiet li ma jkunux jikkonċernaw kawżi pendenti jistgħu jsiru bil-posta jew bil-posta elettronika. Id-dettalji ta’ kuntatt tar-Reġistri ta’ kull Qorti jinsabu fil-paġni rispettivi tagħhom:

• Reġistru tal-Qorti tal-Ġustizzja
• Reġistru tal-Qorti Ġenerali

Trattament ta’ talbiet u lmenti

Meta r-Reġistratur tal-Qorti tal-Ġustizzja jew ir-Reġistratur tal-Qorti Ġenerali jkun responsabbli għal attività ta’ pproċessar ta’ data, pereżempju minħabba l-obbligi tagħhom bħala responsabbli għall-pubblikazzjonijiet tal-Qrati, inklużi deċiżjonijiet ġudizzjarji, huma għandhom jagħtu deċiżjoni fuq talba f’terminu ta’ xahrejn. In-nuqqas ta’ tweġiba f’dak il-limitu ta’ żmien għandu jitqies li jkun ċaħda impliċita tat-talba.

Ilment kontra d-deċiżjoni tar-Reġistratur jista’ jitressaq fi żmien xahrejn quddiem kumitat maħtur fil-Qorti tal-Ġustizzja jew fil-Qorti Ġenerali, responsabbli għall-iżgurar tal-osservanza tar-regoli fil-qasam tal-protezzjoni tad-data.

Tista’ ssib iktar informazzjoni dwar iċ-ċirkustanzi li fihom tista’ ssir talba jew ilment fi

• Deċiżjoni tal-Qorti tal-Ġustizzja tal‑1 ta’ Ottubru 2019 li tistabbilixxi mekkaniżmu intern ta’ superviżjoni fil-qasam tal-ipproċessar ta’ data personali mill-Qorti tal-Ġustizzja li taġixxi fil-kapaċità ġudizzjarja tagħha
• Deċiżjoni tal-Qorti Ġenerali tas‑16 ta’ Ottubru 2019 li tistabbilixxi mekkaniżmu intern ta’ superviżjoni fil-qasam tal-ipproċessar ta’ data personali mill-Qorti Ġenerali li taġixxi fil-kapaċità ġudizzjarja tagħha

Il-kumitat għandu jagħti deċiżjoni dwar l-ilment fi żmien erba’ xhur. Fin-nuqqas ta’ risposta wara dan it-terminu, dan ifisser li d-deċiżjoni tar-Reġistratur tkun ġiet ikkonfermata. Dawn il-kumitati jistgħu jieħdu deċiżjoni dwar deċiżjonijiet adottati mir-reġistratur ta’ waħda mill-Qrati biss meta jkunu l-kontrolluri responsabbli tad-data inkwistjoni. It-tressiq ta’ lment quddiem kumitat ma għandux jikkostitwixxi rimedju kontra deċiżjoni ġudizzjarja mogħtija mill-Qorti tal-Ġustizzja jew mill-Qorti Ġenerali.

Funzjonijiet mhux ġudizzjarji

Il-Qorti tal-Ġustizzja tista’ wkoll tintalab tipproċessa data personali meta taġixxi fl-eżerċizzju tal-funzjonijiet mhux ġudizzjarji tagħha, pereżempju fil-kuntest tal-attivitajiet amministrattivi tagħha.

Uffiċjal tal-Protezzjoni tad-Data

L-Uffiċjal tal-Protezzjoni tad-Data (UPD) għandu jiżgura li l-Qorti tal-Ġustizzja tikkonforma ruħha mar-Regolament (UE) 2018/1725 fil-qasam tal-funzjonijiet tiegħu. Dan ir-Regolament jirregola l-protezzjoni tad-data personali pproċessata mill-istituzzjonijiet u mill-aġenziji tal-Unjoni. L-UPD jagħti pariri wkoll lill-kontrolluri tad-data tal-Qorti tal-Ġustizzja dwar l-obbligi tagħhom fir-rigward tal-protezzjoni tad-data personali.

Jekk ikollok xi mistoqsijiet dwar l-ipproċessar ta’ data personali relatata mal-attivitajiet mhux ġudizzjarji tal-Istituzzjoni jew mal-użu tas-sit internet tal-Qorti tal-Ġustizzja, tista’ tuża l-formola ta’ kuntatt sabiex tikkuntattja lill-UPD.

Reġistru ċentrali tal-attivitajiet ta’ pproċessar

L-UPD iżomm reġistru għall-ipproċessar ta’ data personali kollha. Dan ikun fih, b’mod partikolari, informazzjoni dwar il-kontrollur tad-data, is-suġġett tad-data u l-għan tal-ipproċessar.

Tista’ tikkonsulta ir-reġistru ċentrali tal-attivitajiet ta’ pproċessar online.

Drittijiet tas-suġġetti tad-data

Is-suġġetti tad-data għandhom drittijiet skont id-dritt tal-Unjoni. B’mod partikolari, skont ir-Regolament (UE) 2018/1725, dawn id-drittijiet jinkludu

• id-dritt li jintalab aċċess għad-data mill-kontrollur tad-data
• id-dritt li tinkiseb ir-rettifika jew it-tħassir tad-data
• id-dritt li jiġi ristrett l-ipproċessar tad-data
• taħt ċerti kundizzjonijiet, id-dritt ta’ oġġezzjoni għall-ipproċessar tad-data abbażi tas-sitwazzjoni partikolari tas-suġġett tad-data

F’każijiet eċċezzjonali, il-Qorti tal-Ġustizzja tista’ tirrestrinġi l-kamp ta’ applikazzjoni ta’ ċerti drittijiet. Dawn ir-restrizzjonijiet ġew stabbiliti f’Deċiżjoni tal-Qorti tal-Ġustizzja tal‑2019 u huma suġġetti għal monitoraġġ u eżami mill-ġdid regolari. Kwalunkwe deċiżjoni sabiex jiġu ristretti d-drittijiet tas-suġġetti tad-data għandha tkun meħtieġa u proporzjonata għall-każ speċifiku. Tali sitwazzjonijiet jinkludu

• matul verifiki, investigazzjonijiet, awditi jew proċeduri interni oħra
• meta tintbagħat informazzjoni lill-Uffiċċju Ewropew ta’ Kontra l-Frodi (OLAF)
• f’kooperazzjoni ma’ istituzzjonijiet u aġenziji oħra tal-Unjoni, ma’ awtoritajiet tal-Istati Membri jew pajjiżi terzi, u ma’ organizzazzjonijiet internazzjonali
• meta d-dipartimenti amministrattivi jittrattaw kawżi ġudizzjarji li jinvolvu lill-Qorti tal-Ġustizzja bħala parti

Kontrollur Ewropew għall-Protezzjoni tad-Data

Il-Kontrollur Ewropew għall-Protezzjoni tad-Data (EDPS) huwa awtorità indipendenti li jieħu ħsieb tal-protezzjoni tad-data fl-istituzzjonijiet kollha tal-Unjoni, bl-eċċezzjoni tal-Qorti tal-Ġustizzja meta taġixxi fil-kapaċità ġudizzjarja tagħha.

Jekk tqis li d-data tiegħek ġiet ipproċessata b’mod żbaljat skont ir-Regolament (UE) 2018/1725, tista’ tressaq ilment quddiem l-EDPS.