L-identità Ewropea tiżviluppa permezz tal-kondiviżjoni u tat-taħlit ta’ kulturi nazzjonali differenti. Fil-Qorti tal-Ġustizzja, fejn it-tradizzjonijiet legali differenti madwar l-Ewropa jinteraġixxu kuljum, l-arti titqies li hija element importanti ta’ din il-kultura Ewropea kondiviża.

Permezz tas-sostenn tal-Istati Membri, il-Qorti tal-Ġustizzja żżomm kollezzjoni ta’ xogħlijiet ta’ arti li tirrifletti l-wirt multikulturali tal-Ewropa. Dawn ix-xogħlijiet juru t-tradizzjonijiet uniċi ta’ kull Stat Membru filwaqt li jikkontribwixxu wkoll għall-espressjoni ta’ spirtu Ewropew komuni.

Ix-xogħlijiet ta’ arti, li ġew mogħtija, mislufa jew fdati lilha, ivarjaw skont l-istil u l-età tagħhom. Dawn spiss jirrappreżentaw temi bħall-Ewropa, il-ġustizzja, l-armonija, il-kooperazzjoni u l-paċi.

Il-kollezzjoni bdiet b’xogħol ta’ arti misluf minn Franza fl‑1969 bħala dekorazzjoni għall-ewwel awla tal-Qorti tal-Ġustizzja. Dan kien segwit minn ħidma kkummissjonata mil-Lussemburgu, minn artisti li jirrappreżentaw is-sitt Stati Membri fundaturi tal-Unjoni Ewropea, sabiex jiġi ddekorat il-Palazz, li ġie inawgurat fl‑1973. Minn dak iż-żmien ’il hawn, żdiedu xogħlijiet oħra. Il-kollezzjoni evolviet b’mod parallel mal-iżvilupp tal-integrazzjoni Ewropea u tal-istorja tal-Qorti tal-Ġustizzja nnifisha.

L-arkitettura tal-Qorti tal-Ġustizzja tiġbed l-attenzjoni u tikkostitwixxi qafas ideali għall-wiri ta’ dawn ix-xogħlijiet ta’ arti, li joriġinaw mill-Ewropa kollha. Kemm għall-membri tal-persunal kif ukoll għall-viżitaturi tal-Qorti tal-Ġustizzja, il-possibbiltà li tesperjenza d-diversità ta’ dawn ix-xogħlijiet tikkostitwixxi tfakkira qawwija tal-koeżistenza armonjuża tad-diversi kulturi tal-Istati Membri.