L-attività ġudizzjarja

Leġiżlazzjoni tar-Reġjun ta’ Vlaanderen (il-Belġju) kellha l-effett li tagħmel obbligatorju, f’dan ir-reġjun, l-isturdament minn qabel tal-annimali meta jiġu biex jinqatlu. Dan kien jaffettwa l-qtil ritwali u għalhekk assoċjazzjonijiet Lhud u Musulmani pprovaw jiksbu l-annullament ta’ din il-leġiżlazzjoni. Fuq domanda preliminari magħmula minn qorti Belġjana, il-Qorti tal-Ġustizzja kkonstatat li l-leġiżlazzjoni inkwistjoni, li ma tipprekludix sturdament reversibbli li ma jkunx jista’ jirriżulta fil-mewt tal-annimal, u li ma tostakolax it-tqegħid fiċ-ċirkolazzjoni ta’ prodotti li joriġinaw mill-annimali li nqatlu b’mod ritwali barra mir-Reġjun ta’ Vlaanderen, tiżgura bilanċ ġust bejn il-libertà tar-reliġjon, iggarantita mill-Karta, u l-benesseri tal-annimali, irrikonoxxut fit-Trattat FUE (ara t-taqsima «Il-protezzjoni tal-konsumaturi»).Sentenza Centraal Israëlitisch Consistorie van België et tas-17 ta’ Diċembru 2020, C-336/19

Fil-kuntest ta’ rikors għal nuqqas ta’ twettiq ta’ obbligu, il-Qorti tal-Ġustizzja ddeċidiet li r-restrizzjonijiet imposti mill-Ungerija fuq il-finanzjament tal-organizzazzjonijiet ċivili minn persuni stabbiliti barra minn dan l-Istat Membru ma humiex konformi mad-dritt tal-Unjoni. B’mod partikolari, dawn ir-restrizzjonijiet imorru kontra l-obbligi li għandhom l-Istati Membri mhux biss fir-rigward tal-libertà ta’ moviment tal-kapital stabbilita fit-Trattat dwar il-Funzjonament tal-Unjoni Ewropea iżda wkoll fir-rigward tad-dispożizzjonijiet tal-Karta dwar il-libertà ta’ assoċjazzjoni, kif ukoll kontra d-drittijiet għar-rispett tal-ħajja privata u tal-familja u għall-protezzjoni tad-data personali (ara t-taqsima «Il-protezzjoni tad-data personali»).Sentenza Il-Kummissjoni vs L-Ungerija (Trasparenza assoċjattiva) tat-18 ta’ Ġunju 2020, C-78/18

F’rikors ieħor għal nuqqas ta’ twettiq ta’ obbligu li jikkonċerna lill-Ungerija, il-Qorti tal-Ġustizzja analizzat, fid-dawl tal-Karta, il-liġi nazzjonali dwar l-edukazzjoni ogħla. Din il-liġi kienet tissuġġetta l-eżerċizzju, fl-Ungerija, ta’ attività ta’ taħriġ li twassal għal diploma mill-istabbilimenti ta’ edukazzjoni ogħla li jinsabu barra miż-Żona Ekonomika Ewropea (ŻEE) għall-eżistenza ta’ konvenzjoni internazzjonali li torbot lill-Ungerija mal-Istat terz li fih għandu s-sede tiegħu l-istabbiliment ikkonċernat u għat-twettiq, minn dan l-istabbiliment, ta’ attivitajiet ta’ edukazzjoni fl-Istat Membru ta’ oriġini tiegħu. Il-Qorti tal-Ġustizzja enfasizzat li tali kundizzjonijiet imorru kontra l-libertà akkademika, il-libertà li jinħolqu stabbilimenti ta’ edukazzjoni ogħla u l-libertà ta’ intrapriża.Sentenza Il-Kummissjoni vs L-Ungerija (Edukazzjoni ogħla) tas-6 ta’ Ottubru 2020, C-66/18

Proċedura b’urġenza għal deċiżjoni preliminari quddiem il-Qorti tal-Ġustizzja kienet tikkonċerna l-prinċipju ta’ ugwaljanza fit-trattament bejn ċittadini nazzjonali u ċittadini taż-Żona Ekonomika Ewropea (ŻEE). Il-Qorti tal-Ġustizzja indikat li l-Karta tapplika meta Stat Membru (f’dan il-każ il-Kroazja) ikollu jagħti deċiżjoni dwar talba għal estradizzjoni mressqa minn Stat terz (f’dan il-każ ir-Russja) fir-rigward ta’ ċittadin ta’ Stat terz ieħor li huwa Membru tal-Assoċjazzjoni Ewropea għall-Kummerċ Ħieles u Parti fil-Ftehim dwar iż-ŻEE (l-Islanda). Għaldaqstant, l-Istat Membru li jkun irċieva t-talba għal estradizzjoni għandu jivverifika li ċ-ċittadin ikkonċernat ma huwiex ser ikun suġġett għall-piena tal-mewt, għat-tortura jew għal pieni jew trattamenti inumani jew degradanti fl-Istat terz li jkun ressaq it-talba għal estradizzjoni.Sentenza Ruska Federacija tat-2 ta’ April 2020, C-897/19 PPU

Fil-kuntest ta’ żewġ proċeduri b’urġenza għal deċiżjoni preliminari li jikkonċernaw in-nuqqasijiet sistemiċi jew ġeneralizzati fir-rigward tal-indipendenza tal-poter ġudizzjarju fil-Polonja, il-Qorti tal-Ġustizzja ddeċidiet li l-eżekuzzjoni ta’ mandat ta’ arrest Ewropew maħruġ minn awtorità ġudizzjarja Pollakka tista’ tiġi rrifjutata biss jekk, fid-dawl tas-sitwazzjoni individwali tal-persuna kkonċernata, tan-natura tar-reat inkwistjoni u tal-kuntest fattwali tal-ħruġ ta’ dan il-mandat ta’ arrest, ikun hemm raġunijiet serji u vverifikati sabiex wieħed jemmen li din il-persuna, ladarba kkonsenjata lill-awtoritajiet Pollakki, tkun ser tiġi esposta għal riskju reali ta’ ksur tad-dritt għal smigħ xieraq tagħha, li huwa ggarantit mill-Karta. Sentenza Openbaar Ministerie et tas-17 ta’ Diċembru 2020, C-354/20 PPU u C-412/20 PPU

Il-Qorti tal-Ġustizzja ddikjarat inammissibbli żewġ talbiet għal deċiżjoni preliminari dwar il-leġiżlazzjoni Pollakka tal-2017 dwar il-proċeduri dixxiplinari fir-rigward tal- imħallfin. Hija madankollu enfasizzat li l-fatt li l-imħallfin nazzjonali kienu għamlu domandi preliminari li jirriżultaw li huma inammissibbli ma jiġġustifikax li jinfetħu proċeduri dixxiplinari fil-konfront tagħhom. Hija fakkret li ma jistax jiġi aċċettat li dispożizzjonijiet nazzjonali jesponu lill-imħallfin nazzjonali għal proċeduri dixxiplinari minħabba l-fatt li jkunu għamlu rinviju għal deċiżjoni preliminari lill-Qorti tal-Ġustizzja. Fil-fatt, l-assenza ta’ riskju li jkunu esposti għal proċeduri jew għal sanzjonijiet dixxiplinari għal din ir-raġuni tikkostitwixxi garanzija inerenti għall-indipendenza tal-poter ġudizzjarju. Sentenza Miasto Łowicz u Prokurator Generalny tas-26 ta’ Marzu 2020, C-558/18 u C-563/18

Barra minn hekk, il-Qorti tal-Ġustizzja kkonstatat li l-Ungerija naqset milli twettaq l-obbligi tagħha li jirriżultaw mid-dritt tal-Unjoni fil-qasam tal-proċeduri dwar l-għoti ta’ protezzjoni internazzjonali u fil-qasam tar-ritorn taċ-ċittadini ta’ pajjiżi terzi li jkunu qegħdin jirrisjedu irregolarment. B’mod partikolari, il-limitazzjoni tal-aċċess għall-proċedura ta’ protezzjoni internazzjonali, id-detenzjoni irregolari tal-applikanti għal din il-protezzjoni f’żoni ta’ tranżitu kif ukoll it-trasferiment lejn żona mal-fruntiera ta’ ċittadini ta’ pajjiżi terzi li jkunu qegħdin jirrisjedu irregolarment, mingħajr ma jiġu osservati l-garanziji marbuta ma’ proċedura ta’ ritorn, jikkostitwixxu ksur tad-dritt tal-Unjoni. Sentenza Il-Kummissjoni vs L-Ungerija tas-17 ta’ Diċembru 2020, C-808/18

Fil-kuntest ta’ tliet rikorsi għal nuqqas ta’ twettiq ta’ obbligu ppreżentati mill-Kummissjoni kontra l-Polonja, l-Ungerija u r-Repubblika Ċeka, il-Qorti tal-Ġustizzja ddeċidiet li, billi rrifjutaw li jikkonformaw mal-mekkaniżmu temporanju ta’ rilokazzjoni tal-applikanti għal protezzjoni internazzjonali, dawn it-tliet Stati Membri naqsu milli jwettqu l-obbligi tagħhom li jirriżultaw mid-dritt tal-Unjoni. Dawn l-Istati Membri ma jistgħux jinvokaw iż- żamma tal-ordni pubbliku, is-salvagwardja tas-sigurtà interna, u l-allegat funzjonament ħażin tal-mekkaniżmu ta’ rilokazzjoni sabiex jevitaw, b’mod ġenerali, l-implimentazzjoni ta’ dan il-mekkaniżmu. Sentenza Il-Kummissjoni vs Il-Polonja, L-Ungerija u Ir-Repubblika Ċeka tat-2 ta’ April 2020, C-715/17, C-718/17 u C-719/17

Fir-rigward tal-ipproċessar tad-data, il-Qorti tal-Ġustizzja kkonfermat li d-dritt tal- Unjoni jipprekludi, bħala prinċipju, leġiżlazzjonijiet nazzjonali li jobbligaw lill-fornituri ta’ servizzi ta’ komunikazzjonijiet elettroniċi, għall-finijiet tal-ġlieda kontra r-reati kriminali jew il-kriminalità, jittrażmettu lill-awtoritajiet pubbliċi jew iżommu d-data dwar it-traffiku u dwar il-lokalizzazzjoni tal-utenti, b’mod ġenerali u mingħajr distinzjoni. Hija madankollu ppreċiżat li jista’ jkun hemm eċċezzjonijiet sabiex jiġi indirizzat theddid serju għas-sigurtà nazzjonali, sabiex jiġu miġġielda l-avvenimenti kriminali serji jew sabiex jiġi evitat theddid serju għas-sigurtà pubblika. Sentenzi Privacy International u La Quadrature du Net et tas-6 ta’ Ottubru 2020, C-623/17, C-511/18, C-512/18 u C-520/18

Fl-aħħar nett, il-Qorti tal-Ġustizzja kkonstatat li l-Ungerija naqset milli twettaq l-obbligi tagħha taħt id-dritt tal-Unjoni minħabba li imponiet restrizzjonijiet fuq il-finanzjament tal-organizzazzjonijiet ċivili minn persuni stabbiliti barra mit- territorju tagħha. Fil-fatt, liġi Ungeriża timponi, taħt piena ta’ sanzjonijiet, obbligi ta’ reġistrazzjoni, ta’ dikjarazzjoni u ta’ pubbliċità fuq organizzazzjonijiet ċivili li jibbenefikaw minn għajnuna barranija li taqbeż ċertu livell minimu. Il-Qorti tal- Ġustizzja qieset li dawn ir-restrizzjonijiet huma diskriminatorji u jmorru kontra mhux biss il-libertajiet ta’ moviment ta’ kapital u ta’ assoċjazzjoni iżda jmorru wkoll kontra l-prinċipji ta’ rispett tal-ħajja privata (ara t-taqsima «Unjoni bbażata fuq il-valur tal-persuna umana u fuq l-Istat tad-dritt») u ta’ protezzjoni tad-data personali. Sentenza Il-Kummissjoni vs L-Ungerija (Trasparenza assoċjattiva) tat-18 ta’ Ġunju 2020, C-78/18

F’kawżi dwar proprjetà immobbli mgħammra għall-abitazzjoni u proposta għall-kiri fis-sit internet Airbnb, il-Qorti tal-Ġustizzja ddeċidiet li leġiżlazzjoni nazzjonali li tissuġġetta għal awtorizzazzjoni l-kiri b’mod ripetut ta’ proprjetà intiża għall-abitazzjoni, għal perijodi qosra, lil klijenti preżenti għal perijodu temporanju li ma jistabbilixxux id-domiċilju tagħhom f’din il-proprjetà hija konformi mad-dritt tal-Unjoni. Fil-fatt, il-Qorti tal-Ġustizzja qieset li l-ġlieda kontra n-nuqqas ta’ abitazzjonijiet maħsuba għall-kiri għal perijodi twal tikkostitwixxi raġuni imperattiva ta’ interess ġenerali li tiġġustifika tali leġiżlazzjoni. Sentenza Cali Apartments tat-22 ta’ Settembru 2020, C-724/18 u C-727/18.

Fil-qasam tal-klawżoli inġusti fil-kuntratti konklużi mal-konsumaturi, il-Qorti tal-Ġustizzja qieset li, fil-kuntratti ta’ self ipotekarju, il-klawżola li tipprevedi l-applikazzjoni ta’ rata ta’ interessi varjabbli bbażata fuq l-indiċi ta’ referenza tal-banek tat-tfaddil nazzjonali tikkostitwixxi klawżola inġusta meta ma tkunx ċara u li tinftiehem. Jekk dan ikun il-każ, il-qrati nazzjonali jistgħu jissostitwixxuha bi klawżola bbażata fuq kriterji oħra stabbiliti fil-liġi bil-għan li jiġu evitati konsegwenzi partikolarment sfavorevoli għall-konsumaturi, bħalma hija d-dikjarazzjoni ta’ nullità tal-kuntratt ta’ self. Sentenza Gómez del Moral Guasch tat-3 ta’ Marzu 2020, C-125/18

Il-Qorti tal-Ġustizzja ppreċiżat ukoll li, għalkemm leġiżlazzjoni nazzjonali tista’ tipprevedi terminu ta’ preskrizzjoni għat-tressiq mill-konsumatur ta’ kawża għal ħlas lura, dan it-terminu ma għandux ikun inqas favorevoli minn dak previst fir-rigward ta’ kawżi simili u lanqas ma għandu jagħmel impossibbli jew eċċessivament diffiċli l-eżerċizzju mill- konsumatur tad-drittijiet tiegħu. Sentenza Raiffeisen Bank tad-9 ta’ Lulju 2020, C-698/18 u C-699/18.

Fil-qasam tal-ittikkettjar ta’ prodott kożmetiku, il-Qorti tal-Ġustizzja ddeċidiet li l-indikazzjoni tal-»funzjoni», li għandna tidher fuq il-kontenitur tiegħu u fuq l-imballaġġ tiegħu, għandha tinforma b’mod ċar lill-konsumatur dwar l-użu u l-metodu ta’ użu ta’ dan il-prodott. Fil-fatt, l-indikazzjonijiet dwar il-prekawzjonijiet partikolari fl-użu ta’ dan il-prodott, dwar il- funzjoni tiegħu u dwar l-ingredjenti tiegħu ma jistgħux jidhru f’katalgu tal-impriża li għall-qari tiegħu jsir riferiment permezz tas-simbolu ta’ id bi ktieb miftuħ li jkun jidher fuq il-kontenitur jew fuq l-imballaġġ. Sentenza A.M. vs E.M. tas-17 ta’ Diċembru 2020, C-667/19

Fil-qasam tal-protezzjoni tal-konsumaturi u tal-ambjent, il-Qorti tal-Ġustizzja ddeċidiet li manifattur ta’ vetturi bil-mutur ma jistax jinstalla, fuq il-vetturi tiegħu, software li kapaċi jimmanipula r-riżultati tat-testijiet ta’ approvazzjoni tat-tip fuq l-emissjonijiet ta’ gassijiet inkwinanti. Il-konsumaturi li jkunu ġarrbu dannu minħabba x-xiri ta’ vetturi mmanipulati b’mod illegali jistgħu jressqu kawża kontra l-manifattur tal-vetturi bil-mutur quddiem il-qrati tal-Istati Membri fejn dawn il-vetturi kienu ġew mibjugħa lilhom. Fil-fatt, id-dannu tax-xerrej jimmaterjalizza fl-Istat Membru fejn jakkwista l-vettura bi prezz ogħla mill-valur reali tagħha. Sentenza CLCV et tas-17 ta’ Diċembru 2020, C-693/18 / Sentenza Verein für Konsumenteninformation tad-9 ta’ Lulju 2020, C-343/19

Protezzjoni aħjar tal-konsumaturi u tal-ambjent toħroġ ukoll mis-sentenza tal-Qorti Ġenerali li ċaħdet it-talba ta’ PlasticsEurope, assoċjazzjoni internazzjonali li tirrappreżenta u tiddefendi l-interessi tal-impriżi li jimmanifatturaw u jimportaw prodotti ta’ materja tal-plastik, u li kkonfermat id-deċiżjoni tal-Aġenzija Ewropea għas-Sustanzi Kimiċi li tissuġġetta l-bisfenol A għal awtorizzazzjoni bħala sustanza li għandha karatteristiċi li jfixklu s-sistema endokrinali u li jista’ jkollhom effetti serji fuq l-ambjent. Sentenza PlasticsEurope tas-16 ta’ Diċembru 2020, T-207/18

Żewġ sentenzi mogħtija fl-2020 jikkonċernaw il-konsum tal-laħam. Il-Qorti tal-Ġustizzja ddeċidiet, f’waħda minn dawn is-sentenzi, li d-dritt tal-Unjoni ma jipprekludix leġiżlazzjoni nazzjonali li timponi l-isturdament qabel il-qtil tal-annimali (ara t-taqsima «Unjoni bbażata fuq il-valur tal-persuna umana u fuq l-Istat tad-dritt»). Fis-sentenza l-oħra, il-Qorti Ġenerali ċaħdet ir-rikors ta’ tnejn mill-ikbar produtturi u distributuri mondjali tal-laħam li kienu qegħdin jippruvaw jiksbu l-annullament ta’ regolament li kien ipprojbixxihom, għal raġunijiet ta’ saħħa pubblika, milli jesportaw, lejn l-Unjoni, ċerti prodotti li joriġinaw mill-annimali. F’dan il-każ, fil-fatt, l-awtoritajiet Brażiljani ma kinux joffru, fir-rigward ta’ ċerti stabbilimenti nazzjonali, il-garanziji meħtieġa fl-Unjoni fil-qasam tas-saħħa pubblika. Sentenza Centraal Israëlitisch Consistorie van België tas-17 ta’ Diċembru, C-336/19 / Sentenza BRF u SHB Comercio e Industria de Alimentos tat-8 ta’ Lulju 2020, T-429/18

Qamet tilwima bejn il-kumpannija tal-ajru TAP u passiġġier dwar il-kumpens ta’ dan tal-aħħar minħabba li titjira minn Fortaleza (il-Brażil) sa Oslo (in-Norveġja), b’konnessjoni f’Lisbona (il-Portugall), kienet waslet b’dewmien ta’ kważi 24 siegħa. Dan id-dewmien kien dovut għall-fatt li, matul titjira preċedenti, l-ajruplan użat għat- titjira bejn Lisbona u Oslo kellu jinżel f’ajruport differenti sabiex jitneħħa passiġġier li kien agredixxa fiżikament passiġġieri oħra. Il-Qorti tal-Ġustizzja ddeċidiet li l-aġir problematiku ta’ passiġġier tal-ajru jista’ jeħles lit-trasportatur mill-obbligu tiegħu li jħallas kumpens minħabba l-kanċellazzjoni jew id-dewmien twil tat-titjira kkonċernata jew ta’ titjira segwenti operata minnu stess permezz tal-istess ajruplan. Sentenza Transportes Aéreos Portugueses tal-11 ta’ Ġunju 2020, C-74/19

Passiġġier Kazaki ma kienx tħalla jitla’, f’Larnaca (Ċipru), fuq titjira tal-kumpannija tal-ajru Rumena Blue Air lejn Bukarest (ir-Rumanija), għar-raġuni li d-dokumenti tal-ivvjaġġar ippreżentati kienu tqiesu li ma kinux adegwati. Fuq domanda minn qorti Ċiprijotta, il-Qorti tal-Ġustizzja qieset li ma huwiex il-kompitu tat-trasportatur tal-ajru li jistabbilixxi huwa stess, b’mod definittiv, in-natura inadegwata ta’ tali dokumenti u li, fil-każ ta’ kontestazzjoni mill- passiġġier, huwa għalhekk il-kompitu ta’ qorti nazzjonali li tevalwa jekk il-fatt li ma tħalliex jitla’ fuq it-titjira huwiex ta’ natura raġonevolment iġġustifikat. Jekk dan ma jkunx il-każ, il-passiġġier ikollu dritt għall-kumpens u għall-assistenza previsti fid-dritt tal-Unjoni. Sentenza Blue Air tat-30 ta’ April 2020, C-584/18

L-awtorità tal-kompetizzjoni Taljana kienet akkużat lil Ryanair li, fis-sit internet tagħha, kienet ippubblikat prezzijiet ta’ servizz tal-ajru li ma kinux juru, sa mill-ewwel indikazzjoni tagħhom, ċerti elementi fundamentali. Meta saritilha domanda dwar dan il-punt, il-Qorti tal-Ġustizzja qieset li t-trasportaturi tal-ajru għandhom jindikaw, fil-pubblikazzjoni tal-offerti ta’ prezz tagħhom fuq l-internet u sa mill-offerta inizjali, l-ammont tal-VAT marbut mat-titjiriet nazzjonali, l-ispejjeż tal-ħlas b’karta ta’ kreditu kif ukoll l-ispejjeż tar-reġistrazzjoni meta ma jkun propost ebda mod ta’ reġistrazzjoni bla ħlas bħala alternattiva. Sentenza Ryanair tat-23 ta’ April 2020, C-28/19

Fuq domanda mill-Qorti tal-Appell ta’ Ħelsinki (il-Finlandja), il-Qorti tal-Ġustizzja qieset li passiġġier tal-ajru li jkun aċċetta li jivvjaġġa fuq titjira alternattiva, li t-trasportatur tal-ajru tagħha kien dak li kellu jopera u li kien annulla t-titjira inizjalment prevista, għandu dritt għal kumpens minħabba d-dewmien twil tat-titjira alternattiva. Sentenza Finnair tat-12 ta’ Marzu 2020, C-832/18

F’tilwima bejn studenta Ġermaniża, residenti fi Franza, u l-Land ta’ Rheinland-Pfalz, fejn kienet tattendi stabbiliment ta’ edukazzjoni sekondarja, il-Qorti tal-Ġustizzja ddeċidiet li l-fatt li r-rimbors tal-ispejjeż tat-trasport skolastiku jkun suġġett għar-residenza fil-Land ikkonċernat jikkostitwixxi diskriminazzjoni indiretta kontra l-ħaddiema transkonfinali u l-familja tagħha, li, bħala prinċipju, hija pprojbita mid-dritt tal-Unjoni. Fil-każ tat-trasport skolastiku fil-Land ta’ Rheinland-Pfalz, tali kundizzjoni ta’ residenza ma hijiex iġġustifikata minn raġuni imperattiva ta’ interess ġenerali marbuta mal-organizzazzjoni tas-sistema skolastika. Sentenza Landkreis Südliche Weinstraße vs PF et tat-2 April 2020, C-830/18

Il-Qorti tal-Ġustizzja ċaħdet ir-rikorsi għal annullament, ippreżentati mill-Ungerija u mill-Polonja, kontra d-Direttiva li ssaħħaħ id-drittijiet tal-ħaddiema kkollokati. Hija indikat li, fid-dawl b’mod partikolari tal-evoluzzjoni tas-suq intern wara t-tkabbir suċċessiv tal-Unjoni, il-leġiżlatur tal-Unjoni seta’ jwettaq evalwazzjoni ġdida tal-interessi tal-impriżi li jibbenefikaw mil-libertà li jiġu pprovduti servizzi u tal-interessi tal-ħaddiema tagħhom ikkollokati fi Stat Membru ospitanti, bil-għan li jiġi żgurat li din il-libertà li jiġu pprovduti servizzi tiġi applikata f’kundizzjonijiet ta’ kompetizzjoni ġusti bejn dawn l-impriżi u dawk stabbiliti f’dan l-Istat Membru. Sentenzi L-Ungerija u Il-Polonja vs Il-Parlament u Il-Kunsill tat-8 ta’ Diċembru 2020, C-620 u 626/18

Fil-kuntest ta’ kawża dwar impriża tat-trasport Olandiża li kienet tuża s-servizzi ta’ sewwieqa li joriġinaw mill-Ġermanja u mill-Ungerija, il-Qorti tal-Ġustizzja ddeċidiet li d-Direttiva dwar il-kollokament tal-ħaddiema tapplika, bħala prinċipju, għat-trasport bit-triq, b’mod partikolari dak internazzjonali. Għaldaqstant, il-ftehimiet kollettivi tal-Istat Membru ospitanti japplikaw għall-ħaddiema li jkunu kkollokati f’dan l-Istat Membru. Madankollu, il-fatt li sewwieq li jaħdem fit-trasport bit-triq internazzjonali, imqiegħed għad-dispożizzjoni ta’ impriża stabbilita fl-Istat Membru ospitanti, jirċievi f’dan l-Istat Membru l-istruzzjonijiet inerenti għall-missjonijiet tiegħu u jibda u jtemm dawn il-missjonijiet fl-imsemmi Stat Membru ma huwiex biżżejjed, fih innifsu, sabiex jitqies li dan is-sewwieq kien ġie kkollokat f’dan l-Istat Membru. Sentenza Federatie Nederlandse Vakbeweging tal-1 ta’ Diċembru 2020, C-815/18

Il-kumpannija tal-ajru Spanjola Vueling kienet ġiet ikkundannata taħt id-dritt kriminali għal frodi soċjali fi Franza wara li kienet affiljat il-persunal tal-kabina tagħha, ikkollokat fl-ajruport Roissy-Charles De Gaulle f’Pariġi, mas-sigurtà soċjali Spanjola minflok mas- sigurtà soċjali Franċiża. Skont il-Qorti tal-Ġustizzja, din il-konstatazzjoni definittiva ta’ frodi, madankollu, ma tistax torbot lill-qrati ċivili Franċiżi li jkunu sarulhom talbiet għal kumpens sa fejn, bi ksur tad-dritt tal-Unjoni, qabel l-imsemmija konstatazzjoni ma kienx hemm djalogu mal-istituzzjoni Spanjola li kien jippermettilha teżamina mill-ġdid il-fajl u, jekk ikun il-każ, tannulla jew tirtira ċ-ċertifikati li jattestaw l-affiljazzjoni tal-ħaddiema taħt il-leġiżlazzjoni Spanjola. Sentenza CRPNPAC u Vueling Airlines tat-2 ta’ April 2020, C-370/17 u C-37/18

Fir-rigward tad-dritt għal-leave annwali mħallas, il-Qorti tal-Ġustizzja speċifikat li ħaddiem imkeċċi b’mod illegali li mbagħad jerġa’ jiġi integrat fl-impjieg li kellu qabel jibbenefika minn dan id-dritt għall-perijodu bejn dawn iż-żewġ avvenimenti anki jekk, matul dan il- perijodu, huwa ma jkunx effettivament ħadem. Madankollu, meta l-ħaddiem, matul il-perijodu inkwistjoni, ikun okkupa impjieg ġdid, huwa jkun jista’ jinvoka d-drittijiet għal-leave annwali mħallas, li jikkorrispondu għall-perijodu li matulu okkupa dan l-impjieg, fil-konfront biss tal-persuna li timpjegah il-ġdida. Sentenza Varhoven kasatsionen sad na Republika Bulgaria u Iccrea Banca tal-25 ta’ Ġunju 2020, C-762/18 u C-37/19

Il-Qorti tal-Ġustizzja ntalbet teżamina wkoll il-legalità tat-tqegħid għad-dispożizzjoni ta’ riżorsi tal-Istat favur żewġ korpi ta’ assigurazzjoni għall-mard li joperaw taħt il-kontroll tal- awtoritajiet Slovakki fil-kuntest ta’ skema ta’ assigurazzjoni għall-mard obbligatorja. Hija kkonstatat li, minkejja l-eżistenza ta’ ċerta kompetizzjoni fost id-diversi operaturi, kemm privati u kemm pubbliċi, koperti minn din l-iskema, din tal-aħħar kellha għan soċjali u kienet timplimenta l-prinċipju ta’ solidarjetà. Hija għaldaqstant iddeċidiet, filwaqt li kkonfermat b’hekk id-deċiżjoni tal-Kummissjoni, li l-każ taż-żewġ korpi inkwistjoni ma kienx jaqa’ taħt ir-regoli tal-Unjoni fil-qasam tal-għajnuna mill-Istat. Sentenza Il-Kummissjoni u Is-Slovakka vs Dôvera zdravotná poistʼovňa tal-11 ta’ Ġunju 2020, C-262/18 P u C-271/18 P

Bl-istess mod, il-Qorti tal-Ġustizzja eżaminat in-natura tas-sussidji mogħtija minn Franza, fil- forma ta’ tnaqqis tal-kontribuzzjonijiet salarjali, lis-sajjieda u lill-produtturi tal-akwakultura milquta min-nawfraġju tal-bastiment Erika u mill-maltempati vjolenti li seħħew fl-1999. Il-Qorti tal-Ġustizzja kkonstatat li dan it-tnaqqis kien jikkonċerna piżijiet li ma jaqgħux fuq l-impriżi iżda fuq l-impjegati tagħhom. Għaldaqstant, dan it-tnaqqis ma kien jagħti ebda vantaġġ lil dawn l-impriżi, b’tali mod li r-regoli tal-Unjoni fil-qasam tal-għajnuna mill-Istat, li jikkonċernaw biss lill-impriżi, ma kinux applikabbli għal din is-sitwazzjoni. Il-Qorti tal- Ġustizzja, għalhekk, annullat parzjalment id-deċiżjoni tal-Kummissjoni li tordna lil Franza tirkupra dawn is-sussidji. Sentenza Ministre de l’Agriculture et de l’Alimentation vs Compagnie des pêches de Saint- Malo tas-17 ta’ Settembru 2020, C-212/19

Għall-kuntrarju, il-Qorti tal-Ġustizzja kkundannat lill-Italja għall-ħlas ta’ somma f’daqqa ta’ 7.5 miljuni euro u multa ta’ kuljum ta’ 80 000 euro talli naqset milli tirkupra għajnuna, fl-ammont ta’ madwar 13.7 miljuni euro, mogħtija illegalment lis-setur tal-lukandi f’Sardegna. Fil-fatt, minkejja li, fl-2008, il-Kummissjoni kienet ordnat lill-Italja tirkupra din l-għajnuna u minkejja li, fl-2012, il-Qorti tal-Ġustizzja kienet ikkonstatat in-nuqqas tal-Italja li twettaq l-obbligu tagħha f’dan ir-rigward, dan l-Istat Membru baqa’ ma wettaqx l-obbligu ta’ rkupru tiegħu. Il-Kummissjoni għalhekk ippreżentat rikors ieħor għal nuqqas ta’ twettiq ta’ obbligu sabiex jiġu imposti sanzjonijiet pekunjarji fuq l-Italja, liema rikors intlaqa’ mill- Qorti tal-Ġustizzja. Sentenza Il-Kummissjoni vs L-Italja tat-12 ta’ Marzu 2020, C-576/18

Min-naħa tagħha, il-Qorti Ġenerali annullat id-deċiżjoni tal-Kummissjoni dwar il- klassifikazzjoni bħala għajnuna mill-Istat illegali tad-deċiżjonijiet fiskali Irlandiżi favur Apple. Skont il-Kummissjoni, l-Irlanda kienet tat lil Apple madwar 13-il biljun euro f’vantaġġi fiskali illegali, li għalhekk kellhom jiġu rkuprati mill-Istat Membru mingħajr il-benefiċjarju tagħhom. Madankollu, il-Qorti Ġenerali kkonstatat li l-Kummissjoni ma kienx irnexxielha tipprova b’mod suffiċjenti li d-deċiżjonijiet fiskali inkwistjoni kienu jagħtu vantaġġ ekonomiku selettiv lil Apple u kienu jikkostitwixxu għajnuna mill-Istat favur tagħha. Sentenza L-Irlanda vs Il-Kummissjoni u Apple Sales International tal-15 ta’ Lulju 2020, T-778/16 u T-892/16

Bl-istess mod, il-Qorti Ġenerali annullat id-deċiżjoni tal-Kummissjoni li tiddikjara illegali l-għajnuna mogħtija mill-Komunità Awtonoma ta’ Valencia (Spanja) favur il-klabbs tal-futbol Spanjoli Valencia CF u Elche CF. Skont il-Kummissjoni, din l-għajnuna kienet fil-forma ta’ garanziji favur assoċjazzjonijiet marbuta ma’ dawn il-klabbs sabiex ikopru self bankarju li dawn kienu kkonkludew sabiex jikkontribwixxu fiż-żieda tal-kapital tal-klabb li miegħu kienu marbuta rispettivament. Madankollu, il-Qorti Ġenerali qieset li d-deċiżjoni tal-Kummissjoni kienet ivvizzjata b’diversi żbalji li kienu jikkonċernaw, b’mod partikolari, l-eżistenza ta’ garanziji paragunabbli fis-suq. Sentenzi Valencia Club de Fútbol u Elche Club de Fútbol tat-12 ta’ Marzu 2020, T-732/16 u T-901/16

Għall-kuntrarju, il-Qorti Ġenerali ċaħdet ir-rikorsi kontra d-deċiżjoni tal-Kummissjoni li tiddikjara illegali l-għajnuna mogħtija mir-Reġjun Awtonomu ta’ Sardegna favur diversi kumpanniji tal-ajru li joperaw titjiriet lejn u minn Sardegna. Din l-għajnuna, li kienet intiża li ttejjeb il-konnessjonijiet bl-ajru mal-gżira u li tiżgura l-promozzjoni tagħha bħala destinazzjoni turistika, kienet tqiegħdet għad-dispożizjoni tal-benefiċjarji permezz tal-operaturi tal-ajruporti prinċipali f’Sardegna. Il-Qorti Ġenerali kkonfermat li l-għajnuna ma kinitx ingħatat lil dawn l-operaturi iżda lill-kumpanniji tal-ajru kkonċernati, li għalhekk għandhom jirrimborsawha. Sentenzi Volotea, Germanwings u easyJet tat-13 ta’ Mejju 2020, T-607/17, T-716/17 u T-8/18

Il-Qorti Ġenerali kkonfermat ukoll id-deċiżjoni tal-Kummissjoni li s-sistema fiskali Spanjola applikabbli għal ċerti ftehimiet ta’ lokazzjoni-finanzjament konklużi minn tarzni ma’ gruppi ta’ interess ekonomiku (GIE) kienet tikkostitwixxi, bħala metodu ta’ investiment li jippermetti li jinkisbu vantaġġi fiskali, skema ta’ għajnuna mill-Istat favur il-membri tal-GIE kkonċernati. Skont il-Kummissjoni, din is-sistema, li fil-kuntest tagħha kumpannija marittima ma kinitx tikseb bastiment direttament mingħand tarzna iżda permezz tal-GIE bħala intermedjarju, kienet parzjalment inkompatibbli mas-suq intern sa fejn kienet tippermetti wkoll lill-kumpanniji marittimi jibbenefikaw minn tnaqqis ta’ 20 sa 30 % fuq il-prezz tax-xiri ta’ bastimenti mibnija minn tarzni Spanjoli. Sentenza Spanja et vs Il-Kummissjoni tat-23 ta’ Settembru 2020, T-515/13 RENV u T-719/13 RENV

Fl-aħħar nett, il-Qorti Ġenerali kkonfermat id-deċiżjoni li permezz tagħha l-Kummissjoni kienet ikkonstatat li l-garanzija pubblika illimitata mogħtija minn Franza lill-IFP Énergies nouvelles (IFPEN), stabbiliment pubbliku Franċiż inkarigat b’mod partikolari b’missjonijiet ta’ riċerka u ta’ żvilupp fl-oqsma tal-enerġija, kienet miżura li kienet tikkostitwixxi parzjalment għajnuna mill-Istat. Il-Qorti Ġenerali qieset li l-IFPEN u Franza ma kienx irnexxielhom jegħlbu l-preżunzjoni li l-għoti ta’ tali garanzija jagħti lill-benefiċjarju tagħha vantaġġ ekonomiku meta mqabbel mal-kompetituri tiegħu. Sentenza Franza et vs Il-Kummissjoni tal-5 ta’ Ottubru 2020, T-479/11 RENV u T-157/12 RENV

Il-Qorti Ġenerali kkonfermat l-eżistenza, stabbilita mill-Kummissjoni, ta’ akkordju fis-suq tal-kards b’ċirkwit integrat bejn diversi impriżi li kienu kkoordinaw il-politika tagħhom fir-rigward tal-prezzijiet. Il-Qorti Ġenerali, madankollu, naqqset il-multa imposta mill-Kummissjoni, b’mod partikolari fuq il-kumpannija Infineon, billi ħadet inkunsiderazzjoni n-numru limitat ta’ kuntatti antikompetittivi li din tal-aħħar kellha mal-kompetituri tagħha kif ukoll in-natura insuffiċjenti tal-provi dwar wieħed mill- kuntatti kkonstatati mill-Kummissjoni. Sentenza Infineon Technologies tat-8 ta’ Lulju 2020, T-758/14 RENV

Il-Qorti Ġenerali ntalbet tieħu deċiżjoni, għall-ewwel darba, dwar il-legalità ta’ regoli adottati minn federazzjoni sportiva internazzjonali. Il-Qorti Ġenerali qieset li r-regoli tal-International Skating Union (l-Unjoni Internazzjonali tal-Pattinaġġ (UIP)) kienu jiksru l-kompetizzjoni libera sa fejn jipprevedu sanzjonijiet kontra l-atleti li jipparteċipaw f’kompetizzjonijiet ta’ pattinaġġ veloċi mhux irrikonoxxuti minnha. Il-Qorti Ġenerali qieset li r-restrizzjonijiet li jirriżultaw mis-sistema ta’ awtorizzazzjoni minn qabel prevista fir-regoli inkwistjoni ma setgħux ikunu ġġustifikati permezz tal-għan li tiġi protetta l-integrità tal-isport. Sentenza International Skating Union tas-16 ta’ Diċembru 2020, T-93/18

Il-Qorti Ġenerali kkonfermat id-deċiżjoni tal-Kummissjoni li tikkonstata abbuż minn pożizzjoni dominanti min-naħa ta’ Lietuvos geležinkeliai AB (LG), il-kumpannija nazzjonali ferrovjarja tal-Litwanja, fis-suq Litwan tat-trasport ferrovjarju tal-merkanzija. LG kienet ikkonkludiet ftehim dwar it-trasport ferrovjarju tal-merkanzija mal-kumpannija Orlen dwar it-trasport ta’ prodotti petroliferi lejn l-Ewropa tal-Punent. Wara tilwima ma’ LG, Orlen xtaqet tafda dan it-trasport lill-kumpannija nazzjonali ferrovjarja tal-Latvja. LG, billi waqqfet il-linja ferrovjarja bejn il-post tat-tluq tal-merkanzija, fil-Litwanja, u l-Latvja, kienet ipprekludiet lill-impriża kompetitriċi Latvjana milli tikkonkludi l-kuntratt ma’ Orlen. Tali aġir tqies li jikkostitwixxi abbuż minn pożizzjoni dominanti. Sentenza Lietuvos geležinkeliai AB tat-18 ta’ Novembru 2020, T-814/17

Fil-kuntest ta’ tilwima bejn kumpannija li topera lukanda fil-Ġermanja u l-kumpannija rregolata mid-dritt Olandiż Booking.com BV, li topera pjattaforma ta’ prenotazzjoni ta’ akkomodazzjoni, il-Qorti tal-Ġustizzja, fuq talba minn qorti Ġermaniża, iddeċidiet li lukanda li tuża l-pjattaforma Booking.com tista’ tressaq, kontra din tal-aħħar, kawża quddiem qorti tal-Istat Membru li fih din il-lukanda tkun stabbilita sabiex jitwaqqaf eventwali abbuż minn pożizzjoni dominanti. Min-naħa tagħha, Booking.com sostniet li l-kawża kontriha kellha titressaq quddiem qorti tal-Istat Membru fejn jinsab is-sede tagħha, argument iżda li l-Qorti tal-Ġustizzja ma qablitx miegħu. Sentenza Wikingerhof GmbH & Co. KG vs Booking.com BV. tal-24 ta’ Novembru 2020, C-59/19

Pożizzjoni dominanti fis-suq tal-komunikazzjonijiet elettroniċi u fis-suq tal-mezzi tal- komunikazzjonijiet tista’ tipperikola l-pluraliżmu tal-informazzjoni. Din il-kunsiderazzjoni kienet l-ispirazzjoni wara leġiżlazzjoni Taljana li kienet tipprojbixxi lill-impriżi b’saħħa kbira fl-ewwel suq milli jiksbu dimensjoni ekonomika sinjifikattiva fit-tieni wieħed. Fil-kuntest tal- kampanja ostili għall-akkwist ta’ azzjonijiet fil-kumpannija Taljana Mediaset min-naħa tal- kumpannija Franċiża Vivendi u fil-kuntest tat-tilwim li rriżulta minnha, il-Qorti tal-Ġustizzja madankollu ddeċidiet li tali leġiżlazzjoni, meta ma tkunx ta’ natura li tipproteġi l-pluraliżmu tal-informazzjoni, tikkostitwixxi ostakolu pprojbit għal-libertà ta’ stabbiliment. Sentenza Vivendi SA tat-3 ta’ Settembru 2020, C-719/18

Fil-qasam tal-konċentrazzjonijiet ta’ impriżi, il-Qorti Ġenerali annullat id-deċiżjoni tal- Kummissjoni li tirrifjuta l-proposta ta’ xiri ta’ Telefónica UK minn Hutchison 3G UK. Hija ddeċidiet li l-Kummissjoni ma kinitx stabbilixxiet li tali xiri kien ser joħloq ostakolu sinjifikattiv għall-kompetizzjoni effettiva fis-suq Brittaniku tat-telefonija mobbli. Hija osservat ukoll li l-Kummissjoni ma kinitx stabbilixxiet li tali operazzjoni kienet ser twassal għal żieda fil- prezzijiet tas-servizzi u għal tnaqqis fil-kwalità tagħhom. Sentenza CK Telecoms UK Investments tat-28 ta’ Mejju 2020, T-399/16

F’kawża Ungeriża oħra, il-Qorti tal-Ġustizzja ddeċidiet li t-taxxi speċjali miġbura fl-Ungerija fuq id-dħul mill-bejgħ tal-impriżi ta’ telekomunikazzjonijiet u tal-impriżi fis-settur tal- kummerċ bl-imnut huma kompatibbli mad-dritt tal-Unjoni. Dawn l-impriżi, li fil-maġġoranza tagħhom huma miżmuma minn persuni fiżiċi jew ġuridiċi ta’ Stati Membri oħra, jiġġeneraw l-ikbar dħul mill-bejgħ fis-swieq Ungeriżi kkonċernati u għaldaqstant iġarrbu l-parti prinċipali ta’ dawn it-taxxi speċjali. Il-Qorti tal-Ġustizzja, madankollu, iddeċidiet li dan il-fatt jirrifletti r-realtà ekonomika ta’ dawn is-swieq u għalhekk ma jikkostitwixxix diskriminazzjoni fil-konfront ta’ dawn l-impriżi. Sentenzi Vodafone Magyarország u Tesco-Global Áruházak tat-3 ta’ Marzu 2020, C-75/18 u C-323/18

Fl-2020, il-Qorti Ġenerali tat l-ewwel erba’ sentenzi tagħha dwar deċiżjonijiet tal-Bank Ċentrali Ewropew (BĊE) li jimponu sanzjonijiet pekunjarji fil-kuntest tas-superviżjoni prudenzjali tal-istituzzjonijiet ta’ kreditu. F’dan il-kuntest, il-Qorti Ġenerali annullat parzjalment tliet deċiżjonijiet minħabba li ma kellhomx motivazzjoni suffiċjenti. Fil-fatt, ma kienet ingħatat ebda preċiżazzjoni dwar il-metodoloġija applikata mill-BĊE sabiex jiġi ddeterminat l-ammont tas-sanzjonijiet imposti. Sentenzi VQ vs BĊE tat-8 ta’ Lulju 2020, T-203/18,T-576/18,T-577/18,T-578/18

Fir-rigward tal-karattru distintiv indispensabbli għall-validità ta’ trade mark, il-Qorti Ġenerali fakkret li forma, li tkun saret applikazzjoni għar-reġistrazzjoni tagħha bħala trade mark tridimensjonali, ma jkollhiex dan il-karattru meta ma tvarjax b’mod sinjifikattiv min-norma jew mill-użanzi tas-settur ikkonċernat. Fil-każ ta’ lazz ta’ żarbun, il-Qorti Ġenerali indikat li n-novità tal-forma tiegħu u s-sbuħija tad-disinn tiegħu ma humiex suffiċjenti, waħedhom, sabiex jiġi konkluż li għandu karattru distintiv. Fil-fatt, il-funzjoni ta’ trade mark hija li tindika l-oriġini kummerċjali tal-prodott u li b’hekk tippermetti lill-konsumaturi jorbtu ċerti prodotti ma’ impriża partikolari. Sentenza Hickies tal-5 ta’ Frar 2020, T-573/18

Bl-istess raġunament, iżda fil-każ ta’ trade mark figurattiva, il-Qorti Ġenerali osservat li disinn b’ras ta’ ljun imdawra b’katini jikkostitwixxi forma komuni u tipika ta’ buttuni u ta’ oġġetti ta’ ġojjellerija, u għalhekk ma għandux karattru distintiv fir-rigward ta’ dawn il-prodotti. F’kawża oħra, il-Qorti Ġenerali, għall-kuntrarju, ikkritikat lill-EUIPO talli ma ħax inkunsiderazzjoni ċerti provi sabiex jevalwa l-karattru distintiv, miksub bl-użu, ta’ trade mark li tikkostitwixxi f’disinn qisu bord taċ-ċess għall-basktijiet u l-bagalji. Sentenzi Pierre Balmain tal-5 ta’ Frar 2020, T-331/19 u T-332/19 / Sentenza Louis Vuitton Malletier tal-10 ta’ Ġunju 2020, T-105/19

Trade mark verbali lanqas ma jkollha karattru distintiv meta tkun sempliċement tiddeskrivi karatteristika tal-prodott li fir-rigward tiegħu tkun saret applikazzjoni għar-reġistrazzjoni tagħha. Il-Qorti Ġenerali qieset li t-trade mark verbali WAVE għal lampi ta’ akkwarju jista’ jkollha karattru distintiv peress li l-kelma “wave” ma tiddeskrivix karatteristika ta’ dawn il-lampi. Sentenza Tetra GmbH tat-23 ta’ Settembru 2020, T-869/19

Kien preċiżament minħabba n-natura dgħajfa tal-karattru distintiv ta’ żewġ sinjali li jirrappreżentaw qarn li jindika servizzi postali li l-Qorti Ġenerali eskludiet probabbiltà ta’ konfużjoni bejniethom. Ir-rappreżentazzjoni ta’ qarn postali, fuq sfond li ħafna drabi jkun isfar, tintuża tradizzjonalment mill-operaturi postali nazzjonali fi ħdan l-Unjoni. Għaldaqstant, il-pubbliku ma jassoċjax il-qarn postali jew il-kulur isfar ma’ kumpannija partikolari iżda, b’mod iktar ġenerali, ma’ numru indeterminat ta’ operaturi postali nazzjonali. Sentenza Deutsche Post tal-11 ta’ Novembru 2020, T-25/20

Għal darba oħra dwar il-probabbiltà ta’ konfużjoni bejn żewġ trade marks, iżda din id-darba bejn trade marks iddepożitati fir-rigward ta’ oġġetti u ħwejjeġ tal-isports, il-Qorti tal-Ġustizzja ddeċidiet li r-reputazzjoni tal-plejer tal-futbol Lionel Messi hija ta’ natura li tinnewtralizza kull probabbiltà ta’ konfużjoni bejn it-trade mark MESSI tiegħu u t-trade mark preċedenti MASSI li tappartjeni lil kumpannija Spanjola. Sentenza Messi tas-17 ta’ Settembru 2020, C-449/18 P u C-474/18 P

F’kawża oħra li tikkonċerna l-kwistjoni tal-evalwazzjoni tal-probabbiltà ta’ konfużjoni, il- Qorti Ġenerali enfasizzat ukoll li l-preżenza tal-istess kelma f’żewġ trade marks (f’dan il-każ, il-kelma “Teruel” fit-trade marks AIRESANO BLACK El IBERICO DE TERUEL u JAMON DE TERUEL CONSEJO REGULADOR DE LA DENOMINACION DE ORIGEN) ma hijiex biżżejjed sabiex toħloq probabbiltà ta’ konfużjoni. Sentenza Consejo Regulador tat-28 ta’ Mejju 2020, T-696/18

Fir-rigward tal-kriterju ta’ xebh bejn żewġ trade marks, il-Qorti Ġenerali kkonstatat li t-trade mark verbali LOTTOLAND, iddepożitata għal servizzi industrijali, għandha xebh qawwi mat- trade marks figurattivi preċedenti LOTTO, iddepożitati għal logħob tal-ażżard. Madankollu, il-Qorti Ġenerali osservat li ma hemm ebda rabta bejn dawn it-trade marks fid-dawl, b’mod partikolari, tan-natura differenti tas-servizzi kkonċernati u tal-pubbliku rilevanti. Minħabba din l-assenza ta’ rabta, l-użu tat-trade mark LOTTOLAND ma jibbenefikax indebitament mill-karattru distintiv jew mir-reputazzjoni tat-trade marks preċedenti u ma jagħtix lok għal riskju li jikkawżawlhom ħsara. Sentenza Lottoland tal-11 ta’ Novembru 2020, T-820/19

Jista’ jkun il-każ li tilwima dwar sinjali distintivi ma tkunx bejn individwi jew impriżi iżda bejn Stati Membri. Dan kien il-każ ta’ tilwima dwar l-użu tal-kelma “Teran” fir-rigward ta’ varjetà tal-għeneb tal-inbid użata fis-Slovenja u fil-Kroazja. Wara l-adeżjoni, fl-2004, tas-Slovenja mal-Unjoni, dan l-isem ġie rrikonoxxut bħala denominazzjoni tal-oriġini protetta (DOP). Fl-2017, ġie stabbilit, permezz ta’ regolament, li l-kelma “Teran” setgħet tintuża wkoll, sa mill-adeżjoni fl-2013 tal-Kroazja mal-Unjoni, fir-rigward ta’ ċerti nbejjed Kroati. Il-Qorti Ġenerali ċaħdet it-talba tas-Slovenja għall-annullament ta’ dan ir-regolament li jippermetti lid-DOP jeżistu flimkien b’mod paċifiku mingħajr ksur tal-prinċipji ta’ ċertezza legali u ta’ aspettattivi leġittimi. Sentenza Is-Slovenja vs Il-Kummissjoni tad-9 ta’ Settembru 2020, T-626/17

Il-Qorti Ġenerali ċaħdet rikors intiż li jiġi kkonstatat li l-Kunsill Ewropew kien irrifjuta, illegalment, li jeskludi lill-Prim Ministru Ċek, minħabba allegat kunflitt ta’ interessi, minn laqgħat ta’ din l-istituzzjoni dwar l-adozzjoni tal-qafas finanzjarju pluriannwali tal-Unjoni 2021/2027. Fil-fatt, il-Qorti Ġenerali qieset li huma biss l-Istati Membri li għandhom il-kompetenza sabiex jiddeterminaw, minn fost il-kapijiet tal-Istat jew tal-gvern rispettivi, liema waħda minn dawn il-persuni għandha tirrappreżentahom fil-laqgħat tal-Kunsill Ewropew u sabiex jistabbilixxu r-raġunijiet li jistgħu jwasslu għall-impossibbiltà, għal waħda minn dawn il-persuni, li tirrappreżentahom fil-laqgħat ta’ din l-istituzzjoni. Digriet Wagenknecht tas-17 ta’ Lulju 2020, T-715/19

H. Shindler u ċittadini oħra tar-Renju Unit ilhom żmien twil residenti fl-Italja u fi Franza. Għaldaqstant, huma la setgħu jipparteċipaw fir-referendum dwar Brexit u lanqas fl-elezzjonijiet leġiżlattivi tal-2017, minkejja li dawn il-votazzjonijiet kienu determinanti għaż-żamma tal- kwalità tagħhom bħala ċittadini tal-Unjoni. Huma għalhekk ippreżentaw rikors quddiem il- Qorti Ġenerali intiż li jiġi “ikkonstatat in-nuqqas li tittieħed azzjoni” min-naħa tal-Kummissjoni minħabba “l-ommissjoni illegali tagħha li ma tħarisx iċ-ċittadinanza Ewropea”. Il-Qorti Ġenerali ċaħdet ir-rikors billi ddeċidiet li l-Kummissjoni ma għandhiex kompetenza, sabiex tadotta att vinkolanti intiż li jżomm, b’effett mill-ħruġ tar-Renju Unit mill-Unjoni, iċ-ċittadinanza Ewropea ta’ ċerti ċittadini tar-Renju Unit. Digriet Shindler tal-14 ta’ Lulju 2020, T-627/19