Attività ġudizzjarja

Il-Qorti tal-Ġustizzja ddeċidiet li s-sistema dixxiplinari applikabbli għall-imħallfin tas-Sąd Najwyższy (il-Qorti Suprema, il-Polonja) u għall-imħallfin tal-qrati ordinarji ma kinitx konformi mad-dritt tal-Unjoni. Il-Kummissjoni Ewropea kienet talbet lill-Qorti tal-Ġustizzja tikkonstata li, permezz ta’ din is-sistema dixxiplinari l-ġdida u, b’mod partikolari, permezz tal-istabbiliment ta’ awla dixxiplinari ġdida fi ħdan il-Qorti Suprema, il-Polonja kienet kisret id-dritt tal-Unjoni. Il-Qorti tal-Ġustizzja laqgħet it-talbiet kollha tal-Kummissjoni: fid-dawl tal-kuntest globali tar-riformi maġġuri li ftit qabel kienu affettwaw is-setgħa ġudizzjarja Pollakka u l-elementi kollha madwar l-implimentazzjoni ta’ din l-awla l-ġdida, hija kkonstat b’mod partikolari li din ma kinitx toffri l-garanziji kollha ta’ imparzjalità u ta’ indipendenza u li ma kinitx protetta minn influwenzi diretti jew indiretti tas-setgħat leġiżlattivi u eżekuttivi Pollakki.
Sentenza Il‑Kummissjoni vs Il‑Polonjatal-15 ta’ Lulju 2021 (C‑791/19)

Il-Qorti tal-Ġustizzja ddeċidiet li t-trasferimenti mhux permessi ta’ mħallef lejn qorti oħra jew bejn żewġ awli tal-istess qorti jistgħu jippreġudikaw il-prinċipji ta’ irremovabbiltà u ta’ indipendenza tal-imħallfin. Barra minn hekk, id-digriet li permezz tiegħu qorti, li taqta’ fl-aħħar istanza u f’kulleġġ ġudikanti ta’ Mħallef uniku, tiċħad ir-rikors ta’ mħallef ittrasferit kontra r-rieda tiegħu, għandu jitqies li ma jkunx seħħ jekk il-ħatra ta’ dan l-imħallef uniku tkun saret bi ksur manifest tar-regoli fundamentali dwar l-istabbiliment u l-funzjonament tas-sistema ġudizzjarja kkonċernata
Sentenza W.Ż. (Awla ta’ Stħarriġ Straordinarju u Affarijiet Pubbliċi tal-Qorti Suprema – Ħatra) tas-6 ta’ Ottubru 2021 (C‑487/19)

Il-Qorti tal-Ġustizzja qieset li l-indipendenza, l-imparzjalità tal-imħallfin u l-preżunzjoni ta’ innoċenza jistgħu jiġu kompromessi mis-sistema attwalment fis-seħħ fil-Polonja, li jippermetti b’mod partikolari lill-Ministru tal-Ġustizzja jiddelega mħallfin fi qrati kriminali superjuri u li fi kwalunkwe mument itemm din id-delega mingħajr motivazzjoni. L-assenza ta’ kriterji għal dawn id-delegazzjonijiet joħloq riskju ta’ kontroll politiku tal-kontenut tad-deċiżjonijiet ġudizzjarji, iktar u iktar peress li l-Ministru jassumi wkoll ir-rwol ta’ prosekutur ġenerali.
Sentenza Proċeduri kriminali kontra WB et tas-16 ta’ Novembru 2021 (C‑748/19 et)

Il-Qorti tal-Ġustizzja ttrattat diversi kawżi li kienu parti mill-estensjoni tar-riformi tal-ġustizzja fil-qasam tal-ġlieda kontra l-korruzzjoni fir-Rumanija. Qamet il-kwistjoni dwar jekk l-applikazzjoni tal-ġurisprudenza li tirriżulta minn diversi deċiżjonijiet tal-Qorti Kostituzzjonali Rumena dwar ir-regoli ta’ proċedura kriminali applikabbli fil-qasam tal-frodi u tal-korruzzjoni setgħetx tikser id-dritt tal-Unjoni. Il-Qorti tal-Ġustizzja affermat mill-ġdid li s-supremazija tad-dritt tal-Unjoni teżiġi li l-qrati nazzjonali jkollhom is-setgħa li ma japplikawx deċiżjoni ta’ qorti kostituzzjonali li tmur kontra d-dritt tal-Unjoni, mingħajr ma tkun tista’ tiġi stabbilita r-responsabbiltà dixxiplinari tal-qrati nazzjonali. Issa, id-dritt tal-Unjoni jipprekludi l-applikazzjoni tal-ġurisprudenza tal-Qorti Kostituzzjonali li twassal għall-annullament tas-sentenzi mogħtija minn kulleġġi ġudikanti li jkunu allegatament ikkostitwiti irregolarment, sa fejn dan l-annullament, flimkien mad-dispożizzjonijiet nazzjonali fil-qasam tal-preskrizzjoni, joħloq riskju sistemiku ta’ impunità tal-fatti li jikkostitwixxu reati gravi ta’ frodi.
Sentenza Euro Box Promotion et tal-21 ta’ Diċembru 2021 (C‑357/19 et)

F’kawża għal deċiżjoni preliminari mressqa minn qorti Ungeriża, il-Qorti tal-Ġustizzja tat deċiżjoni dwar il-kompatibbiltà tal-leġiżlazzjoni Ungeriża mad-Direttiva tal-Unjoni dwar id-dritt għall-interpretazzjoni u għat-traduzzjoni fil-kuntest tal-proċeduri kriminali. Peress li l-Qorti Suprema tal-Ungerija ddeċidiet li din it-talba għal deċiżjoni preliminari lill-Qorti tal-Ġustizzja kienet illegali, hija barra minn hekk affermat mill-ġdid li s-sistema ta’ kooperazzjoni bejn il-qrati nazzjonali u l-Qorti tal-Ġustizzja tipprekludi li qorti suprema nazzjonali tikkonstata l-illegalità ta’ talba għal deċiżjoni preliminari mressqa minn qorti inferjuri. Barra minn hekk, id-dritt tal-Unjoni jipprekludi proċeduri dixxiplinari mibdija kontra qorti nazzjonali talli tkun ressqet talba għal deċiżjoni preliminari quddiem il-Qorti tal-Ġustizzja: tali proċedura tista’ tiskoraġġixxi lill-qrati nazzjonali kollha milli jressqu talbiet għal deċiżjoni preliminari, li jikkomprometti l-applikazzjoni uniformi tad-dritt tal-Unjoni.
Sentenza IStat-23 ta’ Novembru 2021 (C‑564/19)

Il-Qorti Ġenerali ċaħdet ir-rikors tal-kumpannija multinazzjonali tat-telekomunikazzjonijiet u ta’ teledistribuzzjoni, Altice Europe, kontra d-deċiżjoni tal-Kummissjoni li imponiet fuqha,fil-kuntest tal-akkwist ta’ PT Portugal, multa totali ta’ EUR 124.5 miljun. Il-Kummissjoni kienet qiegħda takkuża lil Altice Europe, minn naħa, li kisret l-obbligu ta’ komunikazzjoni tal-konċentrazzjoni kif ukoll, min-naħa l-oħra, li ma osservatx il-projbizzjoni milli twettaq il-konċentrazzjoni qabel il-komunikazzjoni tagħha lill-Kummissjoni u qabel l-awtorizzazzjoni tagħha minn din tal-aħħar. Madankollu, il-Qorti Ġenerali ordnat tnaqqis ta’ EUR 6.22 miljun mill-ammont tal-multa għall-parti dwar in-nuqqas ta’ twettiq tal-obbligu ta’ komunikazzjoni tal-konċentrazzjoni.
Sentenza Altice Europe vs Il‑Kummissjoni tat-22 ta’ Settembru 2021 (T‑425/18)

Il-Qorti Ġenerali kkonfermat id-deċiżjonijiet tal-Kummissjoni li jawtorizzaw il-konċentrazzjonijietmarbuta mal-akkwist, minn easyJet u minn Lufthansa, ta’ ċertu attiv tal-grupp Air Berlin. Hija ċaħdet ir-rikors ippreżentat mill-kumpannija tal-ajru Polskie Linie Lotnicze “LOT”, kompetitriċi taż-żewġ kumpanniji partijiet fil-konċentrazzjonijiet, filwaqt li enfasizzat, b’mod partikolari, li l-Kummissjoni setgħet tidentifika s-swieq rilevanti għal kull pari ta’ bliet minn jew lejn ajruporti li magħhom kienu marbuta s-slottijiet fl-iskeda ta’ Air Berlin minflok ma teżamina individwalment kull wieħed mis-swieq li fihom Air Berlin u, rispettivament, Lufthansa u easyJet, kienu preżenti.
Sentenzi Polskie Linie Lotnicze “LOT” vs Il-Kummissjoni tal-20 ta’ Ottubru 2021 (T‑240/18 u T‑296/18)

Il-Qorti Ġenerali kkonfermat id-deċiżjoni tal-Kummissjoni li tikkonstata abbuż ta’ pożizzjoni dominanti ta’ Google li kienet iffavorixxiet il-komparatur tagħha ta’ prodotti fuq il-paġni ta’ riżultati ġenerali tagħha permezz ta’ preżentazzjoni u pożizzjoni pprivileġġati meta mqabbla mar-riżultati tal-komparaturi kompetituri. Il-Qorti Ġenerali kkonfermat ukoll l-ammont tal-multa, iffissat mill-Kummissjoni għal EUR 2.42 biljun, li EUR 523.5 miljun minnhom ġew imposti fuq Google in solidum mal-kumpannija omm tagħha, Alphabet.
Sentenza Google u Alphabet vs Il‑Kummissjoni (Google Shopping) tal-10 ta’ Novembru 2021 (T‑612/17)

Bejn l-1997 u l-1999 il-kumpannija Sumal SL akkwistat żewġ trakkijiet mingħand Mercedes Benz Trucks España SL (iktar ’il quddiem “MBTE”), sussidjarja tal-grupp Daimler, li l-kumpannija omm tagħha hija Daimler AG. Permezz ta’ deċiżjoni tal-2016, il-Kummissjoni Ewropea kkonstatat ksur, minn Daimler AG, tar-regoli tad-dritt tal-Unjoni li jipprojbixxu l-akkordji bil-konklużjoni, bejn Jannar 1997 u Jannar 2011, ta’ arranġamenti ma’ erbatax-il produttur Ewropew oħra ta’ trakkijiet dwar l-iffissar tal-prezzijiet u ż-żieda fil-prezzijiet gross tat-trakkijiet fiż-Żona Ekonomika Ewropea (ŻEE). Wara din id-deċiżjoni, Sumal ressqet azzjoni għad-danni kontra MBTE għad-danni li jirriżultaw minn dan l-akkordju. Il-Qorti tal-Ġustizzja ddeċidiet li l-vittma ta’ ksur tad-dritt tal-kompetizzjoni tal-Unjoni mwettaq minn kumpannija omm tista’ titlob lis-sussidjarja ta’ din tal-aħħar kumpens għad-danni li jirriżultaw minnu iżda għandha tipprova li ż-żewġ kumpanniji jkunu jikkostitwixxu unità ekonomika fil-mument tal-ksur u li s-sussidjarja tkun attiva fis-suq ikkonċernat mill-ksur
Sentenza Sumaltas-6 ta’ Ottubru 2021 (C‑882/19)

Is-sajd li juża l-kurrent elettriku ġie pprojbit permezz ta’ regoli ġodda adottati fl-2019 mill-Parlament Ewropew u l-Kunsill. Il-Pajjiżi l-Baxxi talbu lill-Qorti tal-Ġustizzja tannulla dawn id-dispożizzjonijiet billi sostniet b’mod partikolari li l-leġiżlatur tal-Unjoni ma kienx ibbaża ruħu fuq l-aħjar opinjoni xjentifika disponibbli dwar l-effetti ekoloġiċi ambjentali fuq l-isfruttament tal-lingwata tal-Baħar tat-Tramuntana. Il-Qorti tal-Ġustizzja ċaħdet dan ir-rikors u kkonfermat il-validità ta’ dawn ir-regoli. Il-leġiżlatur tal-Unjoni għandu setgħa diskrezzjonali wiesgħa f’dan il-qasam u ma huwiex obbligat jibbaża l-għażla leġiżlattiva tiegħu biss fuq opinjonijiet xjentifiċi u tekniċi.
Sentenza Il-Pajjiżi l-Baxxi vs Il-Kunsill tal-Unjoni Ewropea u l-Parlament Ewropewtal-15 ta’ April 2021 (C‑733/19)

F’dak li jirrigwarda l-awtorizzazzjoni tal-kaċċa bil-kolla, il-Qorti tal-Ġustizzja qieset li Stat Membru (f’dan il-każ, Franza) ma jistax jawtorizza tali metodu ta’ qbid ta’ għasafar li jwassal għal qbid ta’ għasafar li jista’ jikkawża lill-ispeċi kkonċernati ħsara li ma hijiex negliġibbli. In-natura tradizzjonali ta’ tali metodu ma hijiex biżżejjed, fiha nnifisha, sabiex teskludi kull soluzzjoni alternattiva sodisfaċenti oħra. Il-Qorti tal-Ġustizzja ppreċiżat il-kundizzjonijiet li jippermettu deroga mill-projbizzjoni, imposta mid-Direttiva dwar l-“Għasafar”, li jintużaw ċerti metodi ta’ qbid ta’ għasafar protetti.
Sentenza One Voice u Ligue pour la protection des oiseaux (LPO) vs Ministre de la Transition écologique et solidairetas-17 ta’ Marzu 2021 (C‑900/19)

Fil-kuntest ta’ rikors għal nuqqas ta’ twettiq ta’ obbligu ppreżentat mill-Kummissjoni kontra l-Ungerija dwar il-qbiż sistematiku u persistenti tal-valuri limitu tal-partiċelli PM10, il-Qorti tal-Ġustizzja ddeċidiet li dan l-Istat Membru kiser ir-regoli tad-dritt tal-Unjoni dwar il-kwalità tal-arja ċirkostanti u li naqas milli jwettaq l-obbligi tiegħu li jiżgura, fit-territorju kollu tiegħu, minn naħa, li l-valur limitu ta’ kuljum stabbilit għall-partiċelli PM10 jiġi osservat u, min-naħa l-oħra, li dan il-perijodu ta’ qbiż ikun l-iqsar possibbli.
Sentenza Il‑Kummissjoni vs L‑Ungerijatat-3 ta’ Frar 2021 (C‑637/18)

Il-Qorti tal-Ġustizzja ddeċidiet li l-Ġermanja kisret, bejn l-2010 u l-2016, id-Direttiva dwar il-kwalità tal-arja billi eċċediet b’mod sistematiku u persistenti l-valuri limitu għad-diossidu tan-nitroġenu (NO₂). Il-Ġermanja kisret ukoll l-obbligu tagħha li tadotta fi żmien utli miżuri xierqa sabiex il-perijodu ta’ qbiż ikun l-iqsar possibbli fiż-żoni kkonċernati.
Sentenza Il-Kummissjoni vs Il-Ġermanjatat-3 ta’ Ġunju 2021 (C‑635/18)

Il-Qorti tal-Ġustizzja annullat id-deċiżjonijiet tal-Kunsill dwar l-applikazzjoni tal-Ftehim ta’ Sħubija Komprensiv u Msaħħaħ mal-Armenja, fis-26 ta’ Novembru 2017. Hija qieset li, għalkemm il-Ftehim ta’ Sħubija kien jippreżenta ċerti rabtiet mal-politika esterna u ta’ sigurtà komuni, l-elementi jew id-dikjarazzjonijiet ta’ intenzjoni inklużi fih u li kienu marbuta miegħu ma kinux suffiċjenti sabiex jikkostitwixxu komponent awtonomu ta’ dan il-ftehim li jista’ jaqsam l-att tal-Kunsill f’żewġ deċiżjonijiet distinti. Din id-diviżjoni kienet wasslet b’mod partikolari għall-użu tar-regola tal-vot b’unanimità għal wieħed mill-atti kkonċernati u għal dik tal-maġġoranza kkwalifikata għall-ieħor.
Sentenza Il‑Kummissjoni vs Il‑Kunsilltat-2 ta’ Settembru 2021 (C‑180/20)

Il-Qorti Ġenerali ċaħdet ir-rikors ippreżentat mir-Rumanija kontra d-deċiżjoni tal-Kummissjoni li tiġi rreġistrata l-proposta ta’ inizjattiva taċ-ċittadini Ewropej (IĊE) “Politika ta’ koeżjoni għall-ugwaljanza tar-reġjuni u għas-sostenibbiltà tal-kulturi reġjonali”. Hija tat deċiżjoni, għall-ewwel darba, fuq in-natura kontestabbli ta’ deċiżjoni tal-Kummissjoni li tali proposta tiġi rreġistrata. Din il-proposta IĊE kienet ġiet ippreżentata fl-2013 lill-Kummissjoni, li, inizjalment, kienet ċaħditha minħabba li hija kienet tinsab manifestament barra mill-ambitu tas-setgħat tagħha li kienu jippermettulha tippreżenta proposta ta’ att legali tal-Unjoni għall-finijiet tal-applikazzjoni tat-Trattati. Il-Qorti tal-Ġustizzja kienet annullat id-deċiżjoni tal-Kummissjoni li, b’deċiżjoni tat-30 ta’ April 2019, kienet, sussegwentement, irreġistrat il-proposta IĊE kontenzjuża.
Sentenza Ir‑Rumanija vs Il‑Kummissjonital-10 ta’ Novembru 2021 (T‑495/19)

Il-Qorti Ġenerali tat deċiżjoni dwar il-bidu tad-dekorrenza tat-terminu għall-preżentata ta’ rikors kontra deċiżjoni li kienet tikkonċerna persuna suġġetta għar-Regolamenti tal-Persunal tal-uffiċjali Ewropej fil-każ ta’ notifika mingħajr suċċess ta’ ittra rreġistrata. Fl-assenza ta’ dispożizzjonijiet li jirregolaw id-determinazzjoni tal-bidu tad-dekorrenza tal-kalkolu tat-terminu ħall-preżentata ta’ rikors fil-każ ta’ nuqqas ta’ rtirar ta’ ittra rreġistrata b’avviż ta’ riċezzjoni fil-kawżi li jaqgħu taħt l-imsemmi regolamenti, il-Qorti Ġenerali, barra minn hekk, fakkret li ċ-ċertezza legali u n-neċessità li tiġi evitata kull diskriminazzjoni jew trattament arbitrarju fl-amministrazzjoni tajba tal-ġustizzja jipprekludu l-preżunzjoni ta’ notifika fid-data tal-iskadenza tat-terminu ta’ żamma tal-ittra rreġistrata indirizzata lir-residenza tar-rikorrent. Fl-aħħar nett, il-Qorti Ġenerali ddeċidiet li, peress li d-deċiżjoni kienet ġiet innotifikata bil-posta elettronika(li kienet is-suġġett ta’ konferma ta’ rċevuta mingħajr dewmien mid-destinatarju), kien fid-data tan-notifika li jibda jiddekorri t-terminu għall-preżentata ta’ rikors.
Sentenza Barata vs Il‑Parlament Ewropewtat-3 ta’ Marzu 2021 (T‑723/18)

F’kawża bejn ir-Repubblika tal-Moldavja u kumpannija Ukraina, il-Qorti tal-Ġustizzja ġiet mistoqsija dwar il-klassifikazzjoni bħala “investiment”, fis-sens tat-Trattat dwar il-Karta tal-Enerġija (TKE), ta’ kreditu li kien jirriżulta minn kuntratt ta’ bejgħ tal-elettriku. Hija ddeċidiet li l-akkwist, minn impriża ta’ parti kontraenti tat-TCE, ta’ kreditu li jirriżulta minn kuntratt ta’ provvista ta’ elettriku, mhux assoċjat ma’ investiment, miżmum minn impriża ta’ Stat terz għal dan it-Trattat fil-konfront ta’ impriża pubblika ta’ parti kontraenti oħra tal-istess Trattat, ma jikkostitwixxix “investiment”, fis-sens tat-TCE. Fil-fatt, kreditu li jirriżulta minn sempliċi kuntratt ta’ bejgħ tal-elettriku ma jistax jitqies li jkun ingħata għall-eżerċizzju ta’ attività ekonomika fis-settur tal-enerġija. Minn dan isegwi li sempliċi kuntratt ta’ provvista ta’ elettriku, prodott minn operaturi oħra, huwa operazzjoni kummerċjali li ma jistax, bħala tali, jikkostitwixxi investiment.
Sentenza Il‑Moldavja vs Komstroytat-2 ta’ Settembru 2021 (C‑741/19)

Fl-opinjoni tagħha mogħtija fuq talba tal-Parlament Ewropew, il-Qorti tal-Ġustizzja indikat li t-Trattati ma jipprojbixxux lill-Kunsill milli jistenna, qabel ma jadotta d-deċiżjoni dwar il-konklużjoni mill-Unjoni tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza kontra n-nisa u l-vjolenza domestika (imsejħa Konvenzjoni ta’ Istanbul), il-“ftehim komuni” tal-Istati Membri, iżda li l-Kunsill ma jistax jemenda l-proċedura għall-konklużjoni ta’ din il-konvenzjoni billi jissuġġetta din il-konklużjoni għal “ftehim minn qabel” bħal tali “ftehim komuni”. Il-Qorti tal-Ġustizzja ppreċiżat il-bażi legali materjali xierqa għall-adozzjoni tal-att tal-Kunsill li jikkonkludi l-parti tal-Konvenzjoni ta’ Istanbul li hija s-suġġett tal-ftehim previst. Hija ppreċiżat ukoll li l-att ta’ konklużjoni jista’ jinqasam f’żewġ deċiżjonijiet distinti meta jiġi stabbilit bżonn oġġettiv.
Opinjoni Konvenzjoni ta’ Istanbul tas-ta’ Ottubru 2021 (1/19)

Fil-kuntest ta’ rikorsi ppreżentati mil-Lussemburgu u minn Amazon, il-Qorti Ġenerali annullat id-deċiżjoni tal-Kummissjoni li tgħid li l-Lussemburgu kien ta, bejn l-2006 u l-2014, lil Amazon EU, dak iż-żmien iċ-ċentrali tal-bejgħ ta’ Amazon għall-Ewropa kollha, li s-sede tagħha tinsab fil-Lussemburgu, għajnuna mill-Istat li tmur kontra d-dritt tal-Unjoni, billi ppermettielha, permezz ta’ deċiżjonijiet fiskali antiċipattivi (“tax rulings”), li tħallas ħafna inqas taxxi minn impriżi oħra. Skont il-Kummissjoni, il-Lussemburgu kellu jirkupra mingħand Amazon vantaġġi fiskali indebiti għall-ammont ta’ madwar EUR 250 miljun, flimkien mal-interessi. Fis-sentenza tagħha, il-Qorti Ġenerali kkonstatat li l-Kummissjoni ma kinitx uriet b’mod suffiċjenti li d-dħul taxxabbli ta’ Amazon EU kien ġie mnaqqas artifiċjalment minħabba s-sopravalutazzjoni tar-royalty mħallsa minnha lil impriża oħra tal-grupp Amazon għall-użu ta’ ċerti drittijiet ta’ proprjetà intellettwali.
Sentenza Il‑Lussemburgu u Amazon vs Il‑Kummissjonitat-12 ta’ Mejju 2021 (T‑816/17 et)

Il-Qorti Ġenerali ċaħdet ir-rikorsi ppreżentati mil-Lussemburgu u mill-fornitur tal-enerġija Engie kontra d-deċiżjoni li permezz tagħha l-Kummissjoni kienet ikkonstatat li l-Lussemburgu kien ta lil Engie għajnuna mill-Istat li tmur kontra d-dritt tal-Unjoni billi ppermetta, permezz ta’ deċiżjonijiet fiskali antiċipati (“tax rulings”), lil żewġ kumpanniji ta’ dan il-grupp residenti fil-Lussemburgu jevadu t-taxxa fuq il-kważi totalità tal-profitti tagħhom. Skont il-Kummissjoni, il-Lussemburgu kellu jirkupra madwar EUR 120 miljun ta’ taxxi mhux imħallsa, flimkien mal-interessi. Fis-sentenza tagħha li kkonfermat din id-deċiżjoni, il-Qorti Ġenerali enfasizzat li l-Lussemburgu kien irrinunzja milli jikkonstata abbuż ta’ dritt minn Engie meta l-kriterji kollha kienu ssodisfatti.
Sentenza Il‑Lussemburgu et vs Il‑Kummissjonitat-12 ta’ Mejju 2021 (T‑516/18 et)

Il-Qorti Ġenerali rrikonoxxiet il-validità ta’ trade mark tridimensjonali li tirrappreżenta l-forma ta’ stikk tal-lipstikk. B’dan il-mod, hija annullat id-deċiżjoni tal-Uffiċċju tal-Proprjetà Intellettwali tal-Unjoni Ewropea (EUIPO) li kienet ċaħdet l-applikazzjoni inizjali għar-reġistrazzjoni ta’ dan is-sinjal bħala trade mark tal-Unjoni Ewropea sabiex tindika lipstikk. Skont il-Qorti Ġenerali, it-trade mark li għaliha saret l-applikazzjoni kellha karattru distintiv peress li kienet tiddevja ħafna mir-regola u mill-użanzi tas-settur tal-lipstikk, peress li l-istikk kien ta’ forma tonda u mhux vertikali u ċilindrika.
Sentenza Guerlaintal-14 ta’ Lulju 2021 (T‑488/20)

Il-Qorti Ġenerali ddeċidiet li fajl awdjo li jirriproduċi l-ħoss tal-ftuħ ta’ landa tax-xorb, segwit b’silenzju u minn tfexfix, ma jistax jiġi rreġistrat bħala trade mark tal-Unjoni Ewropea sabiex jindika b’mod partikolari xorb, sa fejn ma jkollux karattru distintiv. Il-Qorti Ġenerali b’hekk qablet mal-pożizzjoni tal-EUIPO u fakkret li sinjal awdjo għandu jkollu karattru distintiv sabiex il-konsumatur ikun jista’ jifhmu bħala trade mark u mhux bħala element ta’ karattru funzjonali jew indikatur mingħajr karatteristika proprja tiegħu.
Sentenza Ardagh Metal Beverage Holdingstas-7 ta’ Lulju 2021 (T‑668/19)

Il-Qorti Ġenerali ċaħdet ir-rikors tal-kumpannija Chanel kontra l-applikazzjoni għal reġistrazzjoni ta’ trade mark ippreżentata mill-kumpannija Huawei quddiem l-Uffiċċju tal-Proprjetà Intellettwali tal-Unjoni Ewropea (EUIPO) għar-raġuni li s-sinjali figurattivi inkwistjoni ma kinux jixxiebhu u ddeċidiet li t-trade marks għandhom jiġu pparagunati kif kienu ġew irreġistrati jew li għalihom saret l-applikazzjoni, mingħajr ma tbiddel l-orjentazzjoni tagħhom. Il-Qorti Ġenerali indikat li s-sempliċi preżenza, f’kull waħda mit-trade marks inkwistjoni, ta’ żewġ elementi li huma marbuta bejniethom ma tirrendix it-trade marks simili, anki jekk ikollhom il-forma ġeometrika bażika ta’ ċirku madwar dawn l-elementi.
Sentenza Chanel SAStal-21 ta’ April 2021 (T‑44/20)

Il-Qorti Ġenerali tat deċiżjoni dwar il-possibbiltà għal avukat Brittaniku li jirrappreżenta parti fi proċedura quddiemha fil-kuntest ta’ rikors kontra deċiżjoni tal-Uffiċċju tal-Proprjetà Intellettwali tal-Unjoni Ewropea (EUIPO). Il-Qorti Ġenerali fakkret iż-żewġ kundizzjonijiet kumulattivi sabiex persuna tkun tista’ validament tirrappreżenta partijiet (minbarra l-Istati Membri u l-istituzzjonijiet tal-Unjoni) quddiem il-qrati tal-Unjoni: l-ewwel nett, ikollu l-kwalità ta’ avukat u jkun awtorizzat jipprattika quddiem qorti ta’ Stat Membru jew ta’ Stat ieħor li jkun parti fil-Ftehim ŻEE. Ir-rikors kien ġie ppreżentat wara l-31 ta’ Diċembru 2020, tmiem il-perijodu tranżitorju qabel il-ħruġ definittiv tar-Renju Unit mill-Unjoni, u ma kien jaqa’ taħt ebda waħda mill-ipoteżijiet previsti fil-Ftehim dwar il-Ħruġ li fihom avukat awtorizzat jipprattika quddiem il-qrati tar-Renju Unit u li ma jkunx stabbilixxa li jkun awtorizzat jipprattika quddiem qorti ta’ Stat Membru jew ta’ Stat ieħor li jkun parti fil-Ftehim ŻEE jkun jista’ jirrappreżenta parti quddiem il-qrati tal-Unjoni. Għaldaqstant, ir-rikors ġie ddikjarat inammissibbli.
Digriet Daimler vs EUIPOtas-7 ta’ Diċembru 2021 (T‑422/21)

Il-Qorti tal-Ġustizzja ddeċidiet li meta d-detentur tad-drittijiet tal-awtur ikun adotta jew impona miżuri ta’ restrizzjoni kontra t-transklużjoni (framing), l-inkorporazzjoni ta’ xogħol f’paġna internet ta’ terz, permezz ta’ din it-teknika, tikkostitwixxi tqegħid għad-dispożizzjoni ta’ dan ix-xogħol lil pubbliku ġdid. Din il-komunikazzjoni lill-pubbliku għandu jkollha l-awtorizzazzjoni tad-detentur tad-drittijiet tal-awtur.
Sentenza VG Bild‑Kunsttad-9 ta’ Marzu 2021 (C‑392/19)

Il-Qorti tal-Ġustizzja ppreċiżat, fil-kuntest tas-sistema ta’ qabel dik introdotta bid-direttiva l-ġdida tal-2019 dwar id-drittijiet tal-awtur, il-kundizzjonijiet li fihom ir-responsabbiltà tal-pjattaformi online (f’dan il-każ, YouTube u Cyando) setgħet tiġi stabbilita. Hija ddeċidiet li l-operaturi ta’ tali pjattaformi, bħala prinċipju, ma jwettqux, huma stess, komunikazzjoni lill-pubbliku tal-kontenut protett mid-drittijiet tal-awtur imqiegħed illegalment fuq l-internet mill-utenti tagħhom. Madankollu, jistgħu jinżammu responsabbli għat-twettiq ta’ tali komunikazzjoni bi ksur tad-drittijiet tal-awtur jekk jikkontribwixxu, lil hinn mis-sempliċi tqegħid għad-dispożizzjoni tal-pjattaformi, billi jagħtu aċċess lill-pubbliku għal dan il-kontenut.
Sentenza YouTube ettat-22 ta’ Ġunju 2021 (C‑682/18)

F’din il-kawża, intużaw il-konnessjonijiet internet ta’ klijenti tal-kumpannija Telenet sabiex jaqsmu films li jappartjenu lill-katalgu tal-kumpannija Mircom, fuq network pari għal pari (“peer-to-peer”). Il-protezzjoni tad-drittijiet tal-proprjetarju ta’ drittijiet ta’ proprjetà intellettwali tista’ tiġġustifika, il-Qorti tal-Ġustizzja ddeċidiet, li ssir ir-reġistrazzjoni sistematika tal-indirizzi IP tal-utenti u l-komunikazzjoni tal-ismijiet u l-indirizzi postali tagħhom lill-proprjetarju jew lil terz sabiex jippermetti li jiġi ppreżentat rikors għad-danni. Madankollu, it-talba għal informazzjoni minn detentur ta’ drittijiet ta’ proprjetà intellettwali ma tistax tkun abbużiva u għandha tkun iġġustifikata u proporzjonata.
Sentenza M.I.C.M.tas-7 ta’ Ġunju 2021 (C‑597/19)

Proprjetarju ta’ barijiet tapas fi Spanja kien juża s-sinjal CHAMPANILLO sabiex jindika u jippromwovi l-istabbilimenti tiegħu. Fir-riklami tagħha kienu rrappreżentati żewġ tazzi mimlijin b’xarba tfexfex. Il-Kumitat Interprofessionnel du Vin de Champagne (CIVC), korp li jieħu ħsieb l-interessi tal-produtturi tax-xampanja, xtaq jipprojbixxi l-użu tal-kelma “champanillo” (li bl-Ispanjol tfisser “xampanja żgħira”) minħabba li l-użu ta’ dan is-sinjal kien jikkostitwixxi preġudizzju għad-denominazzjoni protetta ta’ oriġini (DPO) “Champagne”. Il-Qorti tal-Ġustizzja ppreċiżat li l-prodotti koperti minn DOP jibbenefikaw minn protezzjoni fir-rigward ta’ aġir ipprojbit li jirrigwarda kemm prodotti kif ukoll servizzi.
Sentenza Comité Interprofessionnel du Vin de Champagnetad-9 ta’ Settembru 2021 (C‑783/19)

Il-Qorti tal-Ġustizzja ddeċidiet li l-aċċess, għal finijiet kriminali, għal ġabra ta’ data ta’ komunikazzjonijiet elettroniċi dwar it-traffiku jew dwar il-lokalizzazzjoni, li tippermetti li jinsiltu konklużjonijiet preċiżi dwar il-ħajja privata tal-utenti, huwa awtorizzat biss sabiex tiġi miġġielda l-kriminalità serja jew sabiex jiġi evitat theddid serju għas-sigurtà pubblika. Barra minn hekk, id-dritt tal-Unjoni jipprekludi leġiżlazzjoni nazzjonali li tagħti kompetenza lill-uffiċċju tal-prosekutur sabiex jawtorizza l-aċċess ta’ awtorità pubblika għal din id-data sabiex imexxi investigazzjoni kriminali.
Sentenza H. K vs Prokuratuurtat-2 ta’ Marzu 2021 (C‑746/18)

F’sentenza mogħtija f’kawża dwar protezzjoni tad-data personali li tinvolvi l-kumpannija Facebook Ireland, il-Qorti tal-Ġustizzja ppreċiżat il-kundizzjonijiet għall-eżerċizzju tas-setgħat tal-awtoritajiet nazzjonali ta’ superviżjoni fir-rigward ta’ pproċessar transkonfinali ta’ data, billi indikat li, taħt ċerti kundizzjonijiet, tali awtorità setgħet allegatament tikser id-dispożizzjonijiet tar-Regolament Ġenerali dwar il-protezzjoni tad-data personali (RĠPD) quddiem qorti ta’ Stat Membru, anki jekk hija ma tkunx l-awtorità li tmexxi dan l-ipproċessar. Il-Qorti tal-Ġustizzja qieset ukoll li, peress li Facebook Ireland ma kinitx informat b’mod suffiċjenti lill-utenti tal-internet bil-ġbir u bl-użu tal-informazzjoni li tikkonċernahom, il-kunsens tagħhom għal dan l-ipproċessar ta’ data ma kienx validu
Sentenza Facebook Ireland ettal-15 ta’ Ġunju 2021 (C‑645/19)

Fl-ipproċessar ta’ ikel bijoloġiku bħax-xorb bijoloġiku abbażi ta’ ross u ta’ fażola tas-soja intiż għall-arrikkiment tal-kalċju, iż-żieda tal-alka Lithothamnium calcareum (lithotami) ġiet ipprojbita mill-Qorti tal-Ġustizzja, li fakkret li d-dritt tal-Unjoni jipprevedi regoli stretti fir-rigward taż-żieda ta’ minerali, bħall-kalċju, fil-produzzjoni ta’ prodotti tal-ikel organiċi. Li jiġi awtorizzat l-użu tat-trab ta’ din l-alka bħala ingredjent mhux bijoloġiku ta’ oriġini agrikola jwassal, fil-fatt, sabiex il-produtturi ta’ dawn il-prodotti tal-ikel ikunu jistgħu jevitaw dawn ir-regoli.
Sentenza Natumi GmbH vs Land Nordrhein‑Westfalentad-29 ta’ April 2021 (C‑815/19)

Il-Qorti tal-Ġustizzja ddeċidiet li s-sempliċi żvolġiment ta’ titjira lejn ajruport qrib l-ajruport tad-destinazzjoni inizjali ma jagħtix dritt għal kumpens fil-forma ta’ somma f’daqqa. Min-naħa l-oħra, hija indikat li l-kumpannija tal-ajru għandha, fuq inizjattiva tagħha stess, tipproponi lill-passiġġier il-ħlas tal-ispejjeż ta’ trasferiment lejn l-ajruport tad-destinazzjoni inizjalment previst jew, jekk ikun il-każ, destinazzjoni oħra qrib miftiehma miegħu. Sabiex jeħles mill-obbligu tiegħu li jikkumpensa lill-passiġġieri fil-każ ta’ dewmien twil fil-wasla ta’ titjira, it-trasportatur jista’ jinvoka ċirkustanza straordinarja li ma taffettwax it-titjira mdewma, iżda titjira preċedenti li hija topera anki bl-istess ajruplan.
Sentenza WZ vs Austrian Airlines AG tat-22 ta’ April 2021 (C‑826/19)

Il-Qorti tal-Ġustizzja qieset li strajk organizzat minn sindakat tal-persunal ta’ trasportatur bl-ajru, intiż b’mod partikolari sabiex jinkisbu żidiet fis-salarju, ma jikkostitwixxix “ċirkustanza straordinarja”li teħles lill-kumpannija tal-ajru mill-obbligu tagħha li tħallas kumpens fil-każ ta’ annullament jew ta’ dewmien twil. Fil-fatt, il-fatt li tiġi eskluża din il-klassifikazzjoni għal tali strajk, organizzat b’osservanza tal-kundizzjonijiet stabbiliti mil-leġiżlazzjoni nazzjonali, la jippreġudika l-libertà tal-intrapriża tat-trasportatur bl-ajru u lanqas id-drittijiet tiegħu ta’ proprjetà u ta’ negozj
Sentenza Airhelp Ltd vs Scandinavian Airlines System SAStat-23 ta’ Marzu 2021 (C‑28/20)

Il-Qorti tal-Ġustizzja ddeċidiet li Stat Membru taż-żona tal-euro jista’ jobbliga lill-amministrazzjoni tiegħu li taċċetta ħlasijiet fi flus. Madankollu, hija indikat li l-Istat Membru jista’ wkoll jillimita din il-possibbiltà ta’ ħlas għal raġuni ta’ interess pubbliku, b’mod partikolari meta l-ħlas fi flus kontanti jista’ jwassal għal spiża mhux raġonevoli għall-amministrazzjoni minħabba n-numru kbir ħafna ta’ persuni taxxabbli. Hija ppreċiżat ukoll li l-obbligu li jiġu aċċettati flus kontanti jista’ jiġi limitat għal raġunijiet ta’ interess pubbliku, jekk dawn ir-restrizzjonijiet ikunu proporzjonati mal-għan ta’ interess pubbliku mfittex, li jimplika b’mod partikolari l-possibbiltà, għall-persuni responsabbli għall-ħlas tat-taxxa, li jkollhom mezzi legali oħra għal-likwidazzjoni tal-krediti pekunjarji.
Sentenza Johannes Dietrich u Norbert Häring vs Hessischer Rundfunktas-26 ta’ Jannar 2021 (C‑422/219 u C‑423/19)

Il-Qorti tal-Ġustizzja ddeċidiet li l-leġiżlazzjoni Ungeriża li tipprojbixxi l-annullament ta’ kuntratt ta’ self iddenominat f’munita barranija minħabba li jinkludi klawżola inġusta dwar id-differenza fir-rati tal-kambju tidher kompatibbli mad-dritt tal-Unjoni jekk din il-leġiżlazzjoni tippermetti li tiġi stabbilita mill-ġdid is-sitwazzjoni fid-dritt u fil-fatt li kienet tkun dik tal-konsumatur fl-assenza tal-klawżola inġusta, u anki jekk l-annullament tal-kuntratt kien ikun iktar vantaġġuż għall-konsumatur. Barra minn hekk, ir-rieda murija mill-konsumatur ikkonċernat ma tistax tipprevali fuq l-evalwazzjoni, li għandha ssir mill-qorti nazzjonali, tal-kwistjoni dwar jekk il-leġiżlazzjoni nazzjonali Ungeriża tippermettix effettivament li tiġi stabbilita mill-ġdid is-sitwazzjoni, fid-dritt u fil-fatt ta’ dan il-konsumatur.
Sentenza OTP Jelzálogbank ettat-2 ta’ Settembru 2021 (C‑932/19)

F’kawża li fiha l-kumpannija marittima Irlandiża Irish Ferries kellha, fl-2018, tannulla l-istaġun kollu tal-vjaġġi peress li, wara dewmien fil-kunsinna ta’ bastiment ġdid, hija ma setgħetx tqiegħed fis-servizz bastiment sostituttiv, il-Qorti tal-Ġustizzja ċċarat diversi dispożizzjonijiet dwar id-drittijiet tal-passiġġieri li jivvjaġġaw bil-baħar jew fuq mezz ta’ navigazzjoni interna (annullament, kumpens, prezz tal-biljett...). Hija qieset b’mod partikolari li l-obbligi ta’ rotta differenti u ta’ kumpens fil-każ ta’ annullament ta’ servizz ta’ trasport huma proporzjonati mal-għan imfittex mir-regolament applikabbli f’dan il-qasam.
Sentenza Irish Ferries tat-2 ta’ Settembru 2021 (C‑570/19)

Il-Qorti tal-Ġustizzja tat deċiżjoni dwar l-għażla tariffarja msejħa “b’tariffa żero” għall-internet. Din hija prattika kummerċjali li permezz tagħha fornitur ta’ aċċess japplika “tariffa żero” jew iktar vantaġġuża, għat-traffiku kollu jew parti minnu relatat ma’ applikazzjoni jew ma’ kategorija ta’ applikazzjonijiet speċifiċi, proposti mill-imsieħba ta’ dan il-fornitur ta’ aċċess. Il-Qorti tal-Ġustizzja ddeċidiet li tali għażliet tariffarji jmorru kontra r-regolament dwar l-aċċess għal internet miftuħ, kif ukoll limitazzjonijiet tal-broadband, tat-tqassim tal-konnessjoni jew tal-użu f’roaming, minħabba l-attivazzjoni ta’ tali għażla.
Sentenzi Vodafone u Telekom Deutschlandtat-2 ta’ Settembru 2021 (C‑854/19 et)

Tressaq quddiem il-Qorti tal-Ġustizzja l-każ ta’ wild minuri ċittadin tal-Unjoni li l-att tat-twelid tiegħu, stabbilit mill-Istat Membru ospitanti, kien jindika bħala ġenituri tiegħu żewġ persuni tal-istess sess. Hija ddeċidiet li l-Istat Membru li tiegħu dan il-wild huwa ċittadin kien obbligat li joħroġlu karta tal-identità jew passaport, mingħajr ma dan jeżiġi l-istabbiliment minn qabel ta’ att tat-twelid mill-awtoritajiet nazzjonali tiegħu. Dan l-Istat Membru huwa obbligat ukoll li jirrikonoxxi d-dokument li joriġina mill-Istat Membru ospitanti, li jippermetti lill-imsemmi wild jeżerċita, flimkien ma’ kull waħda minn dawn iż-żewġ persuni, id-dritt tiegħu ta’ moviment u ta’ residenza liberi fit-territorju tal-Unjoni..
Sentenza Stolichna obshtina, raġġ “Pancharevo” tal-14 ta’ Diċembru 2021 (C‑490/20)

Fil-kuntest tal-ħruġ tar-Renju Unit mill-Unjoni Ewropea, il-leġiżlazzjoni Brittanika stabbilixxiet għaċ-ċittadini tal-Unjoni sistema ġdida li tipprovdi li l-għoti ta’ dritt ta’ residenza ma jkunx suġġett għar-rekwiżit ta’ riżorsi. Min-naħa l-oħra, hija ċċaħħad liċ-ċittadini tal-Unjoni mill-benefiċċji ta’ għajnuna soċjali kklassifikati bħala “kreditu universali”. Il-Qorti tal-Ġustizzja qieset li din il-leġiżlazzjoni hija kompatibbli mal-prinċipju ta’ ugwaljanza fit-trattament iggarantit mid-dritt tal-Unjoni. Madankollu, l-awtoritajiet nazzjonali kompetenti għandhom jivverifikaw li rifjut li jingħataw tali benefiċċji ta’ għajnuna soċjali ma jesponix liċ-ċittadin tal-Unjoni u lill-uliedu għal riskju ta’ ksur tad-drittijiet tagħhom stabbiliti mill-Karta tad-Drittijiet Fundamentali tal-Unjoni, b’mod partikolari r-rispett tad-dinjità tal-bniedem.
Sentenza The Department for Communities in Northern Ireland tal-15 ta’ Lulju 2021 (C‑709/20)

Il-Qorti tal-Ġustizzja ppreċiżat il-kriterji li għandhom jittieħdu inkunsiderazzjoni sabiex jiġi evalwat jekk impriża ta’ xogħol temporanju twettaqx ġeneralment “attivitajiet sostanzjali minbarra attivitajiet ta’ amministrazzjoni interna pura” fit-territorju tal-Istat Membru li fih tkun stabbilita. Skont il-Qorti tal-Ġustizzja, sabiex jitqies li “normalment twettaq l-attivitajiet tagħha” fi Stat Membru, impriża ta’ impjieg temporanju għandha twettaq parti sinjifikattiva mill-attivitajiet tagħha ta’ tqegħid għad-dispożizzjoni ta’ ħaddiema favur impriżi utenti stabbiliti u li jeżerċitaw l-attivitajiet tagħhom fit-territorju tal-imsemmi Stat Membru. L-eżerċizzju ta’ attivitajiet ta’ selezzjoni u ta’ reklutaġġ ta’ ħaddiema temporanji fl-Istat Membru li fih tkun stabbilita l-aġenzija ta’ xogħol temporanju ma huwiex biżżejjed sabiex din l-impriża titqies li teżerċita “attivitajiet sostanzjali” fih.
Sentenza Team Power Europetat-3 ta’ Ġunju 2021 (C‑784/19)

Żewġ kawżi kienu jikkonċernaw impjegati ta’ twemmin Musulman li ddeċidew li jilbsu velu reliġjuż fil-post tax-xogħol tagħhom. Skont il-Qorti tal-Ġustizzja, il-projbizzjoni, ordnata mill-persuna li timpjega, li wieħed jilbes kwalunkwe forma viżibbli ta’ espressjoni tat-twemmin politiku, filosofiku jew reliġjuż fil-post tax-xogħol tista’ tiġi ġġustifikata mill-ħtieġa tal-persuna li timpjega li tippreżenta ruħha b’mod newtrali fil-konfront tal-klijenti tagħha jew sabiex tevita kunflitti soċjali. Madankollu, din il-ġustifikazzjoni għandha tissodisfa ħtieġa reali tal-persuna li timpjega u, fil-kuntest tal-konċiljazzjoni tad-drittijiet u interessi inkwistjoni, il-qrati nazzjonali jistgħu jieħdu inkunsiderazzjoni l-kuntest rispettiv tal-Istat Membru tagħhom u b’mod partikolari d-dispożizzjonijiet nazzjonali iktar favorevoli f’dak li jirrigwarda l-protezzjoni tal-libertà ta’ reliġjon.
Sentenza WABE u MH Müller Handeltal-15 ta’ Lulju 2021 (C‑804/18 u C‑341/19)

F’April 2020, il-Ġermanja kkomunikat lill-Kummissjoni għajnuna individwali favur il-kumpannija tal-ajru Condor Flugdienst GmbH fil-forma ta’ żewġ kuntratti ta’ self li jammontaw għal EUR 550 miljun, iggarantiti mill-Istat u flimkien mal-interessi ssussidjati. Il-Qorti Ġenerali annullat id-deċiżjoni tal-Kummissjoni li tapprova l-għajnuna minħabba insuffiċjenza ta’ motivazzjoni. Madankollu, minħabba l-kuntest ekonomiku u soċjali kkaratterizzat mill-pandemija tal-COVID-19, hija ssospendiet l-effetti tal-annullament sal-adozzjoni ta’ deċiżjoni ġdida mill-Kummissjoni.
Sentenza Ryanair vs Il‑Kummissjoni (Condor ‑ Covid‑19)tad-9 ta’ Ġunju 2021 (T‑665/20)

Il-Qorti Ġenerali qieset li l-iskema ta’ għajnuna mill-Istat stabbilita mill-Isvezja, fil-forma ta’ garanziji ta’ self favur il-kumpanniji tal-ajru li kellhom liċenzja operattiva Svediża, sabiex tirrimedja t-tfixkil serju tal-ekonomija ta’ dan l-Istat Membru matul il-pandemija tal-COVID-19, kienet konformi mad-dritt tal-Unjoni. Din l-iskema kienet intiża b’mod partikolari għall-kumpanniji tal-ajru li kellhom, fl-1 ta’ Jannar 2020, liċenzja sabiex jeżerċitaw attivitajiet kummerċjali fil-qasam tal-avjazzjoni, bl-eċċezzjoni tal-kumpanniji tal-ajru li kienu joperaw titjiriet mhux skedati.
Sentenza Ryanair DAC vs Il‑Kummissjoni tas-17 ta’ Frar 2021 (T‑238/20)

Il-Qorti Ġenerali vvalidat l-iskema ta’ għajnuna mill-Istat stabbilita minn Franza fil-forma ta’ moratorju fuq il-ħlas ta’ taxxi favur il-kumpanniji li kellhom liċenzja Franċiża. Din l-iskema ta’ għajnuna, li kienet tikkonċerna t-tassazzjoni tal-avjazzjoni ċivili u t-taxxa ta’ solidarjetà fuq il-biljetti tal-ajru dovuti fuq bażi ta’ kull xahar matul il-perijodu bejn Marzu u Diċembru 2020, kienet, fil-fatt, meqjusa xierqa, mill-Qorti Ġenerali, sabiex tirrimedja għad-danni ekonomiċi kkawżati mill-pandemija tal-COVID-19 u għalhekk ma kinitx tikkostitwixxi diskriminazzjoni kuntrarja għad-dritt tal-Unjoni.
Sentenza Ryanair DAC vs Il‑Kummissjoni tas-17 ta’ Frar 2021 (T‑259/20)

Il-Qorti Ġenerali vvalidat l-għajnuna, fil-forma ta’ żewġ linji ta’ kreditu li jiġġeddu ta’ ammont massimu ta’ 1.5 biljun Krona Svediża (SEK) kull waħda, implimentata mill-Isvezja u mid-Danimarka favur il-kumpannija SAS għad-danni li jirriżultaw mill-kanċellazzjoni jew mill-programmazzjoni mill-ġdid tat-titjiriet wara restrizzjonijiet ta’ vvjaġġar ikkawżati mill-pandemija tal-COVID-19. Hija qieset li, peress li SAS kellha sehem mis-suq sinjifikattivament ogħla mill-eqreb kompetitur tagħha f’dawn iż-żewġ Stati Membri, l-għajnuna inkwistjoni ma kinitx tikkostitwixxi diskriminazzjoni illegali.
Sentenzi Ryanair DAC vs Il‑Kummissjoni tal-14 ta’ April 2021 (T‑378/20 u T‑379/20)

Il-Qorti Ġenerali ddeċidiet li l-garanzija tal-Finlandja favur il-kumpannija tal-ajru Finnair intiża bħala għajnuna fil-kisba, minn fondi tal-pensjoni, ta’ self ta’ EUR 600 miljun sabiex tkopri l-bżonnijiet tagħha ta’ kapital operattiv wara l-pandemija tal-COVID-19 kienet konformi mad-dritt tal-Unjoni. Il-garanzija kienet neċessarja sa fejn Finnair kienet qiegħda tirriskja l-falliment minħabba t-tnaqqis f’daqqa tal-attività tagħha u minħabba l-impossibbiltà li tkopri l-bżonnijiet tagħha ta’ likwidità fis-swieq ta’ kreditu.
Sentenza Ryanair DAC vs Il‑Kummissjoni tal-14 ta’ April 2021 (T‑388/20)

Il-Qorti Ġenerali vvalidat id-deċiżjoni tal-Kummissjoni li tawtorizza l-fondi ta’ sostenn stabbiliti minn Spanja sabiex tiġi żgurata s-solvenza tal-impriżi mhux finanzjarji li kellhom iċ-ċentri prinċipali ta’ attività tagħhom fi Spanja, li kienu meqjusa sistemiċi jew strateġiċi għall-ekonomija nazzjonali u li kellhom diffikultajiet temporanji minħabba l-pandemija tal-COVID-19. Hija enfasizzat li l-miżura inkwistjoni, intiża għall-adozzjoni ta’ miżuri ta’ rikapitalizzazzjoni u li kellha baġit ta’ EUR 10 biljun, kienet ċertament tikkostitwixxi skema ta’ għajnuna mill-Istat iżda kienet proporzjonata u nondiskriminatorja.
Sentenza Ryanair DAC vs Il‑Kummissjoni tad-19 ta’ Mejju 2021 (T‑628/20)

Il-Kummissjoni kienet ikkonstatat, permezz ta’ deċiżjonijiet varji, li deċiżjoni ta’ arbitraġġ li tistabbilixxi, għall-produttur tal-aluminju Grieg Mytilinaios, tariffa tal-elettriku li kellha titħallas lil DEI (produttur u fornitur tal-elettriku Grieg), allegatament preferenzjali, ma kinitx tinkludi, fir-realtà, l-għoti ta’ vantaġġ. Il-Qorti Ġenerali annullat dawn id-deċiżjonijiet billi kkunsidrat li l-Kummissjoni kellha teżamina, b’mod diliġenti, suffiċjenti u komplet, l-eventwali eżistenza ta’ għajnuna mill-Istat.
Sentenza DEI vs Il‑Kummissjoni tat-22 ta’ Settembru 2021 (T‑639/14 et)

Ġew ippreżentati rikorsi minn kooperattiva u minn sidien tas-sajjieda kontra d-deċiżjoni tal-Kummissjoni li ma tqajjimx oġġezzjonijiet dwar l-għajnuna marbuta mat-twettiq tal-ewwel parks eoliċi fil-baħar fi Franza. Il-Qorti Ġenerali kkonstatat li dawn il-persuni ma kinux awtorizzati jippreżentaw tali rikorsi peress li, minn naħa, huma ma kinux f’sitwazzjoni ta’ kompetizzjoni mal-operaturi ta’ dawn il-parks eoliċi u, min-naħa l-oħra, huma ma kinux urew ir-riskju ta’ effett konkret tal-għajnuna inkwistjoni fuq is-sitwazzjoni tagħhom.
Sentenza CAPA et vs Il‑Kummissjoni tal-15 ta’ Settembru 2021 (T‑777/19)

Fil-kuntest ta’ kawża bejn ex fizzjal tal-armata Slovena u l-Ministeru għad-Difiża dwar ir-remunerazzjoni tal-attività ta’ għassa tiegħu, il-Qorti tal-Ġustizzja ppreċiżat il-każijiet li fihom id-direttiva dwar l-organizzazzjoni tal-ħin tax-xogħol ma tapplikax għall-attivitajiet eżerċitati minn suldati. Din id-direttiva ma tipprekludix li perijodu on-call li matulu suldat huwa obbligat jibqa’ fil-kwartieri fejn huwa assenjat iżda ma jwettaqx xogħol effettiv jiġi rremunerat b’mod differenti minn perijodu on-call li matulu huwa jwettaq xogħol effettiv
Sentenza Ministrstvo za obrambo tal-15 ta’ Lulju 2021 (C‑742/19)

F’kawża għal deċiżjoni preliminari mressqa minn qorti Lussemburgiża, il-Qorti tal-Ġustizzja interpretat id-direttiva li timplimenta l-Ftehim Qafas rivedut dwar il-leave parentali. Hija indikat li Stat Membru ma jistax jissuġġetta d-dritt għal leave parentali għar-rekwiżit li l-ġenitur kellu impjieg fil-mument tat-twelid jew tal-adozzjoni tal-wild. Madankollu, dan l-Istat Membru jista’ jeżiġi li l-ġenitur ikun okkupa, mingħajr interruzzjoni, impjieg matul perijodu ta’ mill-inqas tnax-il xahar immedjatament qabel il-bidu ta’ dan il-leave parentali.
Sentenza XI vs Caisse għall-futur tat-tfaltal-25 ta’ Frar 2021 (C‑129/20)

Fl-Italja, l-għoti ta’ allowance tat-twelid u ta’ allowance tal-maternità ġie rrifjutat lil diversi ċittadini ta’ pajjiżi terzi li għandhom permess tax-xogħol uniku miksub bis-saħħa ta’ liġi nazzjonali li ttrasponiet direttiva tal-Unjoni, għar-raġuni li dawn il-persuni ma kellhomx l-istatus ta’ resident għal perijodu twil. Adita mill-Corte costituzionale (il-Qorti Kostituzzjonali, l-Italja), il-Qorti tal-Ġustizzja ddeċidiet li dawn iċ-ċittadini ta’ pajjiżi terzi kellhom id-dritt li jibbenefikaw minn dawn l-allowances kif previst mil-leġiżlazzjoni Taljana.
Sentenza O. D. et vs Istituto nazionale della previdenza sociale (INPS) tat-2 ta’ Settembru 2021 (C‑350/20)

Fl-2016, l-Awtorità Bankarja Ewropea (EBA) ħarġet linji gwida dwar il-modalitajiet ta’ governanza u s-sorveljanza tal-prodotti għal prodotti bankarji bl-imnut. Permezz ta’ avviż ippubblikat fis-sit internet tagħha, l-Autorité de contrôle prudentiel et de résolution (l-Awtorità għas-Sorveljanza u r-Riżoluzzjoni Prudenzjali) (ACPR) (Franza) ħabbret li hija kienet ikkonformat ruħha ma’ dawn il-linji gwida, li għalhekk saru applikabbli għall-istituzzjonijiet finanzjarji kollha suġġetti għas-superviżjoni tagħha. Il-Fédération bancaire français (FBF) għalhekk talbet lill-Conseil d’État Franċiż l-annullament tal-opinjoni, billi qieset li l-EBA ma kellhiex il-kompetenza sabiex toħroġ tali linji gwida. Il-Conseil d’État ressaq talba għal deċiżjoni preliminari quddiem il-Qorti tal-Ġustizzja fir-rigward tar-rimedji ġudizzjarji disponibbli sabiex jiġi żgurat l-istħarriġ tal-legalità tal-linji gwida inkwistjoni u fir-rigward tal-validità ta’ dawn tal-aħħar. Il-Qorti tal-Ġustizzja indikat li l-proċedura tar-rinviju għal deċiżjoni preliminari tista’ tintuża sabiex tiġi mistħarrġa din il-validità u li l-linji gwida kienu, f’dan il-każ, validi.
Sentenza FBFtal-15 ta’ Lulju 2021 (C‑911/19)

Fid-dawl tad-deterjorazzjoni fis-sitwazzjoni fil-qasam tad-drittijiet tal-bniedem, tal-Istat ta’ dritt u tad-demokrazija, il-Kunsill tal-Unjoni Ewropea adotta, fl-2017, regolament li stabbilixxa miżuri restrittivi kontra l-Venezwela). Din tal-aħħar għalhekk talbet l-annullament ta’ dawn il-miżuri quddiem il-Qorti Ġenerali, iżda din tal-aħħar qieset li l-Venezwela ma kellhiex locus standi kontra tali regolament. Adita b’appell, il-Qorti tal-Ġustizzja ddeċidiet, għall-kuntrarju, li dan l-Istat kellu locus standi kontra regolament li jintroduċi miżuri restrittivi fir-rigward tiegħu u għalhekk bagħat lura l-kawża quddiem il-Qorti Ġenerali sabiex tagħti deċiżjoni fuq il-mertu tar-rikors għal annullament.
Sentenza Il-Venezwela vs Il‑Kunsill tat-22 ta’ Ġunju 2021 (C‑872/19 P)