Is é príomhról Chúirt Bhreithiúnais an Aontais Eorpaigh a chinntiú go gcuirtear dlíthe an Aontais i bhfeidhm go haonfhoirmeach agus go n-urramaítear iad ar fud an Aontais.

Le go leor de luathbhreithiúnais na Cúirte bunaíodh príomhphrionsabail a mhúnlaigh dlí an Aontais. Bhí gá leis na breithiúnais sin chun réiteach a fháil ar fhíorfhadhbanna a bhí roimh dhaoine ina saol agus a raibh ar chuideachtaí aghaidh a thabhairt orthu i mbun gnó.

I sraith rialuithe cinniúnacha le linn a staire, threisigh an Chúirt éifeachtacht dhlí an Aontais agus neartaigh sí cearta shaoránaigh an Aontais.

Seasann an tAontas i gcoinne an idirdhealaithe ar go leor bealaí agus tá ról ríthábhachtach ag Cúirt Bhreithiúnais an Aontais Eorpaigh maidir le rialacha frith-idirdhealaithe an Aontais a chur i bhfeidhm ar chásanna san fhíorshaol. Trína rialuithe, tá soiléiriú déanta ag an gCúirt ar chearta fostaithe, ag cinntiú go gcuirtear na rialacha frith-idirdhealaithe sin, lena dtugtar aghaidh ar idirdhealú bunaithe ar thosca mar reiligiún, eitneachas agus míchumas, i bhfeidhm go haonfhoirmeach agus i gceart ar fud an Aontais. Tá soiléireacht dhlíthiúil tugtha ag an gCúirt freisin ar shaincheisteanna a bhaineann le gnéithe eile dár saol ina bhféadfadh idirdhealú inscne nó eitneach teacht chun cinn.

Tugann dlí an Aontais cosaintí láidre do thomhaltóirí, agus é mar aidhm leis cóir chothrom a chinntiú agus iad ag déileáil le gnólachtaí — go háirithe i réimsí amhail conarthaí, sábháilteacht táirgí agus faisnéis shoiléir. Bhí ról ríthábhachtach ag Cúirt Bhreithiúnais an Aontais Eorpaigh roinnt uaireanta maidir leis na cosaintí sin a shoiléiriú agus a neartú. Idir chosaint tomhaltóirí ar théarmaí éagóracha conartha agus seasamh lena gcearta agus iad ag siopadóireacht ar líne, chuidigh an Chúirt le cearta tomhaltóirí a mhúnlú agus a fhorfheidhmiú ar fud an Aontais.

Ceanglaítear le dlí an Aontais go gcaithfear go cothrom le fir agus mná san áit oibre. Tá na rialacha sin curtha i bhfeidhm ag Cúirt Bhreithiúnais an Aontais Eorpaigh maidir le cásanna a tugadh os a comhair le breis agus 50 bliain. Tugadh aghaidh sna cásanna sin ar shaincheisteanna ríthábhachtacha lena n-áirítear comhionannas inscne ag an obair, pá comhionann agus sochair chomhionanna, agus dífhostú fostaithe mar gheall ar thoircheas. Trí na cásanna sin, mhúnlaigh an Chúirt an chaoi a ndéantar dlíthe an Aontais a léiriú agus a chur i bhfeidhm chun daoine aonair a chosaint ó idirdhealú ar bhonn inscne. 

Thar na blianta, bhí ról lárnach ag Cúirt Bhreithiúnais an Aontais Eorpaigh chun tírdhreach dhlíthiúil an spóirt a mhúnlú. Rialaigh sí ar shaincheisteanna lena n-áirítear saorghluaiseacht lúthchleasaithe, dlí na hiomaíochta agus craoladh spóirt. Trí chásanna cinniúnacha, Bosman san áireamh, bhí tionchar ag an gCúirt ar an gcaoi a n-eagraítear an spórt, ar an gcaoi a gcaitear le lúthchleasaithe, agus ar an gcaoi ar féidir linn féachaint ar spórt ar fud na hEorpa.

Rochtain ar ardoideachas, cabhair airgeadais le haghaidh staidéir thar lear, a chinneadh cén tír a bhfuil feidhm ag rialacha maoinithe mac léinn maidir le leanaí oibrithe trasteorann: bhí na saincheisteanna sin go léir ina n-ábhar do roinnt rialuithe ó Chúirt Bhreithiúnais an Aontais Eorpaigh. Trí chásanna den sórt sin a chinneadh, chuidigh an Chúirt le fadhbanna a bhíonn ag daoine óga atá ag taisteal laistigh den Aontas chun staidéar a dhéanamh a réiteach, rud a chinntíonn cóir chothrom maidir le rochtain ar oideachas.

Tá ról tábhachtach ag maoin intleachtúil i saol eacnamaíoch an Aontais Eorpaigh, go háirithe trí thrádmharcanna agus dearaí a úsáid. Cuireann trádmharcanna ar chumas cuideachtaí a mbrandaí a chosaint agus ag an am céanna cuidiú le tomhaltóirí tionscnamh an táirge nó na seirbhíse a shainaithint. Ó lár na 1990idí i leith, is féidir trádmharcanna a chlárú agus a chosaint ar leibhéal an Aontais. Mar sin féin, ní féidir gach rud a chlárú mar thrádmharc de chuid an Aontais, toisc go bhféadfadh sé sin teacht salach ar chearta daoine eile.

Ar an gcaoi chéanna, is féidir cosaint a dheonú freisin do dhearaí atá nua agus a bhfuil carachtar aonair acu.

I ndíospóidí maidir leis an méid is féidir a chosaint, déanann Cúirt Ghinearálta an Aontais Eorpaigh dlí an Aontais maidir le trádmharcanna agus dearaí a léiriú agus a chur i bhfeidhm.