TÁIRGÍ BIA AGUS DEOCHANNA

Sa lá atá inniu ann, is ceist an tábhachtach do thomhaltóirí é an cothú, agus tomhaltóirí ag iarraidh eolas ceart a bheith acu faoin mbia agus faoi na deochanna a cheannaíonn siad agus iad ag éirí níos feasaí faoin tábhacht a bhaineann le réim chothrom bia.

Ceanglais lipéadaithe ar phacáistíocht

In 2015, dhearbhaigh an Chúirt nach mór eolas ceart, neodrach agus oibiachtúil a bheith ar fáil do thomhaltóirí. Dá bhrí sin, má thugtar le fios le pacáiste táirge go bhfuil comhábhar áirithe i dtáirge, ach, i ndáiríre, nach bhfuil an comhábhar sin ann, d’fhéadfaí an tomhaltóir a chur amú, fiú má tá liosta na gcomhábhar i gceart. B’amhlaidh an cás maidir le tae torthaí ar taispeánadh sútha craobh agus bláthanna fanaile ar a phacáiste, d’ainneoin nach raibh aon chomhábhar nádúrtha súanna craobh ná bláth fanaile ann (breithiúnas an 4 Meitheamh 2015, Teekanne, C-195/14).

Thairis sin, ní mór do mhéid an tsóidiam a luaitear ar phacáistiú buidéal uisce mianraí an méid iomlán sóidiam a léiriú ina fhoirmeacha go léir (salann mín agus décharbónáit sóidiam). D’fhéadfaí an tomhaltóir a chur amú dá gcuirfí uisce mianraí i láthair mar a bheith ar bheagán salainn, d’ainneoin go bhfuil leibhéal ard décharbónáite sóidiam ann (breithiúnas an 17 Nollaig 2015, Neptune Distribution, C-157/14).

Maímh maidir le sláinte agus ainmniúcháin

In 2017, chinn an Chúirt go raibh an ceart ag an gCoimisiún nuair a dhiúltaigh sé cead a thabhairt i leith maímh áirithe sláinte a úsáid agus glúcós á mhargú, amhail “tá baint ag glúcós le meitibileacht normálta fuinnimh” nó “tacaíonn glúcós le gníomhaíocht choirp normálta”. Is amhlaidh go gcuirtear tomhaltas siúcra chun cinn le maímh den sórt sin, rud atá contráilte le prionsabail sláinte agus chothaitheacha a nglactar leo go ginearálta (breithiúnas an 8 Meitheamh 2017, Dextro Energy v an Coimisiún, C-296/16 P).

Ina theannta sin, ní féidir táirgí atá déanta de phlandaí amháin a mhargú, i bprionsabal, faoi ainmneacha amhail “bainne”, “uachtar”, “im”, “cáis” nó “iógairt”, ainmneacha atá coimeádta do tháirgí de bhunús ainmhíoch go príomha. Dá bhrí sin, ní féidir le cuideachta úsáid a bhaint as na hainmneacha “bainne soighe”, “im tófú” nó “cáis planda”, ach tá eisceachtaí áirithe ann arna leagan síos i reachtaíocht an Aontais, amhail, mar shampla, “uachtar ríse” (breithiúnas an 14 Meitheamh 2017, Tofu Town.com, C-422/16).