Cuairt oifigiúil ar an gCróit

An 25 agus an 26 Bealtaine 2026, thug toscaireacht ó Chúirt Bhreithiúnais an Aontais Eorpaigh cuairt oifigiúil ar an gCróit. Bhí an toscaireacht faoi stiúir Koen Lenaerts, Uachtarán na Cúirte Breithiúnais, agus Thomas van Danwitz, Leas-Uachtarán, agus bhí Comhaltaí na Cúirte Breithiúnas ón gCróit, an Breitheamh Siniša Rodin agus an tAbhcóide Ginearálta Tamara Ćapeta ina measc.

Tharla an chuairt i gcomhthéacs an dlúthchaidrimh leanúnaigh a choimeádann an Chúirt le cúirteanna náisiúnta sna Ballstáit agus bhí deis ann chun idirphlé breithiúnach a neartú a thuilleadh.

Dé Luain an 25 Bealtaine, bhailigh comhaltaí na toscaireachta ag an Leabharlann Náisiúnta agus Ollscoile i Ságrab, le comhaltaí Chúirt Uachtarach Phoblacht na Cróite, lena n-áirítear Uachtarán na cúirte sin, Mirta Matić; comhaltaí Chúirt Bhunreachtúil Phoblacht na Cróite, lena n-áirítear Uachtarán na cúirte sin, Frane Staničić; ionadaithe ó Pharlaimint na Cróite, agus Príomh-Aire na Cróite, Andrej Plenković. Ghlac na rannpháirtithe páirt i roinnt seisiúin oibre, a chlúdaigh na nithe seo a leanas:

  • ról na gcúirteanna uachtaracha maidir le cur i bhfeidhm aonfhoirmeach an dlí a chinntiú, i bhfianaise bhreithiúnais na Cúirte Breithiúnais i gcásanna C-554/21 Hann-Invest agus C-144/23 Kubera
  • an smacht reachta agus neamhspleáchas na mbreithiúna

San iarnóin, thug an toscaireacht cuairt ar Chúirt Uachtarach Phoblacht na Cróite, agus tugadh cuir i láthair ar na hábhair seo a leanas:

  • láimhseáil cásanna os comhair Chúirt Bhreithiúnais an Aontais Eorpaigh
  • ról agus obair na nAbhcóidí Ginearálta

Dé Máirt an 26 Bealtaine, bhuail an tUachtarán Lenaerts, an Leas-Uachtarán von Danwitz agus an Breitheamh Rodin leis an bPríomh-Aire Plenković. Ina dhiaidh sin, thug an toscaireacht cuairt ar Chúirt Bhunreachtúil Phoblacht na Cróite, agus phléigh siad cleachtas na Cúirte Bunreachtúla maidir le nós imeachta um réamhrialú na Cúirte Breithiúnais, chomh maith leis an gcaidreamh idir cearta bunreachtúla agus na cearta a ráthaítear leis an gCoinbhinsiún Eorpach um Chearta an Duine.