Trédhearcacht

Réamhrá

Cumhdaítear trédhearcacht in Airteagal 15 den Chonradh ar Fheidhmiú an Aontais Eorpaigh, lena ndeirtear go bhfuil sé d’oibleagáid ar institiúidí an Aontais a gcuid oibre a sheoladh ar dhóigh chomh hoscailte agus is féidir.

Áirithítear le hAirteagal 15 freisin, faoi réir coinníollacha áirithe, go bhfuil ceart rochtana ar dhoiciméid ag saoránaigh uile an Aontais de chuid institiúidí an Aontais. Cuireann Cúirt Bhreithiúnais an Aontais Eorpaigh an prionsabal seo san áireamh freisin agus tá cinneadh glactha aici ina leagtar amach na rialacha maidir le rochtain phoiblí ar a doiciméid riaracháin.

Tá sé mar aidhm ag an gCúirt a oiread faisnéise agus is féidir a chur ar fáil tríd an suíomh seo.

Cásanna

Ní chumhdaítear obair bhreithiúnach na Cúirte le rialacha an Aontais maidir le trédhearcacht agus rochtain ar dhoiciméid. Mar sin féin, ní chiallaíonn sé sin go bhfeidhmíonn an Chúirt faoi rún.

Tá an Chúirt tiomanta d’ardleibhéal trédhearcachta a choinneáil agus í i mbun a cuid oibre. Tá sé d’aidhm aici an oiread eolais is féidir a chur ar fáil faoi gach cás.

Mar riail ghinearálta, is féidir gach eolas atá ar fáil go poiblí faoi chás a fháil sa bhunachar sonraí cásdlí. Áirítear leis seo:

• eolas faoin gcás féin, amhail uimhir aitheantais an cháis, ainm an cháis, an dáta ar taisceadh an t‑iarratas agus teanga an cháis
• tarchuir ar réamhrialú a rinneadh tar éis an 1 Iúil 2018
• fógraí iarratais, na príomhargóintí san áireamh
• barúlacha agus pléadálacha ó pháirtithe agus ó Bhallstáit le linn tarchuir chun réamhrialú (ar fáil tar éis dhúnadh an cháis, mura rud é go gcuireann an t‑údar ina choinne)
• tuairimí
• orduithe
• breithiúnais

Ina theannta sin, is imeachtaí poiblí iad éisteachtaí na Cúirte de ghnáth. Déantar éisteachtaí níos tábhachtaí na Cúirte Breithiúnais a shruthú ar ár suíomh gréasáin agus tá siad ar fáil le breathnú orthu ar feadh mí amháin tar éis na héisteachta.

Chun tuilleadh eolais a fháil faoi conas cásanna a leanúint, féach ár leathanach eolas poiblí ar chásanna.

Comhaltaí na Cúirte

Tá faisnéis faoi Bhreithiúna, Abhcóidí Ginearálta agus Cláraitheoirí na Cúirte, ar a dtugtar ‘Comhaltaí’ na Cúirte, faoi réir ceanglais trédhearcachta áirithe freisin. Leagtar amach iad i gCód Iompair na gComhaltaí.

Is féidir CV gach Comhalta a fháil i roinn na gComhaltaí ar shuíomh gréasáin na Cúirte.

Cuirtear faisnéis bhreise faoi Chomhaltaí ar fáil freisin, lena n‑áirítear

• dearbhú airgeadais ina liostaítear sealúchais airgeadais gach Comhalta
• gníomhaíochtaí seachtracha gach Comhalta, lena n‑áirítear costas gach gníomhaíochta don Chúirt

Chun tuilleadh eolais a fháil, féach ár leathanach ar Eitic.

Rochtain ar dhoiciméid riaracháin

Tugann an Chúirt aird ar rialacha an Aontais maidir le rochtain ar dhoiciméid a bhaineann lena feidhmeanna riaracháin. Is é obair riaracháin na Cúirte aon obair nach mbaineann go díreach le cás.

Ghlac an Chúirt cinneadh ina leagtar amach na rialacha maidir le rochtain phoiblí ar na doiciméid seo.

Tá tuilleadh eolais faoin méid sin agus sonraí faoi conas iarratas a dhéanamh ar rochtain ar dhoiciméid riaracháin le fáil ar ár leathanach maidir le Rochtain ar dhoiciméid riaracháin.

Cartlanna stairiúla

Tá rialacha speisialta i bhfeidhm maidir le doiciméid atá níos sine ná 30 bliain d’aois.

Is í an Institiúid Ollscoile Eorpach (IOE) i bhFlórans a bhainistíonn cartlann stairiúil na Cúirte. Chun tuilleadh eolais a fháil, féach: Cartlann Stairiúil.