Arkivji storiċi
L-Arkivji Storiċi tal-Unjoni Ewropea, inklużi l-arkivji tal-Qorti tal-Ġustizzja tal-Unjoni Ewropea, huma aċċessibbli għall-pubbliku. Dawn huma bbażati fl-Istitut Universitarju Ewropew (EUI) f’Firenze. Tista’ titlob aċċess għall-arkivji billi tikkuntattja lill-EUI.
Skont ir-regoli adottati fl‑1983, fl‑2003 u fl‑2015, l-istituzzjonijiet tal-Unjoni għandhom ikollhom arkivji storiċi miftuħa għall-pubbliku.
B’riżultat tad-deċiżjoni meħuda mill-Qorti tal-Ġustizzja fl‑2014, l-arkivji tal-Qorti tal-Ġustizzja huma bbażati fl-Istitut Universitarju Ewropew (EUI) f’Firenze, l-Italja. Hawnhekk, huma aċċessibbli għaċ-ċittadini tal-Unjoni, inklużi riċerkaturi akkademiċi u storiċi.
Għal iktar informazzjoni dwar l-aċċess għall-arkivji, ara l-paġna tas-sit internet tal-EUI dwar l-Arkivji Storiċi tal-Unjoni Ewropea.
Liema dokumenti huma inklużi?
L-Arkivji Storiċi fihom dokumenti prodotti jew riċevuti mill-istituzzjonijiet tal-Unjoni bħala parti mill-ħidma tagħhom, sakemm
- dawn ikunu ntgħażlu sabiex jinżammu b’mod permanenti
- ikollhom iktar minn 30 sena
Il-Qorti tal-Ġustizzja ddeċidiet li tagħti aċċess mhux biss għad-dokumenti amministrattivi, iżda wkoll għall-arkivji ġudizzjarji. Il-materjali aċċessibbli kollha huma kkatalogati fl-inventarju tal-Arkivji Storiċi tal-Unjoni Ewropea.
Madankollu, l-aċċess għall-arkivji ma huwiex awtomatiku: it-talbiet kollha għall-aċċess huma suġġetti għal eżami minn qabel.
Talba għal aċċess
Sabiex titlob aċċess għal fajl wieħed jew iktar mill-Arkivji Storiċi, jekk jogħġbok ibgħat messaġġ elettroniku fuq archiv@eui.eu.
Din it-talba tiġi eżaminata bir-reqqa, filwaqt li jitqiesu, pereżempju
- id-dritt għall-protezzjoni tal-ħajja privata
- interessi kummerċjali
- is-segretezza tad-deliberazzjonijiet
B’riżultat ta’ dan, iż-żmien meħtieġ għall-ipproċessar tat-talba jista’ jvarja skont il-kumplessità jew il-volum tal-fajl.
Konsultazzjoni tal-arkivji
Jekk tingħata aċċess, tista’ tikkonsulta d-dokumenti fl-EUI f’Firenze jew permezz tad-database online mingħajr ħlas.
Għal iktar informazzjoni dwar il-modalitajiet ta’ konsultazzjoni, ara d-deċiżjoni meħuda mill-Qorti tal-Ġustizzja fl‑2014.
Informazzjoni u kuntatt
Jekk għandek xi mistoqsijiet oħra, tista’ tibgħat messaġġ elettroniku lid-dipartiment tal-Qorti tal-Ġustizzja responsabbli għall-ġestjoni tal-arkivji storiċi fuq Curia-archives-historiques@curia.europa.eu.
