A | An bhliain in íomhánna
Feabhra
Formheas ó Pharlaimint na hEorpa maidir le haistriú páirteach na dlínse réamhrialaithe chuig an gCúirt Ghinearálta
Chun freagracht na dlíthíochta idir dhá Chúirt an Aontais Eorpaigh a athchothromú agus chun a chur ar chumas na Cúirte Breithiúnais díriú níos mó ar a ról mar chúirt bhunreachtúil agus uachtarach, sheol an Chúirt Bhreithiúnais iarraidh chuig reachtóir an Aontais, i mí na Samhna 2022, chun Reacht Chúirt Bhreithiúnais an Aontais Eorpaigh a leasú lena n-iarrtar aistriú páirteach dlínse réamhrialaithe chuig an gCúirt Ghinearálta. Tar éis roinnt míonna de scrúdú agus d’idirbheartaíocht mar chuid den phróiseas reachtach, d’fhormheas Parlaimint na hEorpa an t-athchóiriú tábhachtach sin an 27 Feabhra le tromlach mór.
Feabhra
Cruinniú idirnáisiúnta ‘Ceartas, na Glúine amach anseo agus an Comhshaol’ ag Comhairle Bhunreachtúil na Fraince
Chuaigh Koen Lenaerts, Uachtarán na Cúirte, go Páras le haghaidh cruinniú idirnáisiúnta a d’eagraigh an Chomhairle Bhunreachtúil agus an Institiúid um Staidéar agus Taighde ar an Dlí agus ar an gCeartas. Leis an gcomhdháil seo, nach raibh a leithéid ann riamh cheana, tháinig na céadta uachtarán agus breithiúna ó chúirteanna uachtaracha náisiúnta, réigiúnacha agus idirnáisiúnta le chéile chun plé a dhéanamh ar thionchar méadaitheach choincheap na ‘nglún amach anseo’ i gcásanna a bhaineann leis an gcomhshaol.
Márta
Cuairt Uachtarán Phoblacht na Seice, Petr Pavel
Chuir Koen Lenaerts, Uachtarán na Cúirte Breithiúnais, Jan Passer, Breitheamh den Chúirt Bhreithiúnais, Petra Škvařilová-Pelzl agus David Petrlík, Breithiúna den Chúirt Ghinearálta fáilte roimh Uachtarán Phoblacht na Seice, Petr Pavel. Le linn cruinniú le foireann institiúid náisiúntachta Phoblacht na Seice, bhí deis ag an toscaireacht breathnú ar phéinteáil Na cestě ón bpéintéir Seiceach Míla Doleželová, ar iasacht ó Ollscoil Masaryk, lena teachtaireacht dóchais, saoirse agus daonnachais.
© shutterstock.com
Márta
An chéad idirphlé bliantúil idir Parlaimint na hEorpa agus an Chúirt
Ag tógáil ar cháilíocht na malartuithe a tharla le linn an phlé ar an dréacht-Rialachán maidir le haistriú dhlínse réamhrialaithe na Cúirte Breithiúnais chuig an gCúirt Ghinearálta in ábhair shonracha áirithe, roghnaigh an Pharlaimint agus an Chúirt Bhreithiúnais leanúint dá n-idirphlé ar bhonn cruinniú bliantúil atá dírithe ar ábhair shuime choitinn i ndáil le dea-riarachán an cheartais agus le hurraim dhian ar scaradh na gcumhachtaí. Dhírigh na cruinnithe ar an dearcadh atá ag saoránaigh na hEorpa ar an gceartas agus ar an urraim don smacht reachta agus ar aon fheabhas a d’fhéadfaí a dhéanamh ar fheidhmiú an chórais bhreithiúnaigh, chun sprioc an cheartais a thabhairt níos gaire do shaoránaigh na hEorpa.
Márta
Gealltanas sollúnta ag triúr Comhaltaí nua de Chúirt Iniúchóirí na hEorpa
Arna gceapadh ag Comhairle an Aontais Eorpaigh, thug comhaltaí nua Chúirt Iniúchóirí na hEorpa, Katarína Kaszasová, Alejandro Blanco Fernández agus João Leão, a ngealltanas sollúnta os comhair na Cúirte.
Aibreán
Oscailt taispeántais stairiúil sa Chúirt
Osclaíodh taispeántas ar stair na hinstitiúide sa Chúirt. Comhdhéanta de ghrianghraif, saothair ealaíne agus nithe neamhchoitianta, agus taispeánann sé stair na gcúirteanna agus a foirgneamh agus tá fáilte roimh gach cuairteoir.
Aibreán
Babhta ceannais den chomórtas ‘European Law Moot Court’
In 1988 a eagraíodh ‘European Law Moot Court’ den chéad uair, agus tá sé ar an gcomórtas is mó ar domhan i réimse dhlí an Aontais Eorpaigh. Bhuaigh Ollscoil Mhaidrid eagrán 2024, a thug aghaidh ar an mbabhta ceannais i gcoinne Ollscoil Roma Tre na hIodáile.
Aibreán
Éisteacht shollúnta aitheasc
Tugtar ómós sollúnta do John L. Murray, breitheamh Éireannach ag an gCúirt Bhreithiúnais (1991-1999), a fuair bás i mí Eanáir 2023; Philippe Léger, Abhcóide Ginearálta na Fraince ag an gCúirt Bhreithiúnais (1994-2006), a fuair bás i mí Eanáir 2023, agus Waltraud Hakenberg, Cláraitheoir Bhinse na Seirbhíse Sibhialta (2005-2016), a fuair bás i mí Eanáir 2024.
Bealtaine
Fóram na mBreithiúna agus comhdháil mar chuid de chomóradh mhéadú 2004
I mBealtaine 2004, tháinig 10 mBallstát nua isteach san Aontas Eorpach: an tSeicia, an Eastóin, an Chipir, an Laitvia, an Liotuáin, an Ungáir, Málta, an Pholainn, an tSlóivéin agus an tSlóvaic. Chun comóradh 20 bliain na hócáide seo a cheiliúradh, reáchtáladh Fóram bliantúil na mBreithiúna agus comhdháil sa Chúirt.
Lietuvos nacionalinis muziejus / © Gediminas Trečiokas
Meitheamh
Cur i láthair ar shaothar ealaíne ‘LL’ ón ealaíontóir Liotuánach Kazys Varnelis
Tháinig saothar ealaíne ‘LL’ (1972) ón ealaíontóir Liotuánach Kazys Varnelis os comhair na Cúirte, i láthair an Uachtaráin, Koen Lenaerts, Leas-Aire Dlí agus Cirt na Liotuáine, Jurga Greičienė, agus Cheann roinn íocónagrafaíochta Ard-Mhúsaem na Liotuáine, Jolanta Bernotaitytė.
Meitheamh
Cuairt thoscaireacht na Cúirte Ginearálta i Vársá
Thaisteal toscaireacht ón gCúirt Ghinearálta, ina raibh an tUachtarán Marc van der Woude, breithiúna Polannacha Krystyna Kowalik-Bańczyk agus Nina Półtorak, chomh maith leis an mbreitheamh Liotuánach Saulius Lukas Kalėda, go Vársá, chuig cruinniú arna eagrú ag Cúirt Uachtarach Riaracháin na Polainne agus chuig Barra Vársá, chun ról na Cúirte Ginearálta a chur i láthair agus chun naisc a neartú leis na cúirteanna náisiúnta a dhéileálann leis na hábhair lena mbaineann aistriú páirteach na dlínse réamhrialaithe chuig an gCúirt Ghinearálta.
Meán Fómhair
Leasuithe ar rialacha nós imeachta na Cúirte Breithiúnais
Tháinig leasuithe tábhachtacha ar Rialacha Nós Imeachta na Cúirte Breithiúnais agus na Cúirte Ginearálta i bhfeidhm an 1 Meán Fómhair. Cuireadh chun feidhme leo na leasuithe ar Reacht na Cúirte Breithiúnais i gcomhthéacs aistriú páirteach dlínse réamhrialaithe chuig an gCúirt Ghinearálta, is infheidhme ón 1 Deireadh Fómhair, agus rinneadh nuachóiriú leo ar na himeachtaí os comhair an dá chúirt.
Meán Fómhair
Cuairt ó thoscaireacht Chúirt Uachtarach na Stát Aontaithe
Ag leanúint leis na cruinnithe rialta a bhí ar siúl ó 1998, neartaigh an chuairt seo na dlúthnaisc stairiúla idir Cúirt Uachtarach na Stát Aontaithe agus an Chúirt Bhreithiúnais
Meán Fómhair
Suiteáil Saothar ealaíne sa Ghairdín Ilteangachais
Cuireadh saothar ealaíne Genus, a chruthaigh an t-ealaíontóir Lucsamburgach Simone Decker, i nGairdín an Ilteangachais, ar imeall fhearainn na Cúirte. Dearadh go sonrach don Chúirt é, spreagadh ón ilteangachas é agus is siombail d’éagsúlacht teanga agus chultúrtha an Aontais é.
© shutterstock.com
Deireadh Fómhair
Aistriú páirteach na dlínse réamhrialaithe
Tháinig na rialacha a bhaineann le haistriú páirteach dhlínse réamhrialaithe na Cúirte Breithiúnais chuig an gCúirt Ghinearálta i bhfeidhm an 1 Deireadh Fómhair. I sé ábhar shonracha, is í an Chúirt Ghinearálta a dhéileálfaidh le cásanna réamhrialaithe a thionscnaítear ón lá inniu ar aghaidh. Bhí an chéad iarraidh ar réamhrialú a aistríodh chuig an gCúirt Ghinearálta an 17 Deireadh Fómhair (T-534/24 Gotek) i gCróitis agus is é an Tribunal administratif d’Osijek (Cúirt Riaracháin, Osijek) a rinne í.
Deireadh Fómhair
Athnuachan pháirteach na Cúirte Breithiúnais agus tosú sheirbhís chomhaltaí nua na Cúirte Ginearálta
Tionóladh éisteacht shollúnta i Mór-Sheomra na Cúirte Breithiúnais, ar an gcéad dul síos, ar chríochnú sheirbhís Lars Bay Larsen, Alexandra Prechal, Jean-Claude Bonichot agus Peter George Xuereb, Lucia Serena Rossi, Priit Pikamäe, Nils Wahl agus Anthony Michael Collins, agus, ar an dara dul síos, mionn naonúr comhaltaí nua den Chúirt Bhreithiúnais, eadhon Bernardus Smulders, Massimo Condinanzi, Fredrik Schalin, Stéphane Gervasoni, Niels Fenger agus Ramona Frendo, mar Bhreithiúna, Dean Spielmann, Andrea Biondi agus Rimvydas Norkus mar Abhcóidí Ginearálta, agus beirt Bhreithiúna nua den Chúirt Ghinearálta, Hervé Cassagnabère agus Raphaël Meyer.
Deireadh Fómhair
Toghadh an Uachtaráin, an Leas-Uachtaráin agus an chéad Abhcóide Ghinearálta de chuid na Cúirte Breithiúnais.
Atogh a chomhghleacaithe Koen Lenaerts ina Uachtarán ar Chúirt Bhreithiúnais an Aontais Eorpaigh go ceann 3 bliana. Toghadh Thomas von Danwitz ina Leas-Uachtarán ar an gCúirt Bhreithiúnais freisin, agus tháinig sé i gcomharbas ar Lars Bay Larsen. Atoghadh Maciej Szpunar ina Chéad Abhcóide Ginearálta den Chúirt Bhreithiúnais.
© shutterstock.com
Samhain
Mí oiliúna na hIntleachta Saorga
Beartaíodh leis an bhfeachtas oiliúna maidir leis an Intleacht Shaorga (IS) na deiseanna agus na dúshláin a bhaineann lena húsáid a chur i láthair. An aidhm a bhí ann ná soiléiriú a dhéanamh ar réimse IS agus úsáid eiticiúil agus fhreagrach na n-uirlisí bunaithe ar an teicneolaíocht sin a chur chun cinn.
Samhain
Gealltanas sollúnta ag triúr Comhaltaí nua de Chúirt Iniúchóirí na hEorpa
Arna gceapadh ag Comhairle an Aontais Eorpaigh, thug comhaltaí nua Chúirt Iniúchóirí na hEorpa, Petri Sarvamaa, Hans Lindblad agus Carlo Alberto Manfredi Selvaggi a ngealltanas sollúnta os comhair na Cúirte.
Samhain
Cuairt na Cúirte Breithiúnais ar an gCúirt Eorpach um Chearta an Duine
Thaisteal Uachtarán na Cúirte Koen Lenaerts, in éineacht le toscaireacht ón gCúirt Bhreithiúnais, chuig Cúirt Eorpach um Chearta an Duine don chruinniú bhliantúil. Clúdaíodh trí phríomhábhar sa phlé: ‘Athrú aeráide: dúshlán do dhá chúirt Eorpacha’, ‘Faireachas ar scála mór agus cosaint sonraí pearsanta’ agus ‘Cearta daoine faoi mhíchumas a chosaint’.
Samhain
An séú cruinniú de chomhfhreagraithe EJN sa Bhruiséil
Tionóladh an séú cruinniú de chomhfhreagraithe Ghréasán Breithiúnach an Aontais sa Bhruiséil, den chéad uair lasmuigh de Lucsamburg, faoi choimirce Chomhairle Stáit na Beilge. Díríodh ar thodhchaí an chomhair laistigh de EJN agus ar an gceist maidir le cur i bhfeidhm phrionsabal an léirmhínithe chomhsheasmhaigh ag cúirteanna náisiúnta sa chruinniú.
Nollaig
Lá Feasachta Míchumais sa Chúirt
D’eagraigh an Institiúid, atá tiomanta go hiomlán don inrochtaineacht agus don chuimsiú trí thionscnaimh éagsúla, Lá Feasachta Míchumais, arb é téama na bliana seo ná ‘Cuimsiú tríd an spórt: an éagsúlacht, ár neart’.
B | An bhliain i bhfigiúirí
An Institiúid in 2024
An bhliain bhreithiúnach (an Chúirt Bhreithiúnais agus an Chúirt Ghinearálta)
e-Curia: feidhmchlár chun doiciméid dhlíthiúla a mhalartú leis an gCúirt
Na seirbhísí teanga
Mar institiúid bhreithiúnach ilteangach, ní mór don Chúirt a bheith in ann déileáil le cás, beag beann ar theanga oifigiúil an Aontais inar tugadh an cás isteach. Cinntíonn sí ansin go scaiptear a cásdlí sna teangacha oifigiúla go léir.
An tIlteangachas ag Cúirt Bhreithiúnais an Aontais Eorpaigh – rochtain chomhionann ar an gceartas a chinntiú