Il-Qorti tal-Ġustizzja tal-Unjoni Ewropea tippubblika żewġ rapporti ewlenin kull sena: il-Panorama tas-Sena u r-Rapport ta’ Ġestjoni. Iż-żewġ rapporti huma disponibbli online u jipprovdu rispettivament informazzjoni dwar il-kawżi ewlenin tas-sena u l-ġestjoni finanzjarja tal-Qorti tal-Ġustizzja.

Il-Panorama tas-Sena

Il-Panorama tas-Sena huwa r-rapport annwali tal-Qorti tal-Ġustizzja. Huwa jippreżenta l-attivitajiet tal-Qorti tal-Ġustizzja u l-iktar deċiżjonijiet importanti tal-Qorti tal-Ġustizzja u tal-Qorti Ġenerali tas-sena ta’ qabel.

Kull edizzjoni fiha ħarsa ġenerali lejn l-avvenimenti ewlenin tas-sena, statistika dwar il-ħidma taż-żewġ qrati u taqsima ta’ “Focus fuq il-ġurisprudenza” li tipproponi sunti ċari u komprensivi tal-kawżi ewlenin tas-sena. Ir-rapport jinkludi wkoll il-kontribuzzjonijiet tal-Presidenti taż-żewġ qrati u tar-Reġistratur tal-Qorti tal-Ġustizzja, li jirriflettu fuq l-evoluzzjoni u l-kisbiet ta’ kull qorti u tal-Istituzzjoni kollha kemm hi.

Tista’ tara l-iktar edizzjoni preċedenti tal-Panorama tas-Sena online jew bħala PDF. Verżjonijiet preċedenti jistgħu jinstabu hawn taħt.

Rapport ta’ Ġestjoni

Ir-Rapport ta’ Ġestjoni huwa r-rapport annwali tal-attività li juri kif il-Qorti tal-Ġustizzja tamministra r-riżorsi tagħha. Huwa jiġi ppreżentat lill-awtoritajiet tal-baġit tal-Unjoni skont ir-regoli finanzjarji tal-Unjoni. Ir-rapport jenfasizza r-riżultati miksuba mill-Qorti tal-Ġustizzja bl-użu tar-riżorsi mogħtija lilha u jevalwa l-funzjonament tas-sistemi ta’ kontroll intern.

L-aħħar Rapport ta’ Ġestjoni huwa disponibbli bil-Franċiż u bl-Ingliż. Verżjonijiet preċedenti jistgħu jinstabu hawn taħt.