Léiriú ginearálta

Add

Rugadh an tUasal Ricardo da Silva Passos i Liospóin (an Phortaingéil) sa bhliain 1953. Bhain sé céim sa dlí amach ó Universidade Clássica de Lisboa (Ollscoil Chlasaiceach Liospóin, an Phortaingéil) in 1975 agus bhain sé dioplóma ardléinn amach ó Université de Strasbourg (Ollscoil Strasbourg, an Fhrainc) in 1978. Ansin chríochnaigh sé a chuid staidéir in Harvard University (Ollscoil Harvard, na Stáit Aontaithe) agus bhain sé máistreacht sa dlí amach ann in 1984.

Ó 1975, chomhlíon sé a dhualgais ar feadh bliain amháin mar leas-ionchúisitheoir poiblí na poblachta ag Tribunal Judicial da Comarca de Cascais (Cúirt Dúiche Cascais, an Phortaingéil) sula ndeachaigh sé isteach i Rúnaíocht an Choimisiúin Eorpaigh um Chearta an Duine (Comhairle na hEorpa - Strasbourg, an Fhrainc) mar dhlíodóir ó 1978 go 1986. In 1986, chuaigh isteach sa Chúirt Bhreithiúnais mar rúnaí dlí leis an mbreitheamh José Carlos de Carvalho Moitinho de Almeida.

Ó 1988 go 1999 ceapadh mar cheann roinne ar Rúnaíocht an Choiste um Ghnóthaí Dlíthiúla agus um Chearta na Saoránach é i bParlaimint na hEorpa áit ar tháinig sé chun a bheith ina cheann aonaid i Seirbhís Dlí Pharlaimint na hEorpa idir 1999 agus 2010. Ina dhiaidh sin, sa tseirbhís chéanna, bhí sé ina stiúrthóir um Ghnóthaí Institiúideacha agus Parlaiminte ó 2010 go 2016. In 2002, ceapadh é mar chomhalta de Rúnaíocht an Choinbhinsiúin ar Thodhchaí na hEorpa.

Ceapadh an tUasal da Silva Passos mar bhreitheamh den Chúirt Ghinearálta ar an 19 Meán Fómhair 2016 agus thogh a chomhghleacaithe é mar uachtarán an dlísheomra ar an 30 Meán Fómhair 2019.

Rugadh Juraq Schwarcz sa bhliain 1952 in Košice (an tSlóvaic). Bhain sé máistreacht sa dlí amach in 1975 agus dochtúireacht sa dlí amach in 1979 ó Univerzita Komenského v Bratislave (Ollscoil Comenius, an Bhratasláiv, an tSlóvaic).

Chuir sé tús lena shlí bheatha ghairmiúil mar dhlíodóir cuideachta ó 1975 go 1990 agus, in 1991, chuaigh sé isteach i mbreithiúna a thíre dúchais mar chláraitheoir le freagracht as an gclár tráchtála ag an Mestský súd v Košiciach (Cúirt Chathrach, Košice, an tSlóváic). An bhliain dár gcionn, ceapadh ina bhreitheamh den chúirt sin é. Idir 1992 agus 2009, shuigh sé freisin mar bhreitheamh ag an Krajský súd v Košiciach (Cúirt Réigiúnach Košice, an tSlóvaic) agus idir 1994 agus 2009, bhí sé mar Uachtarán an Dlísheomra. Idir 2005 agus 2009, ainmníodh é mar uachtarán Choláiste an Dlí Tráchtála. In 2004, chuaigh sé isteach i nDlísheomra an Dlí Tráchtála de Najvyšší súd Slovenskej republiky (Cúirt Uachtarach Phoblacht na Slóvaice) mar bhreitheamh ar iasacht ar feadh bliain amháin.

Ó 1997 go 2009, bhí sé ina chomhalta seachtrach de Roinn an Dlí Tráchtála agus Gnó in Univerzita Pavla Jozefa Šafárika v Košiciach (Ollscoil Pavol Josef Šafárik, Košice, an tSlóvaic) agus ina chomhalta den fhoireann teagaisc ag Justičná akadémia Slovenskej republiky (Acadamh na mBreithiúna de Phoblacht na Slóvaice) ó 2005 go 2009.

Ceapadh an tUasal Schwarcz ina bhreitheamh den Chúirt Ghinearálta ar an 7 Deireadh Fómhair 2009.

Rugadh Mariyana Kancheva in 1958 in Tryavna (an Bhulgáir). Bhain sí céim sa dlí amach in 1984 ó Sofiyski universitet “Sveti Kliment Ohridski” (Ollscoil Shóifia “Naomh Kliment Ohridski”, an Bhulgáir), agus máistreacht sa dlí Eorpach in 2009 ó Institut d’études européennes (an Institiúid um Léann Eorpach) de Université libre de Bruxelles (Saor-Ollscoil na Bruiséile, an Bheilg).

Chuir sí tús lena slí bheatha ghairmiúil mar bhreitheamh faoi oiliúint ag Sofiyski Okrazhen Sad (Cúirt Réigiúnach Shóifia, an Bhulgáir) idir 1985 agus 1986. Bhí sí ina comhairleoir dlí ó 1986 go 1988, roimh di tosú mar dhlíodóir ag Barra Shóifia (an Bhulgáir) go dtí 2011, agus sa Bhruiséil (an Bheilg) ó 2007 go 2011. Idir 1992 agus 1994, bhí Mariyana Kancheva ina hArd-Stiúrthóir ar Oifig na Seirbhísí don Chór Taidhleoireachta in Aireacht Gnóthaí Eachtracha na Bulgáire. Le linn a gairmréime, dhírigh sí go háirithe ar roinnt réimsí dlí, lena n-áirítear dlí na maoine intleachtúla (agus í cláraithe le Clár na nIonadaithe ar Dhlí na Maoine Intleachtúla in Patentno Vedomstvo na Republika Bulgaria) (Oifig Paitinní Phoblacht na Bulgáire) agus an dlí eacnamaíochta (agus í cláraithe le Clár na gComhlachtaí um Leachtú agus Glacadóireacht ag Aireacht Dlí agus Cirt na Bulgáire).

Chomh maith leis sin, is eadránaí i réiteach díospóidí tráchtála í sa Bhulgáir. Mar chomhairleoir dlí i bParlaimint na Bulgáire, rannchuidíonn sí le dréachtú téacsanna reachtacha éagsúla. Is údar í ar roinnt foilseachán ar an dlí Eorpach. Ina theannta sin, labhair Mariyana Kancheva ag go leor seimineár, fóraim agus comhdhálacha ar leibhéal náisiúnta agus idirnáisiúnta.

Ceapadh Mariyana Kancheva mar Bhreitheamh den Chúirt Ghinearálta an 19 Meán Fómhair 2011.

Rugadh Eugène Buttigieg sa bhliain 1961 in Sliema (Málta). Rinne sé staidéar ar an dlí in Università ta' Malta (Ollscoil Mhálta) agus bhain sé dochtúireacht sa dlí (LL.D) amach ann in 1986. In 1991, bhain sé máistreacht sa dlí Eorpach amach ó University of Exeter (Ollscoil Exeter, an Ríocht Aontaithe) agus, in 2004, bhain sé dochtúireacht sa dlí amach ó University of London (Ollscoil Londan, an Ríocht Aontaithe).

Glacadh leis mar dhlíodóir i Málta in 1987, agus chuir sé tús lena shlí bheatha ghairmiúil in Aireacht Dlí agus Cirt Mhálta mar oifigeach dlí ó 1987 go 1990. Ansin chuaigh sé isteach, mar oifigeach sinsearach dlí, in Aireacht Gnóthaí Eachtracha Mhálta, ó 1990 go 1994.

Ó 1994 ar aghaidh, chaith an tUasal Buttigieg a dhúthracht le teagasc den chuid is mó: bhí sé ina léachtóir ó 1994 go 2001, ina léachtóir sinsearach ó 2001 go 2006, agus ina ollamh comhlach ó 2007 ar aghaidh ag Università ta' Malta (Ollscoil Mhálta). In 2009, bronnadh Ollúnacht Jean Monnet i ndlí an Aontais Eorpaigh air, agus in 2019, tugadh ardú céime dó mar ollamh. Ina theannta sin, tá sé ina ollamh ar cuairt le dlí na hiomaíochta ag Queen Mary University of London (Ollscoil Queen Mary Londan, an Ríocht Aontaithe). Is údar ar roinnt foilseachán maidir le dlí an Aontais Eorpaigh agus dlí na hiomaíochta é an tUasal Buttigieg.

Ó 1994 go 2005, bhí sé ina chomhalta den Copyright Board, Malta (an Coimisiún um Chóipcheart, Málta) agus idir 1994 agus 2012, bhí sé ina chomhairleoir dlí maidir le dlí an Aontais Eorpaigh, dlí na hiomaíochta, dlí na maoine intleachtúla agus dlí na dtomhaltóirí san earnáil phríobháideach. Is sa cháil sin chomh maith a chuaigh sé isteach in Aireacht Gheilleagar Mhálta agus isteach sa Malta Competition and Consumer Affairs Authority (Údarás Mhálta um Ghnóthaí Iomaíochta agus Tomhaltóra) ó 2000 go 2012. Ó 2001 go 2009, bhí sé ina chomhalta freisin de Malta Resources Authority (Údarás Mhálta um Bhainistiú Acmhainní).

Ceapadh an tUasal Buttigieg ina bhreitheamh den Chúirt Ghinearálta ar an 8 Deireadh Fómhair 2012.

Rugadh Lauri Madise sa bhliain 1974 in Tartu (an Eastóin). Bhain sé céim sa dlí amach ó Tartu Ülikool (Ollscoil Tartu, an Eastóin) in 1998 agus ó Université de Poitiers (Ollscoil Poitiers, an Fhrainc) in 1995.

Chuir sé tús lena shlí bheatha ghairmiúil mar chomhairleoir d’Aireacht Dlí agus Cirt na hEastóine ó 1995 go 1999, sular ceapadh é mar cheannasaí na rúnaíochta de Choiste Bunreachtúil Pharlaimint na hEastóine, ó 1999 go 2002.

In 2002, chuaigh an tUasal Madise isteach i mbreithiúna a thíre dúchais mar bhreitheamh sa Tallinna Ringkonnakohus (Cúirt Achomhairc Thaillinn, an Eastóin). In 2005, ceapadh é chomh maith mar chomhalta de Choimisiún Scrúduithe na mBreithiúna agus ghlac sé páirt in obair reachtach maidir leis an dlí bunreachtúil agus dlí an riaracháin.

Ceapadh an tUasal Madise mar Bhreitheamh den Chúirt Ghinearálta ar an 23 Deireadh Fómhair 2013.

Rugadh Nina Półtorak sa Pholainn sa bhliain 1971. Bhain sí céim sa dlí amach in 1995 agus chosain sí a tráchtas dochtúireachta sa dlí in 2001 ag Uniwersytet Jagielloński (Ollscoil Iagailleonach Kraków, an Pholainn). In 2011, bronnadh an teideal “Dochtúir san Eolaíocht Dhlíthiúil” uirthi.

Glacadh isteach i mBarra na Polainne í in 2000, agus d’oibrigh sí sa cháil sin le roinnt gnólachtaí dlí idir 2000 agus 2012 agus í ag cur a cuid saineolais ar dhlí na Polainne agus ar an dlí Eorpach ar fáil agus rinne sí ionadaíocht ar chliaint os comhair na gcúirteanna is airde sa tír. In 2012, chuaigh sí isteach i mbreithiúnacht na Polainne mar bhreitheamh ag Wojewódzki Sąd Administracyjny w Krakowie (an Chúirt Riaracháin, Kroków) agus, in 2014, tugadh ar iasacht í do Naczelny Sąd Administracyjny (an Ard‑Chúirt Riaracháin, an Pholainn). Idir 2013 agus 2016, ceapadh í ina stiúrthóir ar Roinn Dlí na hEorpa in Naczelny Sąd Administracyjny.

Chomh maith leis sin, theagasc sí an dlí ar an leibhéal ollscoile, mar léachtóir idir 1995 agus 2003 agus mar ollamh comhlach le hOllúnacht Dhlí an Aontais Eorpaigh ó 2003 go 2013 ag Uniwersytet Jagiellońsk, áit a ndearna sí taighde ollscoile, roinnt ábhar a theagasc (an dlí bunreachtúil agus dlí riaracháin an Aontais Eorpaigh ina measc). Rinne sí maoirseacht ar thráchtais mháistreachta agus dochtúireachta sna hábhair sin chomh maith. Bhí sí i gceannas ar chláir staidéir iarchéime i ndlí an Aontais freisin ag Uniwersytet Jagielloński ó 2006 go 2016. Rinne sí taighde dlí mar Visiting Scholar ag Oxford University (Ollscoil Oxford, an Ríocht Aontaithe) in 1998 agus ag European University Institute (an Institiúid Ollscoile Eorpach, Flórans, an Iodáil) in 2005. Is údar í ar roinnt foilseachán sa dlí Eorpach agus bíonn sí ag teagasc ag Uniwersytet Jagielloński ó 2013 i leith mar ollamh le dlí an Aontais Eorpaigh.

Ceapadh Nina Półtorak mar Bhreitheamh den Chúirt Ghinearálta an 13 Aibreán 2016.

Rugadh Inga Reine in 1975 i Ríge (an Laitvia). Bhain sí céim sa dlí amach ó Latvijas Universitātē (Ollscoil na Laitvia) in 1996 agus bhain sí máistreacht amach ó European Inter-University Centre for Human Rights and Democratisation (EIUC) (an Lárionad Eorpach Idir-Ollscoileanna um Chearta an Duine agus um Dhaonlathú, an Iodáil) in 1998.

Chuir sí tús lena slí bheatha ghairmiúil mar oifigeach dlí ag an Oifig um Chearta an Duine sa Laitvia ó 1995 go 1999, sular thosaigh sí ag obair leis an Eagraíocht um Shlándáil agus Comhar san Eoraip (ESCE) mar chomhairleoir ar an misean sa Chosaiv ó 1999 go 2002 agus ar mhisean Mhontainéagró ó 2002 go 2003.

Idir 2003 agus 2012, lean sí dá gairm mar dhlíodóir in Aireacht Gnóthaí Eachtracha na Laitvia agus rinne sí ionadaíocht ar Rialtas na Laitvia in eagraíochtaí idirnáisiúnta atá saindírithe ar chearta an duine. Le linn na tréimhse sin, ceapadh í freisin mar chomhalta de Choiste Stiúrtha Chomhairle na hEorpa um Chearta an Duine (comité directeur pour les droits de l’homme) (CDDH).

In 2012, ainmníodh an tUasal Reine ina ceann rannóige ar Bhuanionadaíocht na Laitvia chuig an Aontas Eorpach sa Bhruiséil, agus bhí sí sa phost sin go dtí 2015. Chomh maith leis sin, bhí sí ina comhairleoir dlí ó 2012 go 2016.

Ceapadh Inga Reine mar Bhreitheamh den Chúirt Ghinearálta an 8 Meitheamh 2016.

Rugadh Paul Nihoul sa Bhruiséil (an Bheilg) in 1963. Bhain sé céim sa dlí amach ó Université catholique de Louvain (Ollscoil Chaitliceach Louvain, an Bheilg) in 1988 agus bhain sé Master of Laws amach in Ollscoil Harvard (Stáit Aontaithe Mheiriceá) in 1989. Chuaigh sé i mbun staidéar dochtúireachta sa dlí in Université catholique de Louvain agus chosain sé a thráchtas dochtúireachta in 1998. Bhain sé céim san fhilíocht agus san fhealsúnacht amach san ollscoil sin freisin in 1984.

Glacadh isteach ag Barra Nua-Eabhrac (Stáit Aontaithe Mheiriceá) é in 1990, áit ar chleachtaigh sé mar dhlíodóir agus é ina Attorney and Counselor at Law. Tar éis dó filleadh ar an Eoraip, chuaigh sé isteach i gCúirt Bhreithiúnais na gComhphobal Eorpach ó 1991 go 1995 mar rúnaí dlí don Bhreitheamh René Joliet agus ansin don Bhreitheamh John Murray.

Idir 1995 agus 1999, chuaigh sé i mbun gairm ollscoile mar thaighdeoir in Université catholique de Louvain sular ceapadh é ina léachtóir agus, níos déanaí, ina ollamh in Rijksuniversiteit Groningen (Ollscoil Groningen, an Ísiltír) ó 1999 go 2010, agus in Université catholique de Louvain ó 2001 i leith. Bhí sé ina stiúrthóir ar an Lárionad um Dhlí na dTomhaltóirí in Université catholique de Louvain idir 2001 agus 2016. Chomh maith leis sin, ceapadh é ina Uachtarán ar an gCór Acadúil idir 2004 agus 2006, agus ina Uachtarán ar an Institiúid um Staidéar Dlí ó 2012 go 2015 san ollscoil sin. Idir 1999 agus 2009, bhí an Ollúnacht Jean Monnet ag an Uasal Nihoul, arna bronnadh ad personam air ag an gComhairle Eorpach um Thaighde. Theagasc sé in université Paris-Dauphine (Ollscoil Pháras-Dauphine, an Fhrainc) mar ollamh ar cuairt ó 2013 go 2016. Ó 2010 go 2011, bhí sé ina Scoláire Fulbright ag American University (Ollscoil Mheiriceá, Washington DC, Stáit Aontaithe Mheiriceá). Bhí sé ina chathaoirleach ar an Academic Society for Competition Law (Ascola) ó 2013 go 2016.

Ceapadh an tUasal Nihoul mar Bhreitheamh den Chúirt Ghinearálta an 19 Meán Fómhair 2016.

Rugadh Ulf Öberg in 1966 i Stócólm (an tSualainn). Bhain sé céim sa dlí amach ó Stockholms universitet (Ollscoil Stócólm, an tSualainn) in 1991. Lean sé dá chuid staidéir ag Université de Paris I Panthéon‑Sorbonne (Ollscoil Pháras I Panthéon-Sorbonne, an Fhrainc), áit ar bhain sé iarchéim i ndlí an chómhargaidh amach in 1992. In 1993, bhain sé céim amach ó Institut d’études politiques (Institiúid um Staidéar Polaitiúil Pháras, an Fhrainc) (IEP) i gcaidreamh idirnáisiúnta.

Chuir sé tús lena shlí bheatha ghairmiúil mar thaighdeoir ag an nGníomhaireacht Taighde do Chosaint Náisiúnta na Sualainne idir 1992 agus 1994 agus ghlac sé páirt, ó 1993 go 1994, sa chlár oiliúna do státseirbhísigh na Sualainne.

Ó 1994 go 1995, bhí sé ina chomhairleoir dlí maidir le gnóthaí Eorpacha in Aireacht Gnóthaí Eachtracha na Sualainne agus, ina dhiaidh sin, chuaigh sé isteach sa Chúirt Bhreithiúnais mar rúnaí dlí don Bhreitheamh Hans Ragnemalm ó 1995 go 2000.

Ina dhiaidh sin, d’fhill Ulf Öberg ar an Sualainn agus chuir sé tús lena ghairmréim ollscoile mar thaighdeoir agus mar léachtóir in Stockholms universitet. Bhunaigh sé a ghnólacht dlí féin agus bhí sé ag cleacthadh mar dhlíodóir ag Sveriges advokatsamfund (Cumann Bharra na Sualainne) ó 2006 go 2016.

Ceapadh an tUasal Öberg mar Bhreitheamh den Chúirt Ghinearálta an 19 Meán Fómhair 2016.

Rugadh Colm Mac Eochaidh in 1963 i mBaile Átha Cliath (Éire). Bhain sé céim sa dlí amach ón gColáiste Ollscoile, Baile Átha Cliath, Ollscoil na hÉireann, in 1984.

Glaodh chun Bharra na hÉireann é agus é ina bhall de Chumann Onórach Óstaí an Rí, Baile Átha Cliath, ó 1987, agus chuir sé tús lena shlí bheatha ghairmiúil mar oifigeach dlí i ngnóthaí Eorpacha ó 1988 go 1990 ag an Law Society of England and Wales (Dlí-Chumann Shasana agus na Breataine Bige). Ina theannta sin, bhí sé ina ionadaí ar an dlí-chumann seo agus ar an Law Society of Scotland (Dlí-Chumann na hAlban) in institiúidí na gComhphobal Eorpach sa Bhruiséil ó 1990 go 1993.

Idir 1993 agus 2009, d’oibrigh sé mar abhcóide ag Barra na hÉireann, agus glacadh leis mar Abhcóide Sinsir in 2009.

Chomh maith leis sin, bhí sé ina léachtóir le dlí na hiomaíochta ag Cumann Onórach Óstaí an Rí, Baile Átha Cliath, ó 1993 go 1999, agus ansin ag an China-EU School of Law in Zhōngguó Zhèngfǎ Dàxué (Ollscoil Shíneach na hEolaíochta Polaitiúla agus an Dlí, an tSín).

In 2012, ceapadh é mar bhreitheamh in Ard-Chúirt na hÉireann, agus idir 2014 agus 2017, bhí sé ina Uachtarán ar an Dlísheomra um an Inimirce agus an Tearmann sa chúirt sin.

Ceapadh an tUasal Mac Eochaidh mar Bhreitheamh den Chúirt Ghinearálta an 8 Meitheamh 2017.

Rugadh Tuula Riitta Pynnä in 1958 in Turku (an Fhionlainn). Bhain sí máistreacht sa dlí amach ó Turun yliopisto (Ollscoil Turku, an Fhionlainn) in 1981, chomh maith le máistreacht sa dlí ó Universität Trier (Ollscoil Trier, an Ghearmáin) in 1993. Bhronn an Institiúid Eorpach um Riarachán Poiblí máistreacht uirthi i ndlí na hEorpa in 1994 i gcomhpháirtíocht le Université Nancy 2 (Ollscoil Nancy 2, an Fhrainc) agus Aristotélio Panepistímio Thessaloníkis (Ollscoil Arastatail Thessaloniki, an Ghréig).

In 1981, chuir sí tús lena slí bheatha ghairmiúil agus d’oibrigh sí mar léachtóir in Turun yliopisto go dtí 1982. Ansin chuaigh sí isteach i mbreithiúnacht na Fionlainne mar bhreitheamh sealadach ag Porin raastuvanoikeus (Cúirt Chéadchéime Pori, an Fhionlainn) ó 1982 go 1983. Ceapadh í mar Cheann Seirbhíse ag Porin poliisilaitos, väestökirjatoimiston johtaja (Oifig an Daonra, an Fhionlainn) ar feadh dhá bhliain, sular athghaireadh í chun a dualgas mar bhreitheamh. In 1984, bhí sí ina rúnaí dlí ar feadh bliana agus ina breitheamh sealadach ag Ulvilan Kihlakunnanoikeus (Cúirt Chéadchéime Ulvila, an Fhionlainn). Ó 1985 go 1995, ghníomhaigh sí ar dtús mar bhreitheamh sealadach agus ansin mar bhreitheamh ag Tampereen raastuvanoikeus (Cúirt Tampere, an Fhionlainn) agus ag Pirkanmaan käräjäoikeus (Cúirt Chéadchéime Pirkanmaa, an Fhionlainn) chomh maith.

Idir 1996 agus 2005, chuaigh an tUasal Pynnä isteach in Aireacht Gnóthaí Eachtracha na Fionlainne mar Cheann an Aonaid um Dhlíthíocht an Aontais Eorpaigh agus mar chomhairleoir dlí, agus dá dheasca sin, rinne sí ionadaíocht ar an bhFionlainn sna cásanna a bhí os comhair Chúirt Bhreithiúnais na gComhphobal Eorpach. Ceapadh í ina Ceann Toscaireachta ar Thoscaireacht na Fionlainne sa mheitheal “an Chúirt Bhreithiúnais” de Chomhairle na gComhphobal Eorpach, agus bhí post aici freisin sa ghrúpa “Cairde na hUachtaránachta” ag féachaint d’athchóiriú chóras breithiúnach an Chomhphobail i gConradh Nice.

Ceapadh an tUasal Pynnä ina breitheamh sa dá Chúirt Uachtaracha de chuid na Fionlainne. In 2005, ceapadh í ina breitheamh sealadach agus, in 2006, ceapadh í ina breitheamh in Korkein hallinto‑oikeus (an Chúirt Uachtarach Riaracháin, an Fhionlainn). Bhí post aici ansin in Korkein oikeus (an Chúirt Uachtarach, an Fhionlainn) ó 2012 go 2019. Bhí sí ina comhalta freisin de Choiste Araíonachta an Stocmhalartáin Nasdaq OMX Helsinki (Heilsinkí,an Fhionlainn) ó 2015 go 2019, agus ó 2011 go 2019 bhí sí ina comhalta den choiste athbhreithnithe de Suomen Asianajajaliitto (Comhlachas Bharra na Fionlainne), coiste a raibh sí ina cathaoirleach air idir 2013 agus 2019.

Ceapadh an tUasal Pynnä mar Bhreitheamh den Chúirt Ghinearálta an 26 Meán Fómhair 2019.

Rugadh an tUasal Johannes Christoph Laitenberger sa bhliain 1964 in Hamburg (an Ghearmáin). Rinne sé staidéar ar an dlí in Rheinische Friedrich-Wilhelms-Universität Bonn (Ollscoil Bonn, an Ghearmáin). In 1990, d’éirigh leis sa chéad scrúdú Stáit sa dlí, sa Ghearmáin.

Ansin in 1991, d’oibrigh sé sa Bundestag (Parlaimint na Gearmáine), mar chomhairleoir dlí sna seirbhísí riaracháin.

Bhí sé ina Rechtsreferendar (dlíodóir faoi oiliúint) i gceantar Oberlandesgericht Köln (Uaschúirt Réigiúnach Köln, an Ghearmáin) ó 1991 go 1994. In 1994, d’éirigh leis sa dara scrúdú Stáit sa dlí, sa Ghearmáin.

Idir 1991 agus 1995, bhí sé ina léachtóir agus taighdeoir, go páirtaimseartha, in Rheinische Friedrich‑Wilhelms-Universität Bonn (Ollscoil Bonn). 

In 1995, d’oibrigh sé, go páirtaimseartha freisin, i ngnólacht dlí.

Glacadh leis chun an dlí a chleachtadh sa Ghearmáin, agus bhí sé ina chomhairleoir dlí do chónaidhm gnóthas in 1996, sula ndeachaigh sé isteach in institiúidí an Aontais Eorpaigh.

Bhí sé ina chomhalta d’fhoireann na gcomhairleoirí i Stiúrthóireacht an Riaracháin agus an Phrótacail in Ardrúnaíocht Chomhairle an Aontais Eorpaigh ó 1996 go 1999, nuair a ceapadh é mar rapóirtéir in Ard-Stiúrthóireacht na hIomaíochta sa Choimisiún Eorpach.

Ina dhiaidh sin, rinne sé feidhmeanna éagsúla i gcomhar díreach le comhaltaí den Choimisiún. Idir 1999 agus 2003, cheap an Coimisinéir Eorpach, Viviane Reding, é mar chomhalta dá hoifig, áit ina raibh sé ina cheann oifige ó 2003 go 2004. Idir 2004 agus 2005, chuaigh sé isteach in Oifig Uachtarán an Choimisiúin Eorpaigh, José Manuel Barroso, mar chomhalta. Idir 2005 agus 2009, ceapadh é mar urlabhraí an Choimisiúin agus mar cheannasaí ar Sheirbhís Urlabhraí an Choimisiúin. Ó 2009 go 2014, chuaigh sé isteach arís in Oifig Uachtarán an Choimisiúin Eorpaigh, mar cheann oifige.

In 2014, ceapadh é mar Leas-Ard-Stiúrthóir ar Sheirbhís Dlí an Choimisiúin agus ansin, ó 2015 go 2019, bhí sé ina Ard-Stiúrthóir ar Ard-Stiúrthóireacht na hIomaíochta sa Choimisiún Eorpach.

Ceapadh an tUasal Laitenberger mar Bhreitheamh den Chúirt Ghinearálta ar an 26 Meán Fómhair 2019.

Rugadh an tUasal Roberto Mastroianni sa bhliain 1964 in Cosenza (an Iodáil). Bhain sé céim sa dlí amach ó Università degli Studi di Firenze (Ollscoil Fhlórans, an Iodáil) in 1987 agus máistreacht sa dlí ó Penn State University Dickinson School of Law (Dickinson School of Law, Ollscoil Stáit Pennsylvania, na Stáit Aontaithe) in 1990. Rinne sé staidéar dochtúireachta sa dlí in Università di Bologna (Ollscoil Bologna, an Iodáil) agus chosain sé a thráchtas in 1992. Ina dhiaidh sin, rinne sé staidéar iardhochtúireachta in Université de Genève (Ollscoil na Ginéive, an Eilvéis) ó 1992 go 1993, agus in Universiteit van Amsterdam (Ollscoil Amstardam, an Ísiltír) agus in New York Law School (Scoil Dlí Nua-Eabhrac, na Stáit Aontaithe) ó 1993 go 1994.

Chuir sé tús lena shlí bheatha ghairmiúil mar thaighdeoir ar an dlí idirnáisiúnta in Università degli Studi di Firenze (Ollscoil Fhlórans) ó 1992 go 1997, sula ndeachaigh sé isteach i gCúirt Bhreithiúnais an Aontais Eorpaigh mar rúnaí dlí i ndlísheomraí na nAbhcóidí Ginearálta Giuseppe Tesauro agus Antonio Saggio, ó 1997 go 2000. 

Ansin chaith sé a dhúthracht le teagasc, mar ollamh le dlí an Aontais Eorpaigh, in Università degli Studi di Napoli Federico II (Ollscoil Napoli - Frédéric II, an Iodáil) ó 2000 go 2019, tréimhse inar fhoilsigh sé roinnt saothar. Ina theannta sin, theagasc sé dlí an Aontais Eorpaigh agus an dlíthíocht Eorpach in Université Paris 2 – Panthéon-Assas (Ollscoil Pháras II, Panthéon-Assas, an Fhrainc) ó 2011 go 2013, mar ollamh ar cuairt. Theagasc sé dlí an Aontais Eorpaigh freisin in Libera Università Internazionale degli Studi Sociali Guido Carli (Ollscoil Luiss Guido Carli, an Róimh, an Iodáil) ó 2013 go 2017. In 2015, ceapadh é mar ollamh le dlí na hiomaíochta comparáidí in Sturm College of Law in University of Denver (Ollscoil Denver, na Stáit Aontaithe) inar theagasc sé go dtí 2019.

Idir 1993 agus 2019, bhí an tUasal Mastroianni ina dhlíodóir cáilithe chun pléadáil os comhair uaschúirteanna na hIodáile. Ó 2013 go 2015, bhí sé ina chomhalta den choiste stiúrtha den Società Italiana di Diritto Internazionale (SIDI) (Cumann na hIodáile um Dhlí Idirnáisiúnta) agus den Associazione Italiana Studiosi di Diritto dell'Unione Europea (AISDUE) (Comhlachas na hIodáile um Scoláirí Dlí AE) ó 2018 go 2021. Ceapadh é ina theannta sin mar chomhairleoir do Rialtas na hIodáile maidir le gnóthaí reachtacha sa Roinn Gnóthaí Eorpacha ó 2015 go 2018.

Ceapadh an tUasal Mastroianni mar Bhreitheamh den Chúirt Ghinearálta ar an 26 Meán Fómhair 2019.

Rugadh José Martín y Pérez de Nanclares in 1965 in Vitoria-Gasteiz (an Spáinn). Bhain sé céim sa dlí amach ag Universidad de Salamanca (Ollscoil Salamanca, an Spáinn) in 1988. Idir 1988 agus 1989, rinne sé staidéar ar an dlí bunreachtúil in Universität zu Köln (Ollscoil Köln, an Ghearmáin) agus bhain sé máistreacht sa dlí Eorpach amach in 1991 ó Universität Saarbrücken (Ollscoil Saarbrücken, an Ghearmáin). In 1994, chosain sé a thráchtas dochtúireachta sa dlí ag Universität Saarbrücken agus ag Universidad de Salamanca.

Chaith sé a dhúthracht le teagasc an dlí idirnáisiúnta agus chuir sé tús lena shlí bheatha ghairmiúil mar léachtóir ag Universidad de La Rioja (Ollscoil La Rioja, an Spáinn) ó 1993 go 1996, agus, ina dhiaidh sin, mar ollamh ó 1996 go 2001. In 1996, ceapadh é ina ardrúnaí ag Universidad de La Rioja, agus, ina dhiaidh sin, ina leas-chathaoirleach taighde ag an ollscoil chéanna ó 1996 go 2000 agus ansin ina leas‑reachtaire ar chaidreamh idirnáisiúnta ó 2004 go 2008. Ba san ollscoil sin, idir 2001 agus 2009, a bhí ollúnacht an dlí idirnáisiúnta phoiblí ag José Martín y Pérez de Nanclares, chomh maith le hOllúnacht Jean Monnet i ndlí an Aontais Eorpaigh. Ó 2009 go 2012, thug Universidad de Salamanca ollúnacht an dlí idirnáisiúnta phoiblí dó, ollúnacht a bronnadh air arís in 2018.

Ó 2012 go 2018, ceapadh é ina stiúrthóir ar an Oifig um Ghnóthaí Dlíthiúla Idirnáisiúnta in Aireacht Gnóthaí Eachtracha agus Comhair na Spáinne. In 2018, bhí sé ina stiúrthóir ar Oifig Consejo de Estado (an Chomhairle Stáit, an Spáinn) ar feadh bliain amháin.

Ceapadh José Martín y Pérez de Nanclares mar Bhreitheamh den Chúirt Ghinearálta an 26 Meán Fómhair 2019.

Rugadh Gerhard Hesse sa bhliain 1970 i Vín (an Ostair). Bhain sé céim sa dlí amach in 1993 agus chosain sé a thráchtas dochtúireachta sa dlí in 2002 in Universität Wien (Ollscoil Vín, an Ostair).

Chuir sé tús lena shlí bheatha ghairmiúil in 1994 ag an tSeansailéireacht Chónaidhme (an Ostair) sa Roinn Gnóthaí Eorpacha. Chaith sé bliain ag obair sa roinn sin sula ndeachaigh sé isteach sa Roinn Gnóthaí Dlíthiúla sa tSeansailéireacht Chónaidhme idir 1995 agus 2000, mar chomhalta ar dtús agus ansin mar cheann roinne. Ó 2000 go 2002, bhí sé ina chomhairleoir dlí don Arbeiterkammer (an Dlísheomra Saothair, an Ostair) sular athghaireadh ar ais chun Sheirbhís Dlí na Seansailéireachta Cónaidhme é mar chomhalta agus mar cheann roinne ó 2002 go 2007. Idir 2007 agus 2010, bhí sé ina chomhairleoir dlí in Oifig Sheansailéir Cónaidhme na hOstaire agus bhí sé ina Ard-Stiúrthóir ar Sheirbhís Dlí na Seansailéireachta Cónaidhme idir 2010 agus 2017. Ó 2017 go 2019, bhí sé ina Ard‑Stiúrthóir ar an tseirbhís dlí san Aireacht um Ghnóthaí Bunreachtúla, Athchóiriú, Dírialáil, Dlí agus Cirt san Ostair.

In 2010, ceapadh é ina chomhalta de Chomhairle na hOstaire um Chosaint Sonraí Pearsanta agus bhí sé sa phost sin go dtí 2019. Chomh maith leis sin, bhí sé ina Chathaoirleach ar Bhord Maoirseachta Leabharlann Náisiúnta na hOstaire ó 2017 go 2019. Tá roinnt saothair dlí foilsithe aige a bhuí lena chuid taithí leis an gcóras riaracháin phoiblí san Ostair.

Ceapadh an tUasal Hesse mar Bhreitheamh den Chúirt Ghinearálta an 26 Meán Fómhair 2019.

Rugadh Miguel Sampol Pucurull in 1974 in Barcelona (an Spáinn). Bhain sé céim sa dlí amach in 1997 agus céim sa bhainistíocht gnó amach in 1998 in Universidad Pontificia Comillas (Ollscoil Phontaifiúil Comillas, an Spáinn).

Chuir sé tús lena shlí bheatha mar abogado del Estado: Ó 2002 go 2005, rinne sé ionadaíocht ar an Stát os comhair chúirteanna na Spáinne sula ndeachaigh sé isteach i seirbhís dlí Aireacht Cultúir na Spáinne ó 2005 go 2006. Ó 2006 go 2007, chuaigh sé isteach i seirbhís dlí Aireacht Gnóthaí Eachtracha na Spáinne atá freagrach as ábhair a bhaineann le Cúirt Bhreithiúnais an Aontais Eorpaigh.

Ó 2007 go 2014, bhí an tUasal Sampol Pucurull ina abogado del Estado — comhairleoir dlí ag Buanionadaíocht na Spáinne chuig an Aontas Eorpach.  In 2014, chuaigh sé isteach i seirbhís Aireacht Dlí agus Cirt na Spáinne mar Leas-Ardstiúrthóir do Ghnóthaí an Aontais Eorpaigh agus do Ghnóthaí Idirnáisiúnta den Abogacía General del Estado (Comhairle Dlí Stáit). Mar sin, d’fheidhmigh sé mar abogado del Estado-Jefe in Aireacht Gnóthaí Eachtracha agus Comhair na Spáinne i seirbhís dlí an Stáit atá freagrach as imeachtaí os comhair Chúirt Bhreithiúnais an Aontais Eorpaigh go dtí 2019. Le linn na tréimhse sin, bhí sé ina chomhalta de bhord bainistíochta roinnt gnóthais phoiblí, agus chuir a chleachtas dlí le dréachtú roinnt foilseacháin dhlíthiúla.

Ceapadh an tUasal Sampol Pucurull mar Bhreitheamh den Chúirt Ghinearálta an 26 Meán Fómhair 2019.

Rugadh Mirela Stancu sa bhliain 1974 in Călărași (an Rómáin). Bhain sí céim sa dlí amach in 1998 agus dochtúireacht sa dlí amach in 2009 ó Universitatea din București (Ollscoil Bhúcairist, an Rómáin).

Bhí sí ag cleachtadh mar dhlíodóir ag Barra Bhúcairist (an Rómáin) ó 1999 go 2002, sular chaith sí a dúthracht le dlí nós imeachta a theagasc in Universitatea din București. Ba san ollscoil sin a bhí sí ina léachtóir ó 2002 go 2018 agus ina leachtóir sinsearach ó 2018 ar aghaidh, tréimhsí ina raibh sí ina húdar ar roinnt foilseachán.

Ghníomhaigh an tUasal Stancu i gcáil breitheamh ag Judecătoria Sectorului 3 Bucureşti (Cúirt Chéadchéime an 3ú ceantar de Bhúcairist, an Rómáin) ó 2004 go 2009, ansin ag Tribunalul București (Cúirt Réigiúnach Bhúcairist, an Rómáin) ó 2009 go 2019. Ceapadh í mar bhreitheamh ar iasacht chuig Aireacht Gnóthaí Eachtracha na Rómáine in 2005 agus, ó 2007 go 2018, chuaigh sí isteach in Institutul Național al Magistraturii (Institiúid Náisiúnta na mBreithiúna, an Rómáin) mar theagascóir.

In 2011, chuaigh sí isteach i gCúirt Bhreithiúnais an Aontais Eorpaigh, i ndlísheomra an Bhreithimh Camelia Toader, mar dhlíodóir-riarthóir go dtí 2014.

Ar fhilleadh di ar an Rómáin in 2015, ceapadh í mar Stiúrthóir le freagracht as Gnóthaí Eorpacha, Caidreamh Idirnáisiúnta agus Cláir Consiliul Superior al Magistraturii (Ardchomhairle Bhreithiúnach, an Rómáin), post a bhí aici go dtí 2018.

Ceapadh an tUasal Stancu mar Bhreitheamh den Chúirt Ghinearálta ar an 26 Meán Fómhair 2019.

Rugadh an tUasal Petra Škvařilová-Pelzl in 1975 i bPrág (Poblacht na Seice). Rinne sí staidéar ar an dlí i bPoblacht na Seice agus sa Ghearmáin, tréimhse inar bhronn Univerzita Karlova (Ollscoil Karlova, Poblacht na Seice) an teideal Magister iuris (summa cum laude) uirthi. Thosaigh sí ar dhochtúireacht sa dlí in Universität Hamburg (Ollscoil Hamburg, an Ghearmáin), áit ar chosain sí a tráchtas in 2004 (summa cum laude). Bhain sí céim ateangaireachta le Gearmáinis amach freisin in Státní Jazyková škola (Scoil Stáit na dTeangacha, Prág, Poblacht na Seice) in 1995.

Cé gur chuir sí tús lena slí bheatha ghairmiúil mar chúntóir acadúil i gceannas ar an dlí tráchtála, ar an dlí muirí agus ar an dlí eacnamaíoch in Universität Hamburg in 1999, d’éirigh léi i gcomórtas a d’eagraigh an Oifig Eorpach um Roghnú Foirne (EPSO) chun dlíodóirí Seiceacha a earcú sna hinstitiúidí Eorpacha. Dá bhrí sin, bhí sí ina hoifigeach san Ard-Stiúrthóireacht Leabharlainne, Taighde agus Doiciméadachta de Chúirt Bhreithiúnais an Aontais Eorpaigh agus d’fheidhmigh sí mar riarthóir dlí ó 2004 go 2019. Idir 2010 agus 2016, bhí na dualgais sin uirthi mar attaché don Ard‑Stiúrthóir. Ó 2017 go 2018, bhí sí ina rúnaí dlí in oifig an Bhreithimh Maria Berger sa Chúirt Bhreithiúnais.

Tá sí ina húdar ar roinnt foilseachán, go háirithe i réimsí a bhaineann le dlí an Aontais Eorpaigh agus leis an dlí comparáideach, agus bhí baint ag an Uasal Škvařilová-Pelzl freisin leis an teagasc mar theagascóir le dlí an Aontais ag Verwaltungsakademie des Bundes in Wien (Acadamh Cónaidhme Vín don Státseirbhís, an Ostair) ó 2009. Ina theannta sin, labhair an tUasal Škvařilová-Pelzl ag go leor seimineár agus comhdhálacha, lena n-áirítear an Fhéile Dlí Dhébhliantúil idir an tSeicia agus an Ghearmáin.

Ceapadh an tUasal Škvařilová-Pelzl  mar Bhreitheamh den Chúirt Ghinearálta an 26 Meán Fómhair 2019.

Rugadh Iko Nõmm in 1977 i dTaillinn (an Eastóin). Bhain sé dioplóma sa dlí amach in 2001 chomh maith le máistreacht sa dlí in 2007 ó Tartu Ülikool (Ollscoil Tartu, an Eastóin). Thug sé faoi dhochtúireacht sa dlí in Tartu Ülikool agus chosain sé a thráchtas dochtúireachta sa dlí in 2013.

Chuir sé tús lena shlí bheatha ghairmiúil mar chomhairleoir ag Tallinna Ringkonnakohus (Cúirt Achomhairc Thaillinn, an Eastóin) ó 2001 go 2002 agus ag Harju Maakohtu (Cúirt Chéadchéime Harjun, an Eastóin) mar bhreitheamh faoi oiliúint. Bhí an tUasal Nõmm ina bhreitheamh sa chúirt sin ó 2002 go 2007, agus in Tallinna Ringkonnakohus ó 2007 go 2019. Ceapadh é mar bhreitheamh sóisearach ag an Riigikohus (an Chúirt Uachtarach, an Eastóin) ó 2015 go 2016 agus bhí sé mar bhreitheamh náisiúnta ar iasacht do Chúirt Bhreithiúnais an Aontais Eorpaigh ó 2017 go 2018.

Bhí baint ag an Uasal Nõmm le cúrsaí teagaisc chomh maith agus é ina léachtóir in Tartu Ülikool ó 2014 go 2019 agus ag Rannóg Oiliúna an Riigikohus ó 2015 go 2019. Thug sé léachtaí freisin ag Cumann Bharra na hEastóine ó 2015 go 2019 agus bhí sé ina bhall de Bord Scrúduithe um Bhreithiúna na hEastóine idir 2018 agus 2019. Idir 2015 agus 2019, bhí sé ina chomhalta den Choiste Measúnaithe um Inniúlacht Ghairmiúil Bharra na hEastóine.

Ceapadh Iko Nõmm mar Bhreitheamh den Chúirt Ghinearálta an 26 Meán Fómhair 2019.

Rugadh Gabriele Steinfatt in 1977 in Bad Harzburg (an Ghearmáin). Bhain sí céim sa dlí amach ó Universität des Saarlandes (Ollscoil Saarland) in Saarbrücken (an Ghearmáin) agus in Strasbourg (an Fhrainc). Bhain sí máistreacht sa dlí príobháideach amach chomh maith le teastas sa dlí Eorpach ó université Robert Schuman (Ollscoil Robert Schuman, Strasbourg, an Fhrainc) in 2000. In 2002, d’éirigh léi sa chéad scrúdú stáit sa dlí in Saarbrücken. Ó 2002 go 2003, chuaigh sí i mbun staidéar iarchéime in Europa-Institut de Universität des Saarlandes (an Institiúid um Léann Eorpach, Ollscoil Saarland, an Ghearmáin). In 2005, chríochnaigh sí a tréimhse oiliúna sa dlí in Saarbrücken (an Ghearmáin) leis an dara scrúdú stáit sa dlí. Thug sí faoi thráchtas dochtúireachta ag Universität des Saarlandes , áit ar bhain sí dochtúireacht sa dlí amach in 2012.

Bhí Steinfatt ina breitheamh ag Verwaltungsgericht der Freien Hansestadt Bremen (Cúirt Riaracháin Bremen, an Ghearmáin) idir 2005 agus 2017, agus ag Oberverwaltungsgericht der Freien Hansestadt Bremen (Ard-Chúirt Riaracháin, Bremen, an Ghearmáin) ó 2017 go 2019. Le linn na tréimhse sin, ceapadh í mar chomhalta den Dienstgerichtshof für Richter (Cúirt Araíonachta Achomhairc do Bhreithiúna) agus mar chomhalta malartach den Berufsgerichtshofs für Ingenieure (Cúirt Araíonachta Achomhairc d’Innealtóirí).

Mar údar ar roinnt foilseachán, go háirithe i réimse an dlí Eorpaigh, tá speisialtóireacht ag an Uasal Steinfatt sa teagasc chomh maith agus í ina léachtóir in Universität des Saarlandes agus in Universität Bremen (Ollscoil Bremen, an Ghearmáin). Tá sí ag cur oiliúint ar fáil do dhlíodóirí óga le linn a dtréimhse oiliúna, fad is go bhfuil sí féin ina scrúdaitheoir don chéad scrúdú stáit sa dlí.

Ceapadh Gabriele Steinfatt mar Bhreitheamh den Chúirt Ghinearálta an 26 Meán Fómhair 2019.

Rugadh Rimvydas Norkus sa bhliain 1979 in Klaipėda (an Liotuáin). Bhain sé máistreacht sa dlí amach ó Vilniaus universitetas (Ollscoil Vilnias, an Liotuáin) in 2001. Ina dhiaidh sin, chuir sé tús lena staidéar dochtúireachta sa dlí ag Mykolo Romerio universitetas (Ollscoil Mykolas Romeris, an Liotuáin) áit ar chosain sé a thráchtas in 2005.

Chuir sé tús lena shlí bheatha ghairmiúil mar chúntóir breithiúnach ag Lietuvos apeliacinis teismas (Cúirt Achomhairc na Liotuáine) ó 1999 go 2000, agus ó 2000 go 2003, bhí sé ina chomhairleoir d’Uachtarán na cúirte sin. Idir 2003 agus 2009, ceapadh é ina stiúrthóir ar an tSeirbhís um Chleachtas Breithiúnach in Lietuvos vyriausiasis administracinis teismas (Cúirt Riaracháin Uachtarach na Liotuáine).

Ó 2009 go 2010, bhí sé ina dhlítheangeolaí i bParlaimint na hEorpa sular fhill sé ar a thír dhúchais chun bheith ina stiúrthóir ar an Roinn um Thaighde Dlí ag Lietuvos Aukščiausiasis Teismas (Cúirt Uachtarach na Liotuáine) ó 2010 go 2012. Ceapadh é ina bhreitheamh in Lietuvos apeliacinis teismas ó 2012 go 2013 agus ansin bhí sé ina bhreitheamh ar feadh bliain amháin in Lietuvos Aukščiausiasis Teismas, agus bhí sé ina uachtarán ar an gcúirt sin ó 2014 go 2019. Ba é Uachtarán ar Lietuvos Teisėjų taryba (Comhairle Bhreithiúnach na Liotuáine) chomh maith ó 2016 go 2018.

Ó 2007 go 2008, bhí Rimvydas Norkus ag teagasc mar ollamh comhlach ag Mykolo Romerio universitetas, agus bhí sé ina ollamh ag an Institiúid um Dhlí Príobháideach san ollscoil sin ó 2012 go 2019. Chomh maith leis sin, tá sé ina údar ar an iliomad foilseacháin dhlíthiúla.

Ceapadh Rimvydas Norkus mar Bhreitheamh den Chúirt Ghinearálta an 26 Meán Fómhair 2019.

Rugadh Tamara Perišin i Ságrab (an Chróit) in 1979. Bhain sí céim cum laude sa dlí amach ó Sveučilište u Zagrebu (Ollscoil Shágraib, an Chróit) in 2002 agus, in 2003, bhain sí máistreacht sa dlí ó University of Oxford (Ollscoil Oxford, an Ríocht Aontaithe) mar bhuaiteoir na scoláireachta Chevening. Ansin, chuaigh sí i mbun staidéar dochtúireachta sa dlí in Sveučilište u Zagrebu, áit ar chosain sí a tráchtas in 2007. D’éirigh leis an Uasal Perišin i scrúdú Bharra na Cróite in 2009.

Agus í ina taighdeoir, chaith sí tréimhsí i mbun taighde in Asser Instituut (Institiúid Asser, an Ísiltír) in 2004, in Georgetown University (Ollscoil Georgetown, Stáit Aontaithe Mheiriceá), in University of Michigan (Ollscoil Michigan, Stáit Aontaithe Mheiriceá) ó 2005 go 2006 mar Scoláire Fulbright, agus in Max-Planck-Institute (Institiúid Max Planck, Heidelberg, an Ghearmáin) ó 2007 go 2008, áit ar bhain sí scoláireacht iardhochtúireachta amach. Chomh maith leis sin, chuaigh sí faoi oiliúint in eolaíocht an oideachais agus na foghlama ag Central European University (Lár‑Ollscoil na hEorpa, an Ungáir) ó 2007 go 2008. In 2014, tugadh cuireadh di taighde iardhochtúireachta a dhéanamh in Harvard Law School ag Harvard University (Scoil Dlí Harvard, Ollscoil Harvard, Stáit Aontaithe Mheiriceá).

Ó 2002 i leith, tá Tamara Perišin ina comhalta den Sveučilište u Zagrebu, áit a raibh sí ina hollamh agus ina leas-dhéan don chomhar idirnáisiúnta ó 2009 go 2011, ina bhfuil an Ollúnacht Jean Monnet aici ó 2015 i leith, agus ina bhfuil sí ina comhordaitheoir ar Ionad Barr Feabhais Jean Monnet ó 2018 i leith. Bíonn cúrsaí dlí á dteagasc aici, go háirithe dlí poiblí na hEorpa, dlí an mhargaidh inmheánaigh, dlí na hEagraíochta Domhanda Trádála, éifeachtaí domhanda an dlí Eorpaigh, dlí na hiomaíochta, dlí Eorpach na gcuideachtaí, modheolaíocht an dlí Eorpaigh, agus na prionsabail ghinearálta dlí i gcásdlí Chúirt Bhreithiúnais an Aontais Eorpaigh.

Idir 2015 agus 2016, bhí sí ina hollamh ar cuairt agus ina “John Harvey Gregory Lecturer on World Organization” ag Harvard University, áit a bhfuil cúrsa á theagasc aici ar éifeachtaí domhanda an dlí Eorpaigh.

Mar údar ar an iliomad foilseacháin dhlíthiúla, is í Tamara Perišin príomheagarthóir irisleabhair Chrótaigh atá dírithe go sainiúil ar dhlí an Aontais Eorpaigh (Croatian Yearbook of European Law and Policy) agus tá sí ina comhalta de choiste dréachtaithe an irisleabhair sin.

Ó 2005 go 2011, bhí Tamara Perišin mar chuid den ghrúpa caibidlíochta maidir le haontachas na Cróite leis an Aontas Eorpach. In 2011, chuir sí oiliúint i ndlí an Aontais ar fáil do státseirbhísigh agus do thaidhleoirí ag Državna škola za javnu upravu (An Scoil Náisiúnta Riaracháin Phoiblí, an Chróit) agus ag Acadamh Taidhleoireachta Aireacht Gnóthaí Eachtracha agus Eorpacha na Cróite. Ó 2012 go 2013, bhí sí freagrach as oiliúint i ndlí an Aontais a thabhairt do bhreithiúna ag an Pravosudna akademija (Acadamh Breithiúnach na Cróite) agus ag an Općinski sud u Zagrebu (Cúirt Dúiche Shágraib, an Chróit). In 2015 thug sí léachtaí ag an Hrvatska odvjetnička komora (Cumann Bharra na Cróite). Ó 2017 go 2019, bhí sí ina Comhairleoir Speisialta in Aireacht Eolaíochta agus Oideachais na Cróite. Tá comhairle dlí tugtha aici freisin d’aireachtaí agus do dhlíodóirí na Cróite maidir le cur i bhfeidhm cuí dhlí an Aontais i gcásanna atá ar feitheamh os comhair cúirteanna náisiúnta.

Ceapadh Tamara Perišin mar Bhreitheamh den Chúirt Ghinearálta an 26 Meán Fómhair 2019.

Rugadh David Petrlík in 1978 in Plzeň (Poblacht na Seice). Bhain sé máistreacht sa dlí amach in Západočeská univerzita v Plzni (Ollscoil na Boihéime Thiar, Poblacht na Seice) in 2002, tar éis dó staidéar a dhéanamh in Universität Passau (Ollscoil Passau, an Ghearmáin) in 1999-2000. Bhain sé máistreacht sa dlí amach in université Paris I – Panthéon-Sorbonne (Ollscoil Pháras I, Panthéon-Sorbonne, an Fhrainc) in 2003. Bhain sé dochtúireacht sa dlí amach in Univerzita Karlova (Ollscoil Karlova Phrág, Poblacht na Seice) in 2016.

In 2004, chuir sé tús lena shlí bheatha ghairmiúil mar chomhairleoir dlí in Aireacht Gnóthaí Eachtracha Phoblacht na Seice agus, tar éis aontachas Phoblacht na Seice leis an Aontas Eorpach, chuaigh sé isteach i seirbhís na Cúirte Breithiúnais mar rúnaí dlí don Bhreitheamh Jiří Malenovský, áit ar oibrigh sé go dtí 2015.

In 2015, chuaigh sé isteach sa Ghníomhaireacht Eorpach GNSS (ar a dtugtar Gníomhaireacht an Aontais Eorpaigh um an gClár Spáis anois) mar chomhairleoir dlí agus ansin mar Leas-Cheann Rannóige sa Roinn Dlí agus Soláthair Phoiblí. Ó 2018 go 2021, bhí sé ina Cheann Rannóige ar an roinn sin.

Ó 2011, tá an tUasal Petrlík páirteach freisin sa teagasc agus é ina léachtóir le dlí an Aontais Eorpaigh agus le dlí na maoine intleachtúla in Univerzita Karlova (Ollscoil Karlova). Tá sé ina údar ar an iliomad foilseachán sna réimsí seo.

Ceapadh an tUasal Petrlík mar Bhreitheamh den Chúirt Ghinearálta an 1 Márta 2021.

Rugadh Krisztián Kecsmár in 1975 i mBúdaipeist (an Ungáir). Rinne sé staidéir ar an dlí ag Faculté Jean Monnet in université Paris-Sud (Paris XI) (Dámh Jean Monnet in Ollscoil Pháras-Theas, Páras XI, an Fhrainc) áit ar bhain sé bunchéim sa dlí amach in 1998, máistreacht sa dlí idirnáisiúnta agus sa dlí Eorpach in 1999, mar aon le máistreacht i ngnó agus i dlí an Aontais Eorpaigh in 2000.

Thosaigh an tUasal Kecsmár a shlí bheatha ghairmiúil i ngnólacht dlí san Ungáir ó 2001 go 2005.

In 2005, chuaigh sé isteach i seirbhís an Choimisiúin Eorpaigh mar oifigeach le freagracht as cásanna in Ard‑Stiúrthóireacht na Sochaí Faisnéise agus na Meán Cumarsáide. D’oibrigh sé freisin in Ard‑Stiúrthóireacht na hIomaíochta ó 2009 go 2015, in 2016 agus ó 2018 go 2021.

Ó Bhealtaine 2015 go dtí Aibreán 2016, bhí Krisztián Kecsmár ar iasacht ón gCoimisiún Eorpach ag Aireacht Dlí agus Cirt na hUngáire mar chomhalta den oifig le freagracht as gnóthaí Eorpacha.

Idir 2016 agus 2018, ceapadh an tUasal Kecsmár mar Státrúnaí don Chomhar Breithiúnach Idirnáisiúnta agus Eorpach in Aireacht Dlí agus Cirt na hUngáire.

Ceapadh Krisztián Kecsmár mar Bhreitheamh den Chúirt Ghinearálta an 27 Deireadh Fómhair 2021.

Rugadh Ion Gâlea in 1978 in Iaşi (an Rómáin). Bhain sé céim sa dlí amach ó Universitatea din București (Ollscoil Bhúcairist, an Rómáin) in 2000 chomh maith le máistreacht sa dlí Eorpach ó Université Paris 1 Panthéon Sorbonne (Ollscoil Pháras 1 Panthéon Sorbonne, an Fhrainc) mar chuid de chlár Collège juridique franco-roumain d’études européennes (Coláiste Dlí na Fraince-na Rómáine um Léann Eorpach) arna eagrú i gcomhar le Universitatea din București. Sa bhliain 2002, bhain sé máistreacht i gcaidreamh idirnáisiúnta amach ó Școala Națională de Studii Politice și Administrative (an Scoil Náisiúnta um Staidéar Polaitiúil agus Riaracháin, an Rómáin). Lean sé lena chuid staidéir ag Karl-Franzens-Universität Graz (Ollscoil Graz, an Ostair), áit ar bhain sé máistreacht sa Léann Eorpach amach in 2006. Nuair a d’fhill sé ar an Rómáin, thug sé faoi dhochtúireacht sa dlí in Universitatea din București, áit ar chosain sé a thráchtas in 2008.

Chuir an tUasal Gâlea tús lena shlí bheatha ghairmiúil in Aireacht Gnóthaí Eachtracha na Rómáine mar attaché taidhleoireachta sa Stiúrthóireacht um Dhlí Idirnáisiúnta agus Conarthaí idir 2000 agus 2002, sular ceapadh é mar Cheann na Seirbhíse um Dhlí an Chomhphobail idir 2002 agus 2007. Ó 2007 go 2009, d’oibrigh sé ar mhaithe le leas an phobail mar nótaire.

Nuair a d’fhill an tUasal Gâlea ar an Aireacht Gnóthaí Eachtracha, ainmníodh é mar shaineolaí, agus, níos déanaí, mar stiúrthóir sa Stiúrthóireacht um Dhlí an Aontais idir 2009 agus 2010. Ina dhiaidh sin, ceapadh é ina Ard-Stiúrthóir ar Ghnóthaí Dlíthiúla idir 2010 agus 2016.

Ó 2016 go 2020, ba é Ambasadóir na Rómáine chun na Bulgáire agus, in 2021, ceapadh é mar Ard‑Stiúrthóir ar an Roinn um Chaidreamh Déthaobhach Eorpach agus um Chomhar Réigiúnach san Aireacht Gnóthaí Eachtracha.

Chomh maith leis sin, theagasc an tUasal Gâlea an dlí ag Universitatea din București agus é ina chúntóir ollscoile idir 2002 agus 2012, ina léachtóir ó 2012 go 2016, agus ina léachtóir sinsearach ó 2016 go 2021. In 2021, ceapadh é ina ollamh san ollscoil sin.

Theagasc sé freisin mar ollamh ar cuairt ag an Hayastani divanagitakan dprots’ (Acadamh Taidhleoireachta na hAirméine) in 2010, ag Institutul Diplomatic Român (Institiúid Taidhleoireachta na Rómáine) ó 2009 go 2015, agus ag Universidade da Coruña (Ollscoil Coruña, an Spáinn) in 2015.

Is údar é ar an iliomad foilseacháin dhlíthiúla.

Ceapadh an tUasal Gâlea mar Bhreitheamh den Chúirt Ghinearálta an 27 Deireadh Fómhair 2021.

Rugadh Damjan Kukovec in 1977 i Liúibleána (an tSlóivéin). Bhain sé céim sa dlí amach ón Scoil Dlí in Univerza v Ljubljani(Ollscoil Liúibleána, an tSlóivéin) in 2001 chomh maith le máistreacht sa dlí ó Harvard Law School (Scoil Dlí Ollscoil Harvard, SAM) in 2002. Ba san ollscoil sin a rinne sé a chuid staidéir dochtúireachta, agus chosain sé a thráchtas in 2015.

In 2002, chuir sé tús lena shlí bheatha ghairmiúil mar dhlíodóir faoi oiliúint ag an Višje sodišče v Ljubljani(Chúirt Achomhairc Liúibleána, an tSlóivéin) agus bhí an post sin aige go dtí 2004. Le linn 2004, chuaigh sé isteach i gCúirt Speisialta do Shiarra Leon (Freetown, Siarra Leone) chomh maith leis an Ustavno sodišče (Cúirt Bhunreachtúil, an tSlóivéin).

In 2005, thosaigh Kukovec ag obair le Cúirt Bhreithiúnais an Aontais Eorpaigh mar oifigeach dlí sula ndeachaigh sé isteach i seirbhís dlí an Choimisiúin Eorpaigh ó 2006 go 2018. In 2006, glacadh leis, ina theannta sin, ag Barra na Slóivéine.

Ag an am céanna, thug Kukovec faoi ghairm acadúil, i réimse dhlí na hEorpa go háirithe. Idir 2011 agus 2013, mhúin sé an dlí domhanda ag Harvard Law School agus ag an Institute for Global Law and Policy (Institiúid um Dhlí agus Beartais Domhanda) san ollscoil chéanna. Mhúin sé ansin ag roinnt ollscoileanna dlí ar fud an domhain, lena n-áirítear FGV Direito Rio, Rio de Janeiro (Scoil Dlí Fhondúireacht Getulio Vargas, Rio de Janeiro, an Bhrasaíl) in 2014, University of Kent's Brussels School of International Studies (Brussels School of International Studies ag Ollscoil Kent, an Bheilg) in 2016, Institiúid Ollscoile Eorpach i bhFlórans (IOE, an Iodáil) in 2016 agus 2017, agus Univerza v Ljubljani arís idir 2018 agus 2020. Ó 2018, tá Kukovec mar léachtóir sa dlí agus stiúrthóir comhlach ar an gclár dochtúireachta ag Middlesex University i Londain (Ollscoil Middlesex, an Ríocht Aontaithe).

Is údar é Kukovec ar iliomad fhoilseachán maidir le dlí an Aontais Eorpaigh. Tugann ollscoileanna ar fud an domhain cuireadh dó go rialta teacht mar léachtóir chucu.

Ceapadh Kukovec mar bhreitheamh den Chúirt Ghinearálta an 13 Eanáir 2022.

Rugadh Suzanne Kingston in 1977 i mBaile Átha Cliath (Éire). Bhain sí céim sa dlí amach ó University of Oxford (Ollscoil Oxford, an Ríocht Aontaithe) in 1998 chomh maith le máistreacht sa dlí ó Universiteit Leiden (Ollscoil Leiden, an Ísiltír) in 2000. Ansin chuir sí tús lena staidéar dochtúireachta sa dlí in Ollscoil Leiden, áit ar chosain sí a tráchtas in 2009.

In 1998 glacadh léi mar Abhcóide i gCumann Onórach Gray’s Inn, Londain (an Ríocht Aontaithe). In 2002, chuaigh sí isteach in oifig gnólachta dlí idirnáisiúnta sa Bhruiséil mar dhlíodóir agus chleachtaigh sí dlí ansin go dtí 2004.

Chuaigh an tUasal Kingston isteach i seirbhís na Cúirte Breithiúnais mar Rúnaí Dlí don Abhcóide Ginearálta Leendert Geelhoed, lena raibh sí ag obair idir 2004 agus 2006.

Glacadh leis an Uasal Kingston mar Abhcóide i gCumann Onórach Óstaí an Rí, Baile Átha Cliath (Éire) in 2007. Tá sí ina dlíodóir ag Barra na hÉireann ó 2007 i leith mar Abhcóide, agus ansin mar Abhcóide Sinsir.

Ina theannta sin, mhúin an tUasal Kingston dlí sa Choláiste Ollscoile, Baile Átha Cliath (Éire) mar léachtóir ó 2007 go 2015 agus ansin, ó 2015 ar aghaidh, mar ollamh. Le linn a gairme acadúla, mhúin sí in ollscoileanna eile freisin, lena n-áirítear Columbia University (Ollscoil Columbia, SAM), Cambridge University (Ollscoil Cambridge, an Ríocht Aontaithe), Universiteit Leiden, agus Osgoode Hall Law School of York University in Toronto (Osgoode Hall Law School, Ollscoil York, Toronto, Ceanada). Is údar í ar iliomad foilseachán ar dhlí an Aontais Eorpaigh.

Ceapadh an tUasal Kingston mar Bhreitheamh den Chúirt Ghinearálta an 13 Eanáir 2022.

Rugadh Tihamér Tóth in 1971 in Zalaegerszeg (an Ungáir). Rinne sé staidéar ar an dlí ag an Szegedi Tudományegyetem (Ollscoil Szeged, an Ungáir), áit ar bhain sé céim sa dlí amach in 1994. Rinne sé staidéir dochtúireachta san ollscoil chéanna, agus chosain sé a thráchtas in 2001.

In 1994, chuir sé tús lena shlí bheatha ghairmiúil san Ungáir mar dhlíodóir san Oifig Gnóthaí Eorpacha, agus é lonnaithe, ceann i ndiaidh a chéile, san Aireacht um Chaidreamh Eacnamaíoch Idirnáisiúnta, san Aireacht Tionscail agus Trádála agus san Aireacht Gnóthaí Eachtracha.

Idir 1997 agus 2001, d’oibrigh sé mar láimhseálaí cásanna ag Oifig Idirnáisiúnta Údarás Iomaíochta na hUngáire. Ó 2001 go 2003, bhí sé ina bhall, agus ansin, ó 2003 go 2009, ina Chathaoirleach, ar an gComhairle Iomaíochta (an Ungáir). Le linn na tréimhse deiridh sin, bhí sé ina Leas-Uachtarán ar Údarás Iomaíochta na hUngáire freisin.

Ó 2009 go 2022, bhí sé ag cleachtadh mar dhlíodóir san Ungáir, go háirithe i réimse dhlí na hiomaíochta.

Ó 1999, dhírigh Tóth chomh maith ar a ghairm acadúil ag an Pázmány Péter Katolikus Egyetem (Ollscoil Chaitliceach Péter-Pázmány, an Ungáir). Bhí sé ina léachtóir ann idir 1999 agus 2010, ansin bhí sé ina leas-dhéan ann, freagrach as taighde agus caidreamh idirnáisiúnta ó 2010 go 2013, as gnóthaí mac léinn ó 2013 go 2014, agus as caidreamh idirnáisiúnta ó 2015 i leith. Ceapadh Tóth mar ollamh san ollscoil sin in 2018. Idir 2019 agus 2022, bhí Ollúnacht Jean Monnet aige i ndlí na hiomaíochta.

Is údar ar an iliomad foilseachán agus saothar ar dhlí na hiomaíochta é.

Ceapadh Tóth mar bhreitheamh den Chúirt Ghinearálta ar an 6 Iúil 2022.

Rugadh Beatrix Ricziová in 1981 sa Bhratasláiv (An tSlóvaic) agus bhain sí máistreacht sa Dlí amach in 2005 agus ansin dochtúireacht sa dlí in 2012 ón Univerzita Komenského v Bratislave (Ollscoil Comenius na Bratasláive, an tSlóvaic).

Chuir sí tús lena saol proifisiúnta mar chúntóir dlí i ngnólacht dlí sa tSlóvaic ó 2002 go 2004. Ó 2003 ar aghaidh, rinne sí tascanna aistriúcháin agus ateangaireachta ar feadh roinnt blianta ag imeachtaí a d'eagraigh bardas Stupava (An tSlóvaic).

Idir 2005 agus 2006, d’oibrigh Beatrix Ricziová mar dhlíodóir san Institiúid um Chomhfhogasú Dlíthe in Oifig Rialtas na Slóvaice, agus ansin idir 2007 agus 2008 in oifig an Phríomh-Ghníomhaire i gceannas ar ionadaíocht na Slóvaice os comhair Chúirt Bhreithiúnais an Aontais Eorpaigh, laistigh d'Aireacht Dlí agus Cirt na Slóvaice. Idir 2009 agus 2022, bhí sí mar Phríomhghníomhaire don tSlóvaic os comhair chúirteanna an Aontais.

Bhí sí ina chomhalta freisin, ó 2007 go 2010, de Bhuanchoiste um Chearta Sibhialta agus Tráchtála de chuid Chomhairle Reachtaíochta Rialtas na Slóvaice agus, ó 2012 go 2015, den Choiste um Athchódú an Dlí nóis imeachta Sibhialta sa tSlóvaic.

Ceapadh Beatrix Ricziová mar bhreitheamh den Chúirt Ghinéarálta ar an 6 Iúil 2022.

Rugadh Elisabeth Tichy-Fisslberger i Vín (an Ostair) in 1957. Bhain sí céim sa dlí amach in 1980, agus chríochnaigh sí le staidéar sa dlí idirnáisiúnta ag Ollscoil Chaitliceach Lováin (an Bheilg) in 1981.

Chuir sí tús lena gairm bheatha sa Choimisiún Eorpach in 1982 mar ateangaire comhdhála, post a bhí aici go dtí 1988. Ag an am céanna, rinne sí staidéar ar an teangeolaíocht san Universität Wien (Ollscoil Vín, an Ostair) agus bhain sí dioplóma sa staidéar teangeolaíochta amach sa bhliain 1984.

In 1988, thosaigh Elisabeth Ticky-Fisslberger ag obair ag Aireacht Gnóthaí Eachtracha na hOstaire san Ard-Stiúrthóireacht um Ghnóthaí Eorpacha agus Eacnamaíochta, mar chomhairleoir, agus bhí an post sin aici go dtí 1993.

In 1990, tugadh ar iasacht í d’Ambasáid na hOstaire i mBaile Átha Cliath. Ó lár 1991 go lár 1992, bhí sí ina leas-stiúrthóir ar bheartas iompair an Aontais Eorpaigh ag Aireacht Gnóthaí Eachtracha na hOstaire i Vín. In 1990, tugadh ar iasacht í d’Ambasáid na hOstaire i Londain.

Ó 1993 go 2000, bhí sí ina comhairleoir dlí ag Buanionadaíocht na hIodáile chuig an Aontas Eorpach.

Idir 2000 agus 2003, bhí Elisabeth Tichy-Fisslberger ina Stiúrthóir ar Ghnóthaí Ginearálta an Aontais agus ar Institiúidí an Aontais ag Aireacht Gnóthaí Eachtracha na hOstaire. Ina dhiaidh sin, ceapadh í ina Leas-Ard-Stiúrthóir um Ghnóthaí Eorpacha agus Eacnamaíochta agus, ó 2007 i leith, ceapadh í ina hArd-Stiúrthóir um Ghnóthaí Dlíthiúla agus Consalachta. Ina theannta sin, ghníomhaigh sí freisin mar chomhordaitheoir náisiúnta don chomhrac i gcoinne gáinneáil ar dhaoine idir 2009 agus 2017.

Ó mhí na Nollag 2017, bhí sí ina hAmbasadóir ag Buanionadaíocht na hOstaire chuig Oifig na Náisiún Aontaithe agus eagraíochtaí idirnáisiúnta eile sa Ghinéiv. In 2020, ceapadh í ina hUachtarán ar Chomhairle na Náisiún Aontaithe um Chearta an Duine agus, in 2021, ina hUachtarán ar Choimisiún Eacnamaíochta na Náisiún Aontaithe don Eoraip.

In éineacht leis na gníomhaíochtaí sin, mhúin Elisabeth Tichy-Fisslberger an dlí ag an Diplomatische Akademie Wien (Acadamh Taidhleoireachta Vín, an Ostair) ó 2002 i leith. Idir 2006 agus 2017, mhúin sí ag an Universität Wien freisin.

Ceapadh Elisabeth Tichy-Fisslberger mar Bhreitheamh den Chúirt Ghinearálta an 15 Meán Fómhair 2022.

Rugadh William Valasidis sa bhliain 1971 in Thessaloniki (an Ghréig), agus bhain sé céim amach sa dlí in 1993 ón Aristoteleio Panepistimio Thessalonikis (Ollscoil Aristotle Thessaloniki, an Ghréig). Chríochnaigh sé a chuid staidéir le céim Mháistreachta sa dlí ó Harvard Law School (Scoil Dlí Harvard, Stáit Aontaithe) sa bhliain 1996.

Ó 1993 go 1995, bhí sé ina dhlíodóir faoi oiliúint do na scrúduithe le haghaidh rochtain ar ghairm an dlí. Thosaigh sí mar abhcóide ag Barra Thessaloniki in 1996, agus ina dhiaidh sin chleachtaigh sé i ngnólachtaí dlí i Meicsiceo agus sna Stáit Aontaithe.

Sa bhliain 1998, chuaigh William Valasidis isteach i seirbhís Chúirt Bhreithiúnais an Aontais Eorpaigh den chéad uair, mar Rúnaí Dlí leis an mBreitheamh Krateros Ioannou. Bhí sé mar Rúnaí Dlí ina dhiaidh sin leis an mBreitheamh Vassilios Skouris, a ceapadh mar Uachtarán na Cúirte in 2003 agus lenar oibrigh sé ar feadh cúig bliana déag, ó 1999 go 2014.

In 2014, ceapadh é ina Stiúrthóir Prótacail agus Faisnéise na Cúirte, agus ansin ina Stiúrthóir Cumarsáide, post a bhí aige go dtí 2022.

Údar foilseachán dlí agus obair eagarthóireachta, leagann sé an-tábhacht ar cleachtas dhlí an Aontais a theagasc trí bheith páirteach go gníomhach in eagrú agus reáchtáil Chomórtas Bhréagchúirt an Dlí Eorpaigh, mar bhall den ghiúiré ó 2004 go 2005, agus ansin mar chomhalta agus leas-uachtarán ar an gCumann Dlí Eorpach um Bhréagchúirteanna ó 2006 go 2022. Ina theannta sin, glacann sé páirt go rialta i gcomhdhálacha náisiúnta agus idirnáisiúnta.

Ceapadh William Valasidis mar bhreitheamh den Chúirt Ghinearálta ar an 15 Meán Fómhair 2022.

Rugadh Steven Verschuur sa bhliain 1977 in Arnhem (an Ísiltír). Rinne sé staidéar ar an dlí ag Universiteit Utrecht (Ollscoil Utrecht, an Ísiltír) agus bhain sé céim mháistreachta amach sa dlí ón Ollscoil sin in 2001. Lean sé lena oideachas ollscoile ag Ollscoil Liège (an Bheilg), áit ar bhain sé dioplóma ardstaidéir sa Dlí Eorpach amach in 2002. Chosain sé a dhochtúireacht sa dlí ag Universiteit Utrecht in 2010.

Ó 2002, d’oibrigh Steven Verschuur mar dhlíodóir le roinnt gnólachtaí dlí san Ísiltír agus sa Bheilg i réimsí éagsúla de dhlí an Aontais amhail iomaíocht, státchabhair, beartas trádála, soláthar poiblí agus bearta sriantacha arna nglacadh faoi chomhbheartas eachtrach agus slándála an Aontais.

Tá líon mór alt scríofa aige freisin ar na hábhair sin le haghaidh léirmheasanna agus leabhair dlí.

Ag an am céanna, bhí sé ina leas-bhreitheamh i rannán dlí shibhialta an rechtbank Zeeland-West-Brabant (Cúirt Zeeland-West-Brabant, an Ísiltír) ó 2021 go 2022.

Ceapadh Steven Verschuur mar bhreitheamh den Chúirt Ghinéarálta ar an 15 Meán Fómhair 2022.