Cosaint sonraí le linn do chuairte ar an gCúirt

Cuairteanna a eagrú

Bailíonn an Chúirt sonraí pearsanta agus cuairteanna á n-eagrú aici. Cuidíonn sé sin le teagmháil agus comhfhreagras éifeachtach leis na cuairteoirí a chinntiú, agus na cuairteanna a chur in oiriúint do theanga, d’eolas agus do spéiseanna na gcuairteoirí.

Is í an Stiúrthóireacht um Prótacal agus Chuairteanna a bhainistíonn na sonraí a bhailítear agus ní chomhroinntear iad ach leis na dreamanna seo a leanas:

• eagraithe na gcuairteanna
• na baill foirne a bhuaileann leis na cuairteoirí
• an Stiúrthóireacht Ateangaireachta, más gá ateangaireacht
• na comhlachtaí atá inniúil chun seiceálacha a dhéanamh faoin reachtaíocht, i gcás inarb infheidhme

Láimhseáiltear na sonraí sin ar feadh na tréimhse is gá chun an chuairt a eagrú agus a reáchtáil agus scriostar iad tráth nach déanaí ná sé bliana tar éis na cuairte.

Faoi Rialachán (AE) 2018/1725, tá sé de cheart agat rochtain a fháil ar shonraí a bhaineann leat agus, más gá, na sonraí a cheartú.

Chun tuilleadh eolais a fháil faoi chosaint sonraí le linn cuairteanna nó chun rochtain a fháil ar do shonraí atá á gcoinneáil, déan teagmháil leis an Stiúrthóireacht um Prótacal agus Chuairteanna.

Féadfaidh tú teagmháil a dhéanamh freisin leis an Maoirseoir Eorpach ar Chosaint Sonraí am ar bith.

Sruthú na n-éisteachtaí

Cuireann an Chúirt córas sruthaithe ar líne ar fáil le haghaidh éisteachtaí poiblí, breithiúnais agus Tuairimí Abhcóidí Ginearálta a thabhairt, agus suíonna agus imeachtaí foirmiúla áirithe.

Déantar gach iarracht chun a áirithiú nach ndéanfar an pobal atá ag freastal ar an éisteacht a thaifead ar fhíseán. Mar riail ghinearálta, níl ach na breithiúna agus iad siúd atá ag pléadáil os comhair na Cúirte le feiceáil.

Níl an pobal le feiceáil ach i seatanna leathana a thógtar ó chúl an tseomra cúirte.

Tá suíocháin áirithe i ngach seomra cúirte nach féidir a fheiceáil ar cheamara dóibh siúd ar mian leo a chinntiú nach bhfeictear iad.

Físfhaireachas agus fístaifeadadh

Tá córas físfhaireachais i bhfeidhm ag an gCúirt, lena gcumhdaítear an taobh istigh agus an taobh amuigh araon dá foirgnimh. Is é is aidhm dó sin gach duine a théann isteach ina áitreabh a chosaint, chomh maith leis na nithe agus an fhaisnéis atá sna foirgnimh. Coinnítear píosaí taifeadta scannánaíochta ar feadh tréimhse theoranta agus ní féidir ach le líon beag pearsanra údaraithe rochtain a fháil orthu.

Comhlíontar le húsáid ceamaraí agus taifeadadh íomhánna na dlíthe ábhartha maidir le cosaint sonraí pearsanta agus príobháideachas. Cuirtear comharthaíocht shoiléir, lena n-áirítear picteagraim, gar do limistéir a ndéantar faireachán orthu chun daoine aonair a chur ar an eolas faoi láithreacht an chórais físfhaireachais.

Chun tuilleadh sonraí a fháil faoin bhfístaifeadadh, féach ár mbeartas físfhaireachais, chomh maith lenár bhfógra faisnéise maidir le físfhaireachas.

Rialú rochtana

Tá córas curtha i bhfeidhm ag an gCúirt chun rochtain ar a foirgnimh agus laistigh díobh a rialú. Is é is aidhm dó sin an riosca ionraidh nó gníomhartha mailíseacha a laghdú, rud a chinnteoidh sábháilteacht daoine aonair, faisnéise agus maoine.

Feidhmíonn an córas sin i gcomhréir le rialacha slándála inmheánaí na Cúirte.

Chun tuilleadh eolais a fháil faoin gcóras rialaithe rochtana, féach ár bhfógra faisnéise maidir le rialú rochtana.

Tuairisciú Teagmhas

Tá nósanna imeachta bunaithe ag an gCúirt chun aghaidh a thabhairt ar aon aimhrialtachtaí, mífheidhmeanna, iarrataí ar chúnamh éigeandála, nó saincheisteanna a bhaineann le sábháilteacht agus slándáil daoine aonair, maoine nó foirgneamh trí chóras inmheánach tuairiscithe teagmhas.

Chun tuilleadh eolais a fháil faoi thuarascálacha ar theagmhais, féach ár bhfógra faisnéise maidir le tuairisciú teagmhas.