Éisteachtaí a chraoladh
Chun rochtain phoiblí ar a gníomhaíocht bhreithiúnach a éascú, cuireann Cúirt Bhreithiúnais an Aontais Eorpaigh córas chun éisteachtaí a chraoladh ar fáil.
Craoltar breithiúnais na Cúirte Breithiúnais agus léamh thuairimí na nAbhcóidí Ginearálta beo ar an leathanach seo. Cuirtear an t-athchraoladh i ngníomh ag tús na n-éisteachtaí seachadta, de réir an sceidil dá bhforáiltear san fhéilire breithiúnach.
Craoltar roinnt éisteachtaí ó bhéal freisin den Chúirt Bhreithiúnais atá réamhthaifeadta. Baineann sé sin, i bprionsabal, le héisteachtaí na gcásanna sa Chúirt Iomlán, sa Mhór-Dhlísheomra, nó, ar go heisceachtúil i gcás ina bhfuil údar leis sin mar gheall ar thábhacht an cháis, i ndlísheomra ina bhfuil cúigear Breithiúna ag suí. Beidh taifeadtaí na n-éisteachtaí sin ar fáil ar an suíomh seo go gceann tréimhse míosa ar a mhéid tar éis clabhsúr a chur leis an éisteacht.
Coinníollacha úsáide agus fógraíocht
Craoltar na héisteachtaí ar an Idirlíon ag Cúirt Bhreithiúnais an Aontais Eorpaigh ionas gur féidir le saoránaigh na héisteachtaí a leanúint ar an mbealach céanna dá mbeadh siad i láthair go fisiciúil ag na héisteachtaí.
Ar an gcaoi chéanna go dtoirmeasctar don phobal éisteacht a thaifeadadh agus iad i láthair, toirmeasctar an éisteacht a chraoltar ar an Idirlíon a íoslódáil nó a thaifeadadh, in aon fhoirm ar bith, go hiomlán nó go páirteach, cibé acu íomhánna nó fuaim, lena n-áirítear fuaim na gcainéal ateangaireachta éagsúil.
Ní hionann athchraoladh éisteachta ar an Idirlíon, i gcás ar bith, agus taifeadadh barántúil, taifead oifigiúil nó miontuairiscí oifigiúla ar an éisteacht sin.
Ní bheidh Cúirt Bhreithiúnais an Aontais Eorpaigh freagrach as tuairimí a chuirtear in iúl agus ráitis a dhéanfar le linn éisteacht a athchraoltar ar an Idirlíon nó as na hiarmhairtí a bhaineann le híoslódáil nó taifeadadh.
Ateangaireacht
Cinntítear ateangaireacht chomhuaineach na ndíospóireachtaí le linn éisteachta i dteanga an cháis, chomh maith leis na teangacha oifigiúla eile den Aontas is gá ar mhaithe le dea-reáchtáil na héisteachta sin.
Tá sé mar aidhm ag ateangaireacht éisteachtaí poiblí na Cúirte Breithiúnais agus na Cúirte Ginearálta cumarsáid a éascú agus ní taifead oifigiúil an ateangaireacht ar na himeachtaí. Níl ach an bunteanga barántúil. Tá ateangairí saor ó aon fhreagracht i gcomhlíonadh a gcuid dualgas.
